Улуу Кыайыы 70 сылын чэрчитинэн, улуус бэтэрээннэригэр анаан тэриллибит ыһыах, Намтан 10 км тэйиччи сытар Сиэникий диэн кырдьаҕастар сайынын сынньанар сирдэригэр тэрилиннэ. Бары нэһилиэктэн 20-тэн 40-на, 50-га тиийэ киһи сырытта.
Бу туһунан биһиэхэ Хамагатта олохтооҕо, нэһилиэк иһинэн тахсар «Саҥа саҕахтар» хаһыат эрэдээктэрэ Мария Винокурова кэпсээтэ.
-- Бэтэрээннэргэ анаммыт ыһыаҕы улуус, нэһилиэктэр дьаһалталара уонна Софья Кобякова бэрэссэдээтэллээх улуус бэтэрээннэрин Сэбиэтэ тэрийэн, иилээн-саҕалаан ыыттылар. Күүтүүлээх бырааһынньыкпыт тэрээһинэ олус табыллыбыт, үчугэй буолан, ыалдьыттар бары астыннылар, бары күрэхтэһиилэргэ, куонкурустарга көхтөөхтүк кытыннылар.
Биһиги нэһилиэкпититтэн 40-тан тахса бэтэрээни «Күбэй» общественнай түмсүү уонна нэһилиэк баһылыгын солбуйааччы Касьян Олесов салайан илдьэ сырыттылар. Түһүлгэни киэргэтиигэ А.Иванова туос иһиттэрин, А.Гоголева саха дьахтара иистэнэр иһиттэрин аҕалбыттара ураты кэрэ, үчүгэй көстүүнү биэрдилэр, тупсардылар. Атын нэһилиэк дьоно кэлэн астына көрдүлэр, хайҕаатылар. Сахалыы таҥас-сап маанытын биһиги нэһилэк аатыттан Н.Индеева көрдөрөн дохсун ытыс тыаһынан арыалланна. «Айыы аһа» диэн саламаат күрэҕэр саламаатчыт ааттаахтара Валерий Максимов уонна Людмила Петрова кытыннылар.
Онтон «Саха дэлэгэй аһа» куонкуруска хамагатталар сахалыы ас 30-ча арааһын түһүлгэ сандалытыгар дэлэччи тардан кэбистибит. Манна дырыһааҥкыттан саҕалаан, кииһилэлээх саламаакка, көбүөрдээх лэппээскигэ, баахылага, о.д.а. тиийэ баар. Маны сэргэ, «Күбэй» түмсүүбүт кыттыылаахтара «Көмүс сүүтүк» диэн иистэнньэҥ эбээлэр үҥкүүлэрин толорон көрөөччү уонна дьүүллүүр сүбэ биһирэбилин ылыахтарын ыллылар.
Ити курдук, бары нэһилиэктэр аҕа саастаахтарыгар күөҕү көрдөрөн, ыһыах кымыһынан, үтэһэлээх этинэн күндүлээн, сибиэһэй салгыҥҥа сынньатан, ыһыах бары тэрээһинигэр кытыннаран улаханнык астыммыттарын туһунан Мария Григорьевна үөрүүтүн үллэһиннэ. Онтон ытык-мааны кырдьаҕастар, кинилэри көрөн-истэн илдьэ сылдьыбыт салайааччыларыгар, нэһилиэк дьаһалтатыгар махтаналлар. «Эһиилги ыһыахха эмиэ бу билиҥҥибит курдук сылдьыбыт киһи баар ини. Ыһыах буоллаҕа, уһун кыһыны туораан саастыылаахтар көрсөр, ирэ-хоро сэһэргэһэр, дьону-сэргэни кытта чугастык билсэр бырааһынньыкпыт», -- дэһэллэр кинилэр.
Комментарии
Авторизация на сайте через социальные сети