- Бу ыраас ууну оҥорор станциялаах сайыҥҥы уу ситимин сүрүн объегын үөрүүлээх арыллыытыгар элбэх үтүө тыл этилиннэ
- - Биһиэхэ уу – тыын боппуруоспут. Иһэр уубут хаачыстыбата мөлтөҕүнэн, сайыҥҥы уу ситимин туруорсубуппут, ол олоххо киириитигэр В.Т.Лукин үтүөтэ-өҥөтө улахан. Бырайыагы «Агро-мелиопроект» оҥорон биэрбитэ, тутуу уопсай суумата 14 мөл. солк. буолбута, онтон 4 мөл. солк. улуус уонна олохтоох муниципальнай тэриллии уйуммуттара, - диэн үлэ-хамнас хайдах саҕаламмытын нэһилиэк баһылыга С.С.Григорьев кэпсиир.
- - Министерствоҕа үлэлии олордохпуна, Кыргыдай саҥа баһылыга С.С.Григорьев «Сэлиэнньэҕэ ыраас ууну оҥорор станцияны кытта сайыҥҥы уу ситимин тардарга министерство программатыгар хайдах кыттыахха сөбүй?» диэн киирбитигэр, ити дьыалалары дьаһайар коллегабар А.Г.Копыриҥҥа киллэрэн кэпсэтиннэрбитим уонна дойдубар киириэн наада диэн этиммитим. Коллегабытыгар билигин махтаныах эрэ кэриҥнээхпит. Баһылык үлэлэһэн - бырайыагын бэлэмнээн, экспертизатын ыыттаран, үбүн-харчытын туруорсан уу ситимэ үлэҕэ киирэр үөрүүлээх күнэ үүннэ. Ситими, станцияны таҥмыт «Байылыат» тэрилтэ уустук уонна дьоһуннаах үлэни оҥордо. Маннык бырайыак улууска суох, республикаҕа да аҕыйах буолуо дии саныыбын, - диэн улуус дьаһалтатын баһылыгын бастакы солбуйааччы В.Т. Лукин бэлиэтээтэ.
- Тыа сиригэр быһаччы үлэлэһэр улахан тэрилтэнэн «Байылыат» атыы-эргиэн киинэ буолар. Бу тэрилтэ үс сэлиэнньэҕэ, куоракка 9 сайыҥҥы уу ситимин тардан, чэпчэки сыанаҕа тутуу матырыйаалын тиэрдэн биэрбитэ, тыа сиригэр олох хаачыстыба өттүнэн тупсарыгар кылаатын киллэрэр.
- - Кыргыдайга уу ситимин тардыыга үлэлээбиппит үһүс сыла буолла. Үбэ-харчыта быһаарылла илигинэ, 2012 сыллаахха турба, матырыйаал таһааран бэлэмнээбиппит, 2013 сылга күһүн станцияны кытта барытын биирдэ оҥорор курдук үлэлээбиппит, 2014 сылга сайынын ситэрэн биэрэн күһүн үлэлэтэн көрбүппүт, - диэн «Байылыат» атыы-эргиэн киинин салайааччыта К.Х.Егоров үлэни-хамнаһы кэпсээтэ.
- Бу күн элбэх Махтал сурук туттарылынна, үтүө тыл этилиннэ. Баһылык солбуйааччыта М.Е.Осипова, ветераннар Н.Е.Егоров, С.В.Наумов уо.д.а. элбэх үлэ ыытыллыбытын, ыраас уу –олох төрдө буоларын бэлиэтээтилэр. Алгыс сиэрин-туомун кэннэ кыһыл лиэнтэни улуус дьаһалтатын баһылыга В.Т.Лукин, Кыргыдай нэһилиэгин баһылыга С.С.Григорьев, «Байылыат» атыы-эргиэн киинин салайааччыта К.Х.Егоров быстылар.
- Кыргыдайга тардыллыбыт уу ситимэ икки чаастан – сэлиэнньэҕэ тиийэр водопроводтан уонна иһэр ууну ыраастыыр станцияттан - турар. Сэлиэнньэ устун кыһыннары тоҥмот 9 км усталаах пластик турба ууруллубут. Туһанааччыга тиийэр уу баттааһыннаах буоллун диэн 6 м үрдүктээх, 16 куб иэннээх, күҥҥэ үстэ-түөртэ туолар водонапорнай башня анныгар бырайыагы уларытан кыахтаах насос туруоруллубут. Түмүгэр ыаллар уһаайбаларыгар, оҕуруоттарыгар ууну ыстарар, эргийэ турар уунан ыһыахтыыр тэриллэри туруорар кыахтаналлар. Водонапорнай башня уунан туоллаҕына күөлгэ үлэлии турар носуос автоматика көмөтүнэн арахсар. Сэлиэнньэҕэ үс сиргэ баһаары утары гидрант туруоруллубутун ахтыахха сөп. Ити эмиэ «бырайыагы тупсарыы» буолбут.
- Кыргыдайдар муус ылыахтарыгар диэри ыраас ууну станцияттан ылар кыахтаахтар - станция дьиэтэ, оборудованиета кыһыннары үлэлииргэ бэлэм гына оҥоһуллубут.
- Ыраас ууну бэлэмниир станция дьиэтэ капитальнай оҥоһуулаах, иһигэр икки емкость турар, бииригэр күөлтэн кэлэр уу, иккиһигэр – ыраас уу мунньуллар. Уу үс түһүмэхтээх ыраастыыр фильтрдэри ааһар. Бу фильтрдэр уһун үйэлээхтэр, бэйэлэрэ ыраастаналлар. Саамай дьиктитэ, ууга ханнык минеральнай эттик тиийбэтин автоматика бэйэтэ быһааран, холобура, фтор тиийбэт буоллаҕына эбэн биэрэр эбит. Уу ульрафиолетынан ыраастаныллар, онтон минньигэс амтаннаах ыраас уу тахсар. Амсайан көрбүппүт!
- Билигин Кыргыдай эмис соботун, сүөһүтүн этин тэҥэ «Кыргыдай мэҥэ уута» диэн бренд буолар кыахтаах иһэр ыраас уу баар буолуоҕа.
- Кэлиҥҥи сылларга Кыргыдайга дьон олоҕун таһымын үрдэтэргэ түмүктээх үлэ ыытылларын бэлиэтиир тоҕоостоох. Аҕыйах сыллааҕыта манна киин котельнай үлэҕэ киллэриллэн, олорор дьиэлэри кииннэммит ититэр ситимҥэ холбооһун саҕаламмыта.
- Тыа сирин олоҕун тупсаҕай оҥоруу итинэн эрэ муҥурдаммат – кыргыдайдар дьиэлэригэр душ, туалет киллэрэргэ туруна сылдьаллар. Былырыын күһүн ититии ситимин кытта тымныы уу турбата холбуу таҥыллыбыта. Тыа сиригэр дьон-өйүн санаатын уларытар техническэй «өрөбөлүүссүйэ» олоххо итинник киирэ турарыгар эрэниэххэ…
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети