Хоту улуустарга итиини өссө атырдьах ыйыгар биэрбиттэрэ. Ол курдук, Аллайыахаҕа оттук сезона атырдьах ыйын 1 күнүттэн саҕаламмыта. Булуҥ улууһугар хочуолунайдар, этэргэ дылы, сайыннары үлэлээбиттэрэ. Онтон атын хотугу улуустарга атырдьах ыйын 25-28 күннэриттэн хочуолунайдар үлэлээн, социальнай тэрилтэлэргэ уонна дьиэлэргэ итиини биэрдилэр.
Атырдьах ыйын 30 күнүнээҕи туругунан өрөспүүбүлүкэ бары улуустарыгар хочуолунайдар оттулуннулар. Дизельнэй уматыгынан үлэлиир 125 станция өрөмүөннэнэн, бэлэм буоллулар.
Кэлиҥҥи кэмҥэ ОДьКХ уонна энергетикаҕа министиэристибэтэ саҥа хочуолунайдары тутууга болҕомтону ууран, быйыл итиинэн хааччыйар 54 объект үлэҕэ киирэрэ былааннанар. Ол курдук, 23 саҥа хочуолунай тутуллуоҕа уонна 29 хочуолунай саҥардыллан оҥоһуллуоҕа.
Хочуолунай оттугун улуустарга тиэйии-таһыы куһаҕана суоҕа бэлиэтэннэ. Дизельнэй станциялар оттуктара 100 %, таас чох 93 %, сиикэй ньиэп 74 % миэстэтин булла. «Мантан хаалбыта балаҕан ыйын бүтүөр диэри туһааннаах сирдэригэр тиэрдиллиэҕэ», – диэтэ Гаврил Левин.
Үс-түөрт сылтан бэттэх өрөспүүбүлүкэҕэ оттук сезона эрдэ саҕаланар буолла. Урукку сылларга омуна суох эттэххэ, алтынньы саҕана итии биэриллээччи. Бу – коммунальнай хаһаайыстыбаҕа сыллааҕы чопчу былаан ылыныллан, ону олоххо киллэриигэ сөптөөх үлэ ыытыллар буолбутун туоһулуур.
Ил Дархан Егор Борисов тыйыс усулуобуйалаах регионнарга оттук сезонун эрдэ саҕалыыр туһунан федеральнай таһымҥа туруорсубутун түмүгэр, манна кэккэ уларыйыылар киирдилэр.
РФ ОДьКХ уонна тутууга министирин солбуйааччы, олорор дьиэни көрүүгэ кылаабынай судаарыстыбаннай инспектор Андрей Чибис: «РФ регионнарын туруорсууларынан коммунальнай өҥөнү оҥорууга кэккэ уларытыыны киллэрдибит. Ол курдук, мантан инньэ регионнар оттук сезонун хаһан саҕалыылларын уонна хаһан түмүктүүллэрин аны бэйэлэрэ быһаарыахтара. Бу тыйыс усулуобуйалаах сирдэргэ олус көдьүүстээх буолуоҕа диэн эрэнэбин», – диэн эппит.
Онон коммунальнай хаһаайыстыба өҥөтүгэр бу уларыйыы киирбитэ тыйыс айылҕалаах өрөспүүбүлүкэ олохтоохторун дьиэлэригэр итии эрдэ бэриллэригэр улаханнык көмөлөстө.
Комментарии
Авторизация на сайте через социальные сети