Ахсынньы 1-тан 6 күнүгэр диэри былааннаммыт араас тэрээһиннэр буоллулар. Нэдиэлэни аһар тэрээһин бибилиотекаҕа буолла. Манна кэлэр кыахтаах 8 киһи сырытта. “Доруобуйаҕа туһалаах сүбэлэр” диэн кинигэ быыстапката тэрилиннэ. Сэбиэдиссэй Иванова А. А. үс эбээн суруйааччытын - Платон Ламутскай, Андрей Кривошапкин, Василий Кейметинов - Барҕачаан айар үлэлтэн сырдатта, айымньыларын ырытта, Литература сылынан ыытыллар тэрээһиннэри сырдатта.
Доруобуйа харыстабылын бэтэрээнэ, СӨ доруобуйатын харыстабылын туйгуна, “Тэтим” түмсүү биир сүрүн тэрийээччитэ Кычкина Елена Григорьевна хамсаныы, хаамыы туһатын, сөптөөхтүк аһааһын, сынньаныы туһунан бэсиэдэ оҥордо, су - джок ньымаларыгар маастар кылаас ыытта.
“Кырдал” айар түмсүү салайааччыта Павлова А. С. түмсүү үлэтин-хамнаһын билиһиннэрдэ, “Тобуруокап көмүс күһүнэ» тэрээһиҥҥэ кыттыыларын туһунан кэпсээтэ.
«Талбаана» фольклор түмсүүтүн чилиэнэ Евсеева Т. Г. «Ыллыыр Мыраан» киһи айар дьоҕура аһыллыытыгар көмөтүн сырдатта. “Дайан” СК бэрэстэбиитэлэ Кычкин П. П. культурнай эйгэ үлэтин билиһиннэрдэ. Ааҕааччыларбыт итии үүттээх чэй иһэ-иһэ сэһэргэстилэр. Литература сылыгар анаммыт викторинаҕа кытыннылар.
Спорт саалатыгар өбүгэ үгэһин уонна атын омук оонньууларын пропагандалаатыбыт. Бу түһүлгэҕэ Анатолий Алексеев, Юрий Абрамов, Мария Пономарева, Евдокия Сметанина хабылык, хаамыска, дуобат оонньууларыгар табаарыстыы көрсүһүүгэ көхтөөхтүк кытыннылар.
Дьиэҕэ олорор араас көлүөнэ ааҕааччыларбытыгар сырыттыбыт. Социальнай эйгэ үлэтин, Литература сылыгар ананан ыытыллыбыт дьаһаллар тустарынан кэпсээтибит. Сөбүлүүр кинигэлэрин, хаһыаттарын тиэрдэн биэрдибит.
Мөлтөхтүк көрөр дьон библиотекаларыттан И. Им бөдөҥ шрифтээх анал кинигэлэри, нууччалыы литератураны уларсан аҕалан тустаах ааҕааччыларга аахтара сылдьар.
И. Им, библиотекарь
Комментарии
Авторизация на сайте через социальные сети