- - Михаил Федотович, баһылыгынан талыллыбытыҥ икки ый буолла. Үлэҕин дьэ туохтан саҕалаатыҥ?
- - Быыбарга кыттыбыт бырагыраамабынан сирдэтэн үлэбин-хамнаспын ыытабын. Ол курдук, кэлэр 2016 с. түөрт кыбартыыралаах толору хааччыллыылаах дьиэни тутан үлэҕэ киллэриэхтээхпит. Манна «Саха сирэ XXI үйэҕэ» үтүө дьыала чэрчитинэн үлэлэһэбин. Докумуонун барытын туттарбытым. Онон үлэбин дьиэ тутуутун боппуруоһуттан саҕалаатым.
- Билиҥҥи туругунан, нэһилиэккэ төһө киһи олорор-үлэлиир, үөрэнэр?
- - Нэһилиэкпитигэр барыта370 киһи олорор, орто оскуолабытыгар 49 оҕо үөрэнэр, оҕо саадыгар 25 кырачаан сылдьар. Оттон бочуоттаах сынньалаҥҥа 92 киһи олорор. Быйыл түөрт оҕо күн сирин көрдө.
- - Дьиэлэри кииннэммит ититэр ситимҥэ холбооһун бырагырааматынан хас ыалга сылааска холбонно ?
- - Быйыл оскуола хочуолунайыгар икки саҥа улахан кыамталаах хочуоллары туруордубут. 900 м усталаах ититэр ситими тартыбыт. Итини сэргэ биэс ыалга сылааһы холбоотубут. Сыллата бу үлэбитин кэҥэтэн иһиэхпит. Инники былааммытыгар кыбартаалынай хочуолунай тутуута баар. Бу үлэҕэ ОДьКХ Хаҥаластааҕы филиалын салалтата (дириэктэр А.С.Захаров, солбуйааччыта Е.Н.Кардашевскай) өрүү көмөлөһөр.
- Нэһилиэккэ тыа хаһаайыстыбатын туруга хайдаҕый?
- - Нэһилиэкпитигэр уопсайа 168 хороҕор муостаах баар, итинтэн 64-дэ ыанар ынах. Оттон сыспай сиэллээхпит - 375, ол иһигэр 187 биэ баар. Итини сэргэ 47 көлүллэр сылгылаахпыт. Иһит нэһилиэгэр олус куһаҕана суох сайын ааста, онон хортуоппуй, атын нэһилиэктэргэ холоотоххо, син бэркэ үүннэ. Тетерин М.А. салайааччылаах ТХПК быйыл 120 т., биирдиилээн ыаллар 20 т хортуоппуйу Дьокуускайга «Агроснаб» тэрилтэни кытта дуогабардаһан туттарбыттара.
- Иһиттэр бэйэлэрин кыахтарынан дьаһанан, хортуоппуй үүннэрэн, килиэп буһарынан, үөрэххэ-үлэҕэ, спортка, ырыаҕа-тойукка ситиһиилэнэн бэрт сэргэхтик үлэлии олороллор. Баһылык М.Ф.Максимов олохтоох бэрэстэбиитэллээх уорган дьокутааттарын кытта үлэлэрин бииргэ былааннаан ыыталларын бэлиэтии көрдүм.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети