- Сквер икки сыл иһигэр бырайыактанан, Хара олохтоохторо анал акцияҕа бэйэлэрин кылааттарын киллэрсэннэр, Дьокуускайга концерт тэрийэннэр, тутуллунна.
- ‒ Эһиил сайын сквербит бүтүннүү оҥоһуллан бүтүөҕэ, ‒ диэн нэһилиэк баһылыга Дария Назарова билиһиннэрдэ. ‒ Сквергэ салгыы нэһилиэк 10 биллиилээх дьонун бюстара туруоруллуохтара, биир бастакынан быйыл балаҕан ыйыгар Харалыыр Хабырыыс бюһун туруоруохпут. Дьокуускайга Ботаническай садка мастары, декоративнай талахтары сакаастаатыбыт. Фонтан туруоруохпут.
- Кини өйдөөбүнньүк-пааматынньык авторыгар, харалар биир дойдулаахтарыгар скульптор Сергей Лукиҥҥа, бырайыагы олоххо киллэрсибит предприниматель Николай Яковлевка, тутуу биригээдэтин үлэһиттэригэр, акция кыттыылаахтарыгар махталын тиэртэ, тыыл ветераннарыгар Ытык ыһыаҕынан дьаһалта аатыттан өйдөбүнньүк бэлэхтэри туттарда.
- Россия Архитектордарын союһун чилиэнэ, пааматынньык автора Сергей Иннокентьевич оҥоһугун ис хоһоонун кэпсээтэ: «Ис көстүүтүгэр, көрөргүт курдук, өлбүт саллааттарга урут пирамида диэн оҥороллоро, ону «аһаҕас салгын» ньыматын тутуһан оҥордубут, тас өртүгэр сэрии ыар сылларын санатар алдьаммыт көмүлүөк оһоҕор майгыннаттыбыт, үөһээ өртүгэр хотой ‒ кыайыы символа олорор. Пааматынньык бэйэтэ тимиртэн, хотой боруонсаттан оҥоһулуннулар».
- Тэрээһиҥҥэ улуус баһылыгын бастакы солбуйааччы Павел Сазонов сылдьан, сквер бөһүөлэк киинин киэргэлэ буолуоҕа, харалар атын нэһилиэктэргэ Аҕа дойду Улуу сэриитигэр кыттыбыт биир дойдулаахтарын үйэтитиигэ үтүө холобур буоллугут диэн эттэ.
- Хараттан төрүттээх Дьокуускай олохтоохторун ааттарыттан СР Ил Дарханын уонна Правительствотын административнай-хаһаайыстыбыннай чааһыгар салайааччыны солбуйааччы Александр Попов тыл эттэ. Кини Дария Ивановна баһылыктыы кэлиэҕиттэн кэнники кэмҥэ Хара нэһилиэгэ биллэ сайынна, нэһилиэги тупсарыыга үгүс үлэ-хамнас ыытылынна диэтэ. Ветераннар сэбиэттэрин бэрэссэдээтэлэ Клавдия Исакова пааматынньыктарбытын, сквербытын харахпыт харатын курдук харыстыаҕыҥ диэн ыҥырда.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети