Ахсынньы 22 күнүгэр РФ Накаастабылы толорор федеральнай сулууспатын Саха сиринээҕи управлениетын хонбуойдааһыҥҥа отделын дьиэтигэр мемориальнай дуоска ыйанна. Бу дьиэҕэ өрөспүүбүлүкэ холуобунай-исполнительнай систиэмэтин историятыгар анаммыт музей баар. Оттон музейы төрүттээччинэн бу систиэмэҕэ сулууспатын 1953 сылтан саҕалаан, олоҕун бүтүннүү анаабыт Дмитрий Федоров буолар. Кини билигин баара буоллар, ахсынньы 21 күнүгэр 83 сааһын туолуохтаах этэ...
Дмитрий Захарович биэнсийэҕэ да тахсан баран, управление олоҕор көхтөөхтүк кыттара, бэтэрээннэр сэбиэттэрин бэрэссэдээтэлинэн ананан, музей матырыйаалларын хомуйуунан эрэ муҥурдаммакка, эдэр үлэһиттэргэ куруук истиҥ сүбэһит, үтүө тылынан-өһүнэн көмө-өйөбүл, тирэх буолара. Управление ыһыахтарыгар алгыс сиэрин-туомун кини толороро, оһуохай тылын кини таһаарара.
Бу долгутуулаах күн управление начальнига, ис сулууспа полковнига Владислав Дзюба эҕэрдэ тылыгар музейы төрүттээбит киһи аата бу музейга иҥэриллэрин киниэхэ махтал, ытыктабыл бэлиэтэ буоларын бэлиэтээтэ. Дмитрий Захарович уола, ис сулууспа астаапкаҕа сылдьар полковнига Эдуард Федоров аҕатын туһунан кэпсээтэ, бииргэ сулууспалаабыт ис сулууспа бэтэрээннэрэ иһирэх тылларынан аҕыннылар. Дмитрий Захарович сиэнэ, ис сулууспа подполковнига, 5-с №-дээх холуонньа үлэһитэ Дмитрий Федоров уонна хос сиэнэ, үһүс кылаас үөрэнээччитэ Тимур Федоров итини барытын болҕойон туран иһиттилэр.
Бу үтүө түгэни бочуоттаах караул салютунан бигэргэттэ, ыҥырыллыбыт ыалдьыттар мемориальнай дуоска анныгар сибэкки уурдулар.
Комментарии
Авторизация на сайте через социальные сети