Мэлдьэхсигэ
«Мүрү» республикатааҕы суолга 80 сыл анараа өртүгэр, 1935 сыллаахха тутуллубут мас муоста оннугар саҥа тимир муостаны Өлүөхүмэтээҕи «Меркурий» ХЭУо (салайааччы Валерий Матвеев) икки сыл иһигэр тутта. Тимир-бетон тирэхтээх муоста 47 м усталаах, 8 м туоралаах, бөҕө-таҕа гына оҥоһуллубут.
Тэрээһин саҕаланыытыгар аал уоту оттон алгыс сиэрин-туомун Петр Тихонов ыытта. Олохтоохтор ааттарыттан тыыл, үлэ ветерана Марфа Кривогорницына тыл эттэ. Оччотооҕу Куйбышев, Димитров ааттарынан колхоз туруу үлэһиттэрэ, аатырбыт уустар ыҥырыллан ат, оҕус көлөнөн маһы таһан, эт илиилэринэн күүстэрин харыстаабакка үлэлээбиттэр. Иван Кривогорницын үлэни-хамнаһы салайбыт. Марфа Петровна аймахтарыттан Федор Кривогорницын маастардаабыт. «Кыайыы 70 сылыгар саҥа муоста үлэҕэ киллэриллибитэ бэлиэ түгэнинэн буолла. Оннооҕор биһиги кыра сылдьан мас муостаны ыраахтан сөҕө көрөр буоларбыт. Аныгы сайдыылаах кэмҥэ бары ирдэбилгэ эппиэттиир саҥа муоста тутуллубутун үөрэ-астына көрдүбүт, дьол-соргу муостата буоллун диэн алгыыбыт», ‒ диэтэ.
Саҥа муоста лиэнтэтин СР транспорка уонна суол хаһаайыстыбатыгар министрэ Семен Винокуров, оройуон баһылыга Николай Старостин, Мэлдьэхси нэһилиэгин баһылыга Владимир Шарин быстылар.
Министр Семен Винокуров: «СР Правительствота федеральнай бюджеттан үп-харчы көрүллэригэр төһүү буолла. Атын улуустары ситимниир баараҕай муоста 49 мөлүйүөн суумалаах. Тимир-бетон тирэхтээх, тимир конструкциялаах оҥоһуллубута улахан ситиһии. Республика салалтата суол-иис сайдыытыгар болҕомтону уурар, сыыйа сайдан иһэбит. Күндү тэрээһин кыттыылаахтара, саҥа муостанан дьоллоохтук айанныаҕыҥ», ‒ диэн туран «Меркурий» ХЭУо директорыгар Валерий Матвеевка, оройуон баһылыгар Николай Старостиҥҥа Махтал суруктары туттарда.
Николай Прокопьевич эҕэрдэ тылыгар ыаллыы сытар улуустарга, ыраах хотуттан кэлээччилэргэ «Мүрү» республикатааҕы суол ситимниир оруоллааҕын бэлиэтээтэ, СР Правительствотыгар, СР Транспорка уонна суол хаһаайыстыбатыгар министерствотыгар махтанна.
Үөрүүлээх тэрээһиҥҥэ Мэлдьэхси нэһилиэгин кэнчээри ыччата хомуска оонньоон, ыллаан-үҥкүүлээн эҕэрдэлээтилэр.
Бүтэйдээххэ
Үс үрэх тардыытыгар сытар Бүтэйдээх нэһилиэгэр Суола үрэҕи туоруур саҥа муоста «Абалаах» республикатааҕы суол 217 биэрэстэтигэр тутулунна.
Мэлдьэхси нэһилиэгэр курдук, тимир-бетон тирэхтээх муостаны «Технодор» ХЭУо (директор Александр Романов) тутааччылара кылгас кэм иһигэр үлэҕэ киллэрдилэр.
Бүтэйдээх нэһилиэгэр үрэҕи туоруур улахан муоста 1920 с. эргин тутуллубут. Кэлин хаста да уларытыллан 1948 с. оҥоһуллубут. Билигин «Абалаах» суол «Амма» республикатааҕы суолтан «Халыма» федеральнай суолга холбоһуутугар сүрүн суолталаммытын оройуон баһылыга Николай Старостин бэлиэтээтэ. Чурапчы улууһугар тахсарга саҥа муоста тутуллубутуттан олохтоохтор үөрүүлэрэ муҥура суох.
Саҥа муоста аһыллыытын сиэрин-туомун Ньургун Павлов ыытан аал уоту алҕаата.
СР транспорка уонна суол хаһаайыстыбатыгар министрэ Семен Винокуров «СР Суол хаһаайыстыбатын бочуоттаах үлэһитэ» бэлиэни муостаны тутууга төһүү буолбут «Мосты Севера» ХЭУо директорын производствоҕа солбуйааччы Прокопий Николаевка үөрүүлээх быһыыга-майгыга туттарда.
Бу күн оройуон баһылыга Николай Старостин, «Мэҥэ-Хаҥалас суоллара» ААУо генеральнай директора Александр Романов тутааччылар Андрей Крохмальга, АлександрНиколаевка, Владимир Короткевичка, Николай Сутаковка, Григорий Аргуновка, Иван Филипповка, Олег Лыткиҥҥа, Алексей Степановка, Александр Борисовка, Николай Заморщиковка, Иван Игнатьевка, Семен Дьячковскайга, Василий Тихоновка, Прокопий Николаевка Бочуотунай грамоталары, Махтал суруктары туттартаатылар. Бүтэйдээх нэһилиэгин баһылыга Алексей Игнатьев тутааччыларга олохтоохтор ааттарыттан махталын биллэрдэ итиэннэ эмиэ Махтал суруктары, өйдөбүнньүк бэлэҕи, нэһилиэк историятын кинигэтин бэлэхтээтэ.
Саҥа тимир муостанан бастакы ветеран суоппар Юрий Прокопьев ытыс тыаһын ортотунан «ГАЗ» массыынанан айанныыр чиэстэннэ.
Комментарии
Авторизация на сайте через социальные сети