Оскуола үрдүкү кылаастарын үөрэнээччилэригэр профориентационнай үлэ сыллата кэҥиир, оҕолор төрөөбүт оройуоннарыгар туһалаах дьон буолалларыгар туһуланар. Үлэтэ суохтары социальнай адаптациялааһын, психологическай өйөбүлүнэн хааччыйыы тус сыаллаах программанан барар.
Бүгүҥҥү күн туругунан Кииҥҥэ үлэтэ суох 137 киһи учуокка турар, ол иһиттэн 91 киһи харчынан пособие ылар. Кэнники сылларга тэрилтэлэргэ үлэ миэстэтин сарбыйыы түмүгэр үлэтэ суох хаалбыт 16 киһи сыл бастакы аҥарыгар учуокка турбут. Балаҕан ыйыгар 4 киһи кэлэрэ күүтүллэр.
Үлэһит көрдүүр тэрилтэлэр Кииҥҥэ вакантнай миэстэлэри хото киллэрэллэр. Ол курдук, Муома орто оскуолатыгар 2 оробуочай, инженер-программист уонна нуучча тылын учууталын миэстэлэрэ баар эбит. «Арктика суоллара» АО Муоматааҕы филиалыгар бары категорияларга эппиэттиир универсал суоппар наада буолбут. Оттон оройуоннааҕы киин балыыһаҕа нарколог-быраас вакансията тахсыбыт.
Дьарыктаах буолуу Муоматааҕы киинэ атын тэрилтэлэри кытта биир ситимнээх үлэни ыытар. Ол курдук, хаһыс да сылын олох-дьаһах коммунальнай хаһаайыстыбатын кытта ыкса сибээстээхик үлэлээн кэллэ. Үлэтэ суох дьону дьарыктааһыҥҥа киин нөҥүө специалистар кэлэн үлэлэһэллэр, араас идэҕэ уһуйаллар. Онно үөрэнэллэригэр миэстэни булууга коммунальнай хаһаайыстыба салалтата улахан өҥөлөөх. Бу күннэргэ дуогабар быһыытынан Намтан, “Эрэл” үөрэтэр киинтэн А.К. Фадеева кэлэн, дьарыктаах буолуу киинин иһинэн 5 үлэтэ суох дьахтары, оҕолорун көрөн олорор 2 дьахтары, 1 пенсионеры үөрэтэ сылдьар. Киниэхэ эбии таһыттан харчы төлөөн 6 киһи үөрэнэр. А.К. Фадеева дьахталлары бортунуой (закройщик уонна иистэнньэҥ холбуу үөрэхтэрэ) идэтигэр уһуйар. Сардаана Афанасьевна манна хаһыс да сылын үөрэнэр кабинетынан хааччыйан, үлэтэ суохтары идэҕэ үөрэтиигэ усулуобуйаны тэрийэр ОДьКХ салайааччытыгар Владислав Германович Калугиҥҥа тэрилтэтин аатыттан махталын этэр.
Маны таһынан дьарыктаах буолуу оройуоннааҕы киинэ коммунальнай хаһаайыстыбаны кытта дуогабардаһан үлэтэ суох 3-с группалаах инбэлиити столяр үөрэҕэр үөрэттэрдэ. Кини Дьокуускайдааҕы интернат-лицейи бүтэрэн оройуоннааҕы ОДьКХ-ҕа үлэҕэ киирдэ. Столяр идэтин ылбыт инбэлиит үлэтин чэпчэтэргэ анаан дьарыктаах буолуу кииниттэн 65 тыһ. солк. көрүлүннэ.
Бу сайын устата Киин оройуон үрдүнэн 31 үөрэнээччини волонтерскай үлэҕэ кытыннарда. Оҕолор сайыҥҥы уһун сынньалаҥнарын кэмигэр Муома, Төбүлэх национальнай нэһилиэктэригэр, Индигир агро-оскуолатыгар, коммунальнай хаһаайыстыбаҕа үлэлээтилэр. Манна Муома оройуонун дьаһалтатыттан 51 тыһ. 680 солк. көрүллэн, эбии 16 оҕону үлэлэтэр былааннаахтар. Волонтердарга үгэс быһыытынан элбэх оҕолоох, кыра дохуоттаах дьиэ кэргэн оҕолорун ылаллар.
Волонтердар Муома национальнай нэһилиэгэр (баһылык А.В. Андреев) бөһүөлэги тупсарыыга, уулуссалары ыраастааһыҥҥа, Кыайыы болуоссатын көрүүгэ-харайыыга, кырааскалааһыҥҥа, Суон Тииккэ хаппыыста бааһынатыгар үлэлээтилэр, «Кэнчээри» оҕо саадын ойоҕоһугар турар цветниккэ уу куттулар.
Общественнай үлэнэн быйыл 30 киһи хабылынна. Ол иһигэр Улахан Чыыстай нэһилиэгэр ― 8 киһи. Кинилэр өрөмүөҥҥэ, бөһүөлэк иһин ырааһырдыыга, о.д.а. сырыттылар. Икки киһиэхэ бэйэ дьыалаларын аһалларыгар 164 тыһ. солк. көрүлүннэ. Кинилэртэн биирдэстэрэ уһанар мастарыскыайы үлэлэтиэ, атына землеустроительствонан дьарыктаныа. Биир эдэр уол үлэ биэрээччи сакааһынан суоппар идэтин баһылаан кэлэн үлэҕэ киирдэ. Уопсайа дьарыктаах буолуу киинин актыыбынай политикатыгар 574 тыһ. солк. туттулунна.
Ити курдук, дьарыктаах буолуу киинэ дьон бары үлэлээх-хамнастаах буолалларын туһугар дьоһуннаах үлэни ыытар. Эһиил 2016 с. Российскай Федерацияҕа дьарыктаах буолуу сулууспата тэриллибитэ үйэ чиэппэрэ ― 25 сыла бэлиэтэниэ. Бу сулууспа 1991 с. муус устар 19 күнүгэр тэриллибитэ.
Комментарии
Авторизация на сайте через социальные сети