Биллэрин курдук, 2013 сыл ахсынньы 5 күнүгэр Саха Өрөспүүбүлүкэтин Судаарыстыбаннай Мунньаҕа (Ил Түмэн) «Саха Өрөспүүбүлүкэтигэр итирдэр утахтары атыылааһын бириэмэтигэр, усулуобуйатыгар, атыылыыр миэстэтигэр эбии хааччаҕы олохтуур туһунан ” 1248-З 51-V №-дээх СӨ сокуонун ылыммыта. Сокуоҥҥа сөп түбэһиннэрэн, арыгыны атыылааһын олохтоох бириэмэнэн 20 чаастан 14 чааска диэри атыыланара бобуллубута.
Салгыы бу ылыллыбыт сокуон 1 уонна 2 ыстатыйаларыгар Ил Түмэн 2015 cыл бэс ыйын 17 күнүгэр 1486-З 529-V №-дээх СӨ сокуонунан уларытыылары киллэрбитэ. Ол курдук, 2015 сыл атырдьах ыйын 1 күнүттэн элбэх квартиралаах олорор дьиэлэргэ баар атыы-эргиэн кииннэригэр, ону сэргэ ити дьиэлэргэ сыста тутуллубут маҕаһыынарга итирдэр утахтары атыылаһын көҥүллэммэт буолбута. Итиэннэ рестораннартан ураты кафеларга, баардарга арыгыны атыылааһын олохтоох бириэмэнэн 20 чаастан 14 чааска диэри бобуллубута.
Олорор дьиэлэр аллараа мэндиэмэннэригэр баар дьоҕус маҕаһыыннарга аҕыйах, аатыгар эрэ табаардаах, сүрүннээн арыгы уонна пиибэ атыылыыр маҕыһыыннары үгүстүк көрүөххэ сөп. Ол курдук, аһылык маркеттарыгар арыгыны атыылаан барыстанар, атын табаардарын хаачыстыбатыгар уонна эгэлгэтигэр улаханнык болҕомто уурбат предпринимателлэр бу сокуон олоххо киирбитигэр интэриэстэрин хаарыйтарбыттара. Биллэн турар, итинник усулуобуйаҕа «күөх моҕойу” сиэрэ суох аһары тарҕатыы, соҥнооһун уонна онтон барыһы ылыы нэһилиэнньэ доруобуйатын улаханнык айгыратар, охсуу оҥорор, социальнай кутталы үөскэтэр.
Көһүппүт курдук, туһааннаах сокуону үлэлэтиини уонна сокуоҥҥа эбии уларытыыны киллэриини эргиэн сорох бэрэстэбиитэллэрэ ылыммакка, бэйэлэрин «кырдыктарын» суут көмөтүнэн быһаарсарга быһаарыммыттара. Саҥа сокуоҥҥа уларытыы киирэ илигинэ, гражданин П. Саха Өрөспүүбүлүкэтин Үрдүкү суутугар үҥсүү түһэрэн турар. Кини ылыллыбыт сокуон федеральнай сокуону утарар диэн төрүөттээбит уонна атыылаһааччы быһыытынан бэйэтин тус бырааба күөмчүлэнэрин ыйбыт.
Саха Өрөспүүбүлүкэтин Үрдүкү Суута 2015 сыл олунньу 10 күнүгэр сайабылыанньалаах гражданин ирдэбилин кытта сөпсөспөккө, регион сокуона утарсыылаах диэн түмүк оҥорорго ханнык да төрүөт суоҕун дакаастаабыта.
Өрөспүүбүлүкэ Үрдүкү Суутун быһаарыытын Россия Федерациятын административнай дьыалаларга коллегията өйөөн туран, 2015 сыл бэс ыйын 6 күнүгэр СӨ Үрдүкү Суутун 2015 сыл олунньу 10 күнүнээҕи быһаарыытын уларыппат туһунан түмүк таһаарбыта.
Суукка атын үҥсүүлэр эмиэ киирбиттэрэ. Ол курдук, аны хааччахтаммыт эппиэтинэстээх икки тэрилтэ – “А” уонна “Т” көмөлөөн Үрдүкү Суукка ирдэбил түһэрбиттэрэ. Онно кинилэр өрөспүүбүлүкэҕэ итирдэр утахтары атыылаһын бириэмэтигэр уонна миэстэтигэр эбии хааччахтааһын олохтоммута бу федеральнай сокуоннары кэһэр диэн төрүөттүү сатаабыттар.
Саха Өрөспүүбүлүкэтин Үрдүкү Суута 2015 сыл атырдьах ыйын 25 күнүгэр сайабылыанньалаахтар үҥсүүлэрин көрөн баран, суукка Ил Түмэн уонна Ил Дархан бэрэстэбиитэллэрин быһаарыыларын истэн баран, «А.” уонна “Т.” ХЭТ-тар сайабылыанньаларын ылыммата, аккаастаата.
Маныаха Саха Өрөспүүбүлүкэтин Үрдүкү Суута арыгыны хааччахтыыр сокуон өрөспүүбүлүкэ гражданнарын доруобуйаларын, бырааптарын көмүскүүр сыаллаах Россия субъегар бэриллибит боломуочуйа иһинэн ылыллыбытын, онон федеральнай сокуон балаһыанньаларын ханан да кэспэтин, утарбатын туһунан түмүк оҥордо.
«Баар кыһалҕаны аҥардастыы бопсор дьаһалларынан тута ыллыҥ да, быһааран кэбиспэтиҥ чуолкай. Ол быһыытынан уопсастыбаҕа чөл олох бигэтик киириитигэр өрөспүүбүлүкэ парламена төһүү күүс буолан, уһун болдьохтоох быһаарыылары ылынарын өйдүөххэ наада. Арыгыны хааччахтыыр сокуоннар ол быһаарыылартан биирдэстэрэ буолар. Биһиги бүттүүн күүһүнэн - былаас, уопсастыстыба, биирдиилээн дьон норуоппут доруобай буоларын, инникибит туһугар дьаныардаах уонна утумнаах үлэни ыытабыт. Ол суолбутун бигэтик тутуһуохпут», -- диэн Ил Түмэн бэрэссэдээтэлэ Александр Жирков.
Комментарии
Авторизация на сайте через социальные сети