СӨ Эконимикаҕа миниистиэристибэтэ Амма улууһугар 2018 сылга диэри ыытыллыахтаах үлэни-хамнаһы торумнаста

Мунньахха экономикаҕа миниистири бастакы солбуйааччы Майя Данилова, миниистири тутууга солбуйааччы Данил Саввинов, АПК сайдыытын департаменыттан Сардаана Борисова, инфраструктура уонна транспорт сайдыытын департаменыттан Иван Николаев, социальнай сайдыы департаменыттан Диана Куборова уонна Амма улууһун салалтата, нэһилиэктэр баһылыктара, управлениелар салайааччылара кытыннылар.

Майя Данилова кылгасты кэкономика туругун сырдатта. Онно дойду үрдүнэн буола турар кириисис олоххо-дьаһахха сабыдыала, итиниэхэ СӨ экономиката куһаҕана суох туруктааҕа бэлиэтэннэ. Ол курдук бырамыысылыннас көрдөрүүтэ 11%, ньиэби хостооһун 6.8%, таас чоҕу хостооһун 4.3% үрдээбитин иһитиннэрдэ. Тыа хаһаайыстыбатынан эрэ дьарыктанар улуустарга, бүддьүөт кырыымчыгынан үп-харчы тиийбэтин ыйда. Дьоҕус уонна орто биисинэскэ кириисиһи утары тутуллар миэрэҕэ болҕомто күүскэ ууруллуоҕа диэн эттэ . Кэлэр сылларга Иран ньиэбэ аан дойду ырыынагар атыыга таҕыстаҕына, ньиэп сыаната барыллаан 40 долларга тиийэ түһүөн сөп. Оччотугар дойдуга тастан киирэр дохуот аччыыра сабаҕаланар. Онон бүддьүөт оросхуоттуур чааһа кыччыахтааҕын ыйда.
Баһылыгын бастакы солбуйааччыта Петр Лебедев улууска баараҕай тутуулар тэтимнээхтик баралларын атахтыыр икки сүрүн мэһэй баарын ыйда. Ол улууска электро-уот күүрүүтэ кырата уонна суол туруга мөлтөҕө буолар. Ити боппуруостары быһаардахпытына, улууска сайдыы тэтимэ түргээтиирэ чуолкай. Салгыы Аммаҕа тутулла турар 200 миэстэлээх оҕо уһуйаанын дьиэтин быйыл үлэҕэ киллэрэр, Абаҕа, Өнньүөс нэһилиэктэригэр оҕо уһуйааннара аварийнай туруктаахтарынан саҥа дьиэни тутуу, Бөтүҥ орто оскуолатын тутуутун саҕалыырыбиир сылынан эрдэлэтии, 2018 сылга ыытыллар спартакиада объектарын бырайыактыыр үлэлэрин хойутаппакка саҕалыырга уонна онно сөптөөх харчыны көрөр туһунан боппуруостары дьүүллэстилэр. Амма нэһилиэгин баһылыгын солбуйааччы Сергей Соломонов Спартакиаданы көрсө Аммаҕа водопровод кириитин туруоруста.

Улуус салалтатыгар туһаайан Майя Данилова: „Спартакиаданы үбэ бигэргэнэ илик. Улуус тэрээһини үрдүк таһымҥа ыытыан баҕарара өйдөнөр, биһиги төһө кыалларынан өйүөхпүт, ол эрээри бүддьүөт кыаҕын иһинэн эрэ үп көрүллүөҕэ. Федеральнай үбүлээһин промышленнай эрэ производсвоҕа баарынан 110 киловаттаах электро-уот ситимин улууска тардыы уустуктардаах буолуоҕа. Итиннэ атын хайысхаларынан харчыны буларга үлэлэһиэхпит. Аммаҕа 2018 сылга Спартакиада ыытылларынан сибээстээн, республикатааҕы суол реконструкциятын өйүөхпүт. Онтон Абаҕа уонна Өнньүөс нэһилиэктэригэр оҕо уһуйаанын дьиэтин тутуу „Үтүө дьыала“ программаҕа киирдэҕинэ эрэ кыаллыа. Аммаҕа водопровод сайыҥҥы эрэ көрүҥэ оҥоһуллуон сөп», - диэн эттэ.
Кини Амма уонна Бөтүҥ дьаһалталара „Благоустройсво поселений“ диэн республикатааҕы куонкуруска кыттан граҥҥа тиксибиттэрин хайҕаан бэлиэтээтэ. Атын да нэһилиэктэрбит итинник ситиһиилээхтик кыттан иһэллэрэ буоллар, кириисис кэмигэр бүддьүөккэ улахан көмө буолуо этэ.

Мунньахха СӨ социальнай-экономическэй сайдыытыгар киллэрбит үтүөлэрин иһин „СӨ экономикаҕа министиэристибэтин туйгуна“ бэлиэнэн ФКУ салайааччыта Наталья Ефремова, Бөтүҥ нэһилиэгин баһылыгын социальнай боппуруостарга солбуйааччы Тамара Давыдова уонна Соморсун нэһилиэгин дьаһалтатын кылаабынай буҕаалтыра Мария Иванова наҕараадаланнылар. СӨЭкономикаҕа министиэристибэтин Махтал суруга үөрэх управлениетын начальнигын үп боппуруостарыгар солбуйааччы Анна Кутургуинаҕа, Абаҕа нэһилиэгин дьаһалтатын экэнэмииһэ Евгений Ефимовка уонна „Амма“ ТХПК кылаабынай буҕаалтыра Эльвира Соловьеваҕа туттарылынна.