Бу мунньахха уонна Хабаровскай кыраай губернатора Вячеслав Шпорт, Россия Президенин Уһук Илиҥҥэ федеральнай уокуругун боломуочунай бэрэстээбитэлин солбуйааччыта Андрей Мотовилов, Россия Генеральнай прокурорун солбуйааччыта Юрий Гулягин кыттыыны ыллылар.
Манна Уһук Илин регионнарыгар киһи быраабыгар боломуочунайдар судаарыстыба уорганнарын кытта бииргэ үлэлээһиннэрин боппуруостара уонна киһи быраабын көмүскээһин хайысхатыгар билиҥҥи кэмҥэ сытыытык турар кыһалҕалар дьүүллэһилиннилэр.
Уһук Илин федеральнай уокуруктааҕы Киһи быраабыгар боломуочунайдар Сүрүннүүр сүбэлэрин салайааччы, Хабаровскай кыраай Боломуочунайа Юрий Березуцкай уокурук биирдиилээн регионнарыгар бу институт хайдах тэриллэн уонна салгыы сайдан иһэрин туһунан иһитиннэрии оҥордо. Итини таһынан Саха Өрөспүүбүлүкэтигэр Киһи быраабыгар боломуочунай Алексей Ефимов уонна кини коллегалара Ирина Орлова (Камчатка кыраайа) уонна Валерий Розов (Приморскай кыраай) эмиэ иһитиннэрии оҥордулар.
Саха сирин омбудсмена бэйэтин дакылаатыгар быраабы араҥаччылыыр уонна суут уорганнарын кытта бииргэ үлэлиир уопутун үллэһиннэ.
Элла Памфилова бэйэтин этиитигэр быйыл саас федеральнай сокуоҥҥа киирбит регионнардааҕы киһи быраабыгар боломуочунайдар бырааптара лаппа кэҥэтиллибитин уонна олохтоох былаас уорганнара онно сөп түбэһиннэрэн бэйэлэрин сокуоннарыгар уларытыылары киллэриэхтээхтэрин туһунан ыйда. Бастатан туран боломуочунайдар дьиҥ чахчы кимтэн да тутулуга суох буолуулара сокуонунан хааччыллыахтаах диэн кини тоһоҕолоон бэлиэтээтэ.
Сүбэ мунньах кыттыылаахтара киһи быраабыгар боломуочунайдар судаарыстыба уорганнарын кытта бииргэ үлэлээһиннэрин уопутун, бу кэлиҥҥи кэмҥэ үөскээбит саҥа уорган салгыы сайдыытын саҕахтарын уонна проблемаларын ырытан көрөн баран бу боппуруостар дьон бырааптарыгар уонна көҥүллэригэр уонна онтон сиэттэрэн хас биирдии регион салгыы сайдыытыгар олус туһалааҕын бэлиэтээтилэр.
Мунньах кэнниттэн Элла Памфилова Хабаровскай кыраай Уопсастыбаннай кэтээн көрөр хамыыһыйатын үлэтигэр баар кыһалҕаларга анаммыт “төгүрүк остуолга” сырытта. Мунньахха боломуочунайдартан ураты Хабаровскай кыраай прокурора, ис уорганнар уонна накаастабылы толоруу сулууспатын салайааччылара кытыннылар. Хамыыһыйа чилиэннэрэ Федеральнай боломуочунайга баар кыһалҕалары кэпсээтилэр: үлэлиир хаайыылаахтар хамнастара олус намыһаҕын, холуонньаларга баар маҕаһыыннарга бородуукта сыаната оруна суох үрдүгүн эҥин туһунан.
Сүбэ мунньахха үөһээ ыйыллыбыт боппуруостары ырытыы уонна судаарыстыба таһымыгар салгыы ити кыһалҕалары сүрүннээһин киһи быраабыгар боломуочунайдар институттара салгыы сайдарыгар уонна бөҕөргүүрүгэр олук буолуо.
Мунньах уурааҕа Уһук Илиҥҥи федеральнай уокурукка баар Россия Федерациятын субъектарын салалталарыгар уонна федеральнай уорганнар бу территорияларга баар уорганнарыгар ыытыллыаҕа.
“Саха Өрөспүүбүлүкэтигэр Киһи быраабыгар
Боломуочунай уонна кини аппараата”
Судаарыстыба уорганын пресс-сулууспата
Комментарии
Авторизация на сайте через социальные сети