Алтынньы 13 күнүгэр бу акция чэрчитинэн Ньурба улууһун киин балыыһатын үлэһиттэригэр оройуон 1304 олохтооҕо хаанын баттааһынын кээмэйдэттэ. Кинилэртэн 296 киһи (22,7%) хаанын баттааһына үрдүгэ бэлиэтэннэ.
Акция кэмигэр ыарыыны эрдэттэн сэрэтиигэ аналлаах бэсиэдэлэр ыытылыннылар, былакааттар, буклеттар тарҕатылыннылар. Үрдүк хаан баттааһыннаахтары терапевт быраас көрдө, сорохторго тустаах медицинскэй көмө оҥоһулунна.
Киин балыыһа кылаабынай бырааһа Александра Андреева иһитиннэрбитинэн, 2015 сыл 9 ый түмүгүнэн улууска хаан эргииригэр сыһыаннаах ыарыылартан өлүү ахсаана (ол иһигэр, үлэлиир дьон) аҕыйаабыта бэлиэтэннэ.
– Билигин доруобуйа харыстабылын үлэһиттэрэ артериальнай гипертензия, сахарнай диабет, холестерин элбээһинэ, углевод атастаһыытын кэһиллиитэ, сыыһа аһааһын, арыгылааһын уонна табахтааһын курдук көстүүлэргэ өссө улахан болҕомтону уурарбыт улахан суолталаах. Бу кыһалҕалары быһааран, ыарыы аҕыйыырын, ол түмүгэр инфаркт миокарда уонна инсульт аҕыйыырын ситиһиэхпитин сөп. Ону сэргэ ыарыһахтар бэйэлэрин доруобуйаларыгар эппиэтинэстээх буолуохтаахтарын өйдөтүөхтээхпит. Үлэҕэ-хамнаска көстөрүнэн уонна акция кэмигэр ыйыталаспыппытыттан түмүк оҥордоххо, сорох ыарыһахтар быраас анаабыт эмин тиһигин быспакка испэттэр, ол иһин улахан ыарыыга тириэрдэллэр. Бу хомолтолоох», – диэн Александра Николаевна санаатын үллэһиннэ.
Комментарии
Авторизация на сайте через социальные сети