Бу туһунан лааҕыр начальнига, Дьокуускай куоракка Саха гимназиятыгар шахмат куруһуогун салайар Степан Степанович Соров кэпсиир:
“Быйыл сүрүннээн Мэҥэ-Хаҥаластан, Чурапчыттан, Дьокуускайтан уонна Таатта улууһуттан муһуннулар. Шахматы сөбүлүүр, күрэхтэһиигэ кыттыбыт үөрүйэхтээх, ситиһиилээх оҕолор ордук сэргээн кэлэллэрэ үөрдэр. Лааҕырбыт аатыгар да этиллэрин курдук, манна толкуйдуур, айар дьоҕуру сайыннарар, спортивнай маастарыстыбаны үрдэтэр сыаллаах-соруктаах үлэлэһэбит. Иитээччилэр Ытык-Күөллээҕи оҕо спортивнай оскуолатын тренерэ Александр Иннокентьевич Попов, Мэҥэ Хаҥаластан эмиэ шахмат тренеринэн үлэлиир Гаврил Ильич Колосов оҕолору күн устата түөрт чаас бу оонньуу албастарыгар эрчийэллэр. Баһаатайбыт, Чычымах нэһилиэгин ыччатын лидерэ, спорт инструктора Надежда Николаевна Иванова, фельдшер Оксана Константиновна Бочонина үөрэнээччилэр чэгиэн-чэбдик доруобуйалаах буолалларыгар улахан кыһамньыларын уураллар. Айылҕаны кытта алтыһыннаран, сибиэһэй салгынынан дуоһуйа тыыннаран, сиэргэ-туомҥа тиийэ кэпсээн улаханнык интэриэһиргэтэллэр. Айылҕаны, көтөрү-сүүрэри кэтээн көрүү оҕолору чахчы улаханнык сэҥээртэ, сэргэҕэлэттэ. Маны сэргэ, сөптөөх хамсаныы киһи доруобуйатыгар туһатын күннэтэ оҥорор зарядкаларыттан үчүгэйдик биллилэр”.
Лааҕыр начальнига бэлиэтииринэн, өйү-санааны сайыннарар, билиини-көрүүнү хаҥатар викториналар, Дьаам хайатыгар айан, нэһилиэк бэлиэ миэстэлэрин көрүү-истии, «Көрдөөх стартар” бэһиэлэй күрэхтэһиилэртэн оҕолор улаханнык астыммыттар. Оттон кэмиттэн кэмигэр ыытыллар шахмакка блиц-турнирдар эдэр спортсменнарга туһалаах буолбуттара саарбахтаммат.
Маны таһынан, Ытык-Күөллээҕи лицей 10-с кылааһын үөрэнээччитэ, маастарга кандидат Семен Соров, оҕо спортивнай оскуолатын тренерэ Александр Иннокентьевич Попов шахмакка сеанс биэрбиттэрин оҕолор да, төрөппүттэр да улаханнык киэн туттан бэлиэтииллэр. Күн бүгүн лааҕырга сынньаммыт оҕолор үөрүүлэрин доҕотторугар кэпсииллэр, төрөппүттэр лааҕыр бары коллективыгар, нэһилиэнньэҕэ улаханнык махтаналлар. Манна оҕолор астына-дуоһуйа сынньаналларын сэргэ, доруобуйалара бөҕөргүүр, билиилэрэ-көрүүлэрэ хаҥыыр диэн тоһоҕолоон бэлиэтииллэр.
Итинтэн сиэттэрэн эттэххэ, бу лааҕыртан кынат анньынан үүнэн-сайдан тахсыбыт ыччаттар аҕыйаҕа суохтар. Холобур, Харбалаах орто оскуолатын выпускнига Алена Бурмистрова (Таатта) “Азия оҕолоро” норуоттар икки ардыларынааҕы спортивнай оонньууга, 2012 сыллаахха, шахмакка чемпионнаабыт. Эмиэ бу оскуоланы бүтэрбит Айсена Васильева эмиэ ити Оонньууга кыттан, төрдүс бочуоттаах миэстэни ылбыт, Семен Соров ситиһиилээхтик кыттыбыт. Аны ыытыллыахтаах “Азия оҕолоругар” кандидаттар бааллара эрэли күүһүрдэр. Күн бүгүн Тааттатааҕы лицей үөрэнээччитэ Айаал Посельскай, Ытык-Күөл 1 №-дээх орто оскуолатын үөрэнээччитэ Валя Егорова онно киирсэргэ турунан бэлэмнэнэллэр. Түгэнинэн туһанан, кинилэргэ ситиһиилэри, онтон лааҕыр үлэтэ сыллата сайдан, күүһүрэн, кэлэр өттүгэр элбэх чемпиону бэлэмнээн таһааралларыгар баҕарыаҕыҥ.
Комментарии
Авторизация на сайте через социальные сети