Хаҥалас улууһун култуураҕа уонна духуобунай сайдыыга информационнай – методическай уонна норуот айымьытын киинин үлэһиттэрэ Алтынньы 29 күнүгэр «Саргы түһүлгэтэ» култуура уонна норуот айымьытын киинигэр үтүө үгэскэ кубулуйбут ыйдарынан туомнаах оһуокайбыт, алтыс сылын Хотой Айыы таҥарабытыгар сүгүрүйүүттэн саҕаланна.
Бу сыл атырдьах ыйын 22 күнүгэр ыарахан ыарыы кэнниттэн, бу күн сириттэн, букатыннаахтык күрэммит Саха өрөспүүбүлүкэтин култууратын туйгунун , «Саха сирин үтүөлээх оһуокайдьыта», «Хаҥалас улууһун социальнай – экономическай сайдыытыгар кылаатын иһин » үрдүк бочуоттаах бэлиэлэр хаһаайынын , Давыдов Тимофей Федотовиһы санаан – ахтан аастыбыт.
Тыгын Дархан биир улуус бас билэр историята, личноһа эрэ буолбатах, кини – бүтүн норуоту түмпүт, государствоны олохтуурга дьулуспут өйдөөх – санаалаах, саха норуотун кэскилин иннигэр олоҕун анаабыт бүттүүммүт киэн туттуута буолар!
Кэлэр сылбыт улуус дьаһалтатын уурааҕынан Тыгын сылынан биллэриллэн, тэрээһиммит иккис чааһын “Тыгын кырдьаҕас саҕаттан ...”диэн ааттаан ыыттыбыт.
Бу күн кыттыыны ыллылар:
1.Федорова Раиса Викторовна Саха өрөспүүбүлүкэтин үөрэҕэриитин туйгуна,үөрэҕэрии бочуоттаах бэтэрээнэ, нучча тылын уонна литературатын учуутала, Тыгын туһунан сырдатта.
2..Г.В.Ксенафонтов аатынан кыраайы үөрэтэр музей фондаҕа салаатын сүрүн специалиһа Саха өрөспүүбүлүкэтин култууратын туйгуна Тимофеева Наталья Гаврильевна – слайда оҥорон Тыгыҥҥа аналлаах пааматынньык туһунан сырдатта.
4.Киин библиотекабыт тутаах үлэһитэ Саха өрөспүүбүлүкэтин култууратын туйгуна Колесова Валентина Николаевна Тыгыҥҥа аналлаах кинигэлэри сырдатта.
5.Сибиир норуоттарын “Эргиир” үҥкүүтүн фестивал бырайыак көҕүлээччитэ Саха өрөспүүбүлүкэтин үөрэҕэриитин, култууратын туйгуна, Саха өрөспүүбүлүкэтин култууратын үтүөлээх үлэһитэ, Василиса Егоровна Романова, Ийэ ууһун оһуокайын кэпсээтэ.
6. Нөмүгү нэһилиэгин «Тирэх» ветераннар түмсүүтэ салайааччы Кириллина Прасковья Дмитриевна.
«Тыгын Дархан» - Валерий Данилов тылыгар, Марфа Данилова мелодиятыгар , «Саха ырыата» Анимподист Сафронов тылыгар, Василий Протодъяконов музыкатыгар патриотическай ырыаларын «Тирэх» ансаамбыл өрө көтөҕөллүүлээхтик ыллаан уйан уйулҕабытын уһугуннардылар.
Эрчимнээх оһуокайы таһаардылар:
«Эркээни эдэр сааһа» народнай үҥкүү коллективын ветераан үҥкүүһүтэ, III – бүтүн союзтааҕы норуот айымньытын фестивалын лауреата, Хаҥаласка ыытыллыбыт олоҥхо ыһыаҕын Сибиир норуоттарын эргиир үҥкүүтүн дипломана Айталина Захарова Ийэ ууһун оһуокайын көрдөрдө, «Тирэх» ветераннар түмсүүлэрин баар – суох оһуокайдьыттара Пелагея Семенова, Ульяна Данилова.
Тэрээһин кыттыылаахтарыгар туоһу сертификат туттарылынна.
Алгыстаах оһуокайбытын үҥкүүнэн киэргэттилэр «Хаҥаласчаан» оҕо үҥкүү коллективын хоһуун уолаттара, салайааччы Саха өрөспүүбүлүкэтин үөрэҕэриитин туйгуна Наталья Михайловна Кузьмина.
Түмүккэ Хотой Айыы аһа чэй буоларын быһыытынан эмтээх отторунан дьарыктанар Маргарита Аввакумова айылҕа бэлэҕиттэн оҥорбут чэйин амсайдыбыт.
Олохтоох телевидениябыт кэлэн устан, интервью ылан, өйдөбүнньүк хаартыскаҕа түһэрэн бардылар.Төһө да реклама бардар хомойуох иһин бу сүдү суолталаах тэрээһиҥҥэ, салалта өттүттэн дьон кэлбэтэҕэ хомолтолоох.
Комментарии
Авторизация на сайте через социальные сети