Мурманскайга
XXI үйэҕэ олорорбут туоһутунан Интернети, социальнай ситимнэри, “мобильнай бааны” туһанан буруйу оҥоруу элбээбитэ буолар.
Ол курдук, Мурманскай уобалас биир олохтооҕо Avito.ru. биллэрии сайтыгар эбисийээнэ атыылыылларын ааҕан, тугун-ханныгын чуолкайдаһа барбакка, түөкүн баанын каартатыгар 12 тыһ. солк. сууманы ыытан кэбиспит. Күн-дьыл ааспыт – атыылааччыта да биллибэтэх, эбисийээнэтэ да суох. Түөкүн угаайытыгар киирэн, отоойкоҕо олордоҕо ол.
Ульяновскайга
Биир эмиэ да курус, эмиэ да киһи сонньуйар быһылаана Ульяновскайга буолбут.
Дуся диэн ааттаах макака зоопаркаҕа уу-нуурал олоҕо биир күн атыйахтыы ытыллыбыт. Зоопарк харабыллара каассаттан харчы уорбуттарын ааһан, өссө массыынаны күрэппиттэр. Ол массыынаҕа зоопарк дьаһалтата эбисийээнэни килиэккэҕэ олордон баран, ирдин диэн, укпутун уоруйахтар биллэллэр да, илдьэ сылдьарга күһэллибиттэр. Ол элээрдэн иһэн, аны суол быһылааныгар түбэспиттэр. Биирдэстэрэ реанимацияҕа киирбит, иккитэ макаканы туппутунан, атахха биллэрбит.
Быһылаан кэнниттэн хас да күн ааспытын кэнниттэн килиэккэлээх Дусяны аттынааҕы уобаластан, Самара куорат автовокзалыттан булбуттар. Хата, олохтоох зоопаркаҕа далбарга түбэһэн, кини бэркэ абыраммыт. Ону ульяновскайдааҕы хаһаайыттара кэлэн ылан барбыттар. Соһуйуох иһин, эбисийээнэ ити үлүгэрдээх мүлчүргэннээх сырыыга ончу эмсэҕэлээбэтэх.
Америкаҕа
Америка Флорида штатыгар полицейскайдар харах тэстэринэн айанныыр итирик суоппары туппуттар. Бу киһини бэйэтин уонна массыынатын дьэҥдьийии кэмигэр багажниктан кыракый эбисийээнэни булан ылбыттар. Суоппар массыына ыытар дастабырыанньата сымыйатын ааһан, урукку өттүгэр уруулга итирик олорон, хаста да түбэһэ сылдьыбыттаах эбит.
Эбисийээнэни хантан ылбытын, тоҕо илдьэ сылдьарын итирик суоппар кыайан быһаарбатах, полицейскайдар үлтү сахсыллан дөйүөрбүт кыылы айылҕа харыстабылын хамыыһыйатыгар туттарбыттар. Бу киһи сокуон иннигэр үс ыстатыйанан эппиэттээбит: массыынаны итирик сылдьан ыытыы, сымыйа дастабырыанньаны илдьэ сылдьыы уонна кыылга-сүөлгэ эмсэҕэлээһини оҥоруу иһин.
Индияҕа
Эбисийээнэ дьүһүнэ мөлтөҕүн көрүмэ -- Индияҕа сибэтиэй кыылларга киирсэр эбит. Инньэ гынан, тугу да оҥордуннар – кыһаллыбаттар эбит. Бэл диэтэр, “Обезьяны-воришки” (“Monkeys thieves”) диэн Джайпур куоракка уоруунан дьарыктанар эбисийээнэ баандатын туһунан 26 сиэрийэлээх сериал устубуттар.
Бу документальнай сериалы Нидерланды оператора Ричард Кирби устубут, композитор -- Уилл Слейтер. Баанда Гальта храмыгар итэҕэллээхтэр “кынаттарын анныгар”, көмүскэллээхтик олорор эбит. Ханумана диэн былыргы таҥараларыттан төрүттээх макака буолан, кинилэргэ сыһыан ураты. Ол эрэн, уһун-унньуктаах ардаҕы сөбүлээбэккэ, бу кыыллар храмтан куотан, Джайпур уулуссаларыгар тахсан, күннүүллэр-күөнэхтииллэр эбит. Кууруссаны уордуннар, банааны уордуннар, дьон таҥаһын да сойботтуннар, олохтоохтор тарбанан да көрбөттөр. Сибэтиэй кыыллар буоллаҕа!
Оттон Саха сиригэр, таҥара көмөтүнэн, эбисийээнэҕэ сыһыаннаах буруйдар бүгүҥҥү күҥҥэ диэри, бадаҕа, оҥоһулла иликтэрJ.
Комментарии
Авторизация на сайте через социальные сети