- Атырдьах ыйын 25 күнүнээҕи туругунан 139 тонна балык туттарылынна уонна “Мальчиков” рефрижераторынан Дьокуускай куоракка аҕаҕылынна.
- Былдьаһыктаах күннэр ааһаннар, сайыҥҥы балыктааһын көрдөрүүтэ куһаҕана суох. Ол курдук, Павел Никитин, Эдуард Семенов звенолара бастыҥ үлэлээхтэринэн буолаллар.
Быйыл сайын Күһүүр таһыгар баар Абалахаан, Оҕонньор үрэҕэ, Тыыкый, Күп Сарай учаастактарга биэс звенонан уонтан тахса киһи балыктыы сылдьарын туһунан балык тутааччы Алексей Попов кэпсиир. Ити учаастактартан 20 тонна балык киирбит, ону таһынан Сииктээх балыксыттара 5 тоннаны туттардылар. Кинилэр бары былаан туоларын туһугар кыһаллан үлэлииллэр.
Икки улахан учаастакка - Кумах Суртка уонна Күһүүргэ сана технология – “шоковой заморозка” оборудованиелара туруоруллан үлэ тэтимэ түргэтээтэ. Уон чаас устата биир тонна балыгы тоҥороллор, ону куулларга угаталаан улахан булууска түһэрэн иһэллэр. Саҥа тэрили балыксыттар биһирээбиттэр.
2014 сыл ахсынньы 15 күнүттэн хаһаайыстыба үп-харчы өттүнэн ыарахан балаһыанньаҕа киирэн, билигин онтон тахсар суолу- ииһи тобулууга үлэ-хамнас барар. Кистэл буолбатах, уустук балаһыанньаҕа киирии биир сыл иһинэн эрэ буолбатаҕа, сүрүн биричиинэтэ - хаһаайыстыба салалтата, уонна итиниэхэ кэмигэр улуус таһымыгар хонтуруол оҥоһулллубакка, суолта бэриллибэккэ, үбү-харчыны ыскайдааһын тахсан, элбэх иэс-күүс үөскээбитэ, ол балыксыт-табаһыт олоҕун-дьаһаҕын айгыраппыта.
- Онон Арбиртажнай суут быһаарыытынан балаһыанньаны көннөрүүгэ хаһаайыстыба тастан дьаһааллыы балаһыанньытыгар киирбитэ. Онон бүгүн республикаҕа биллэр- көстөр уопуттаах профессионал, уон сыл абритражнай управляющайынан үлэлээбит Лена Баишева тастан дьаһайыы управляющайынан анаммыта. Кини бүгүн хаһаайыстыба бары тэрээһин үлэтин дьаһайан олорор, хаһаайыстыбаны ыарахан балаһыанньаттан таһаарыы тэрээһиннэрин олоххо киллэриинэн күннэтэ дьарыктанар.
- Лена Матвеевна кэпсииринэн, саҥа сыл саҕаланыаҕыттан балыксыт туттарбыт кыһыҥҥы балыгын иһин хамнаһын толору аахсыбыт. Табаһыттар хамнастарын субсидиятын ыла олороллор. Республика көрөр субсидиятыгар хаһаайыстыба эбии үбүлээһини (софинансирование) оҥорор. Оттон улуус дьаһалтата биллибэт биричиинэнэн эбии төлөбүрүн биэрбэккэ олорор. Табаһыкка кыра да эбии наада диэн өйдүүбүт диир, ол иһин хаһаайыстыба хамнаһы толору төлүү олорор, улуустан киириэхтээх эбии хамнаска төлөбүрү уйунан туран. Хамнас уопсай ааҕыллыыта 20 000 солкуобай, онтон нолуоктар тутуллан табаһыт илиитигэр ылара 13 200 солкуобай буолар. Эбиллии да кэнниттэн табаһыт хамнаһа нэһиилэ тиийинэн олорор сууматтан кырата киһини сонньутар.
Быйылгы барыстан урукку хаһаайын балыксыттарга төлөөбөтөх хамнаска иэһин сабыыга үлэлэһиэхпит, диир Лена Матвеевна. Төлөммөтөх иэс элбэх, холобура сорох балыксыт икки сүүс тыһыынча ылардаах сылдьар.
Лена Матвеевналыын кэпсэтиибитигэр балыксыт, табаһыт үлэтин-хамнаһын таба тэрийэн, чиэһинэйдик аахсан-төлөһөн, боростуой үлэһит киһи салайааччыга эрэлин үөскэтиэххэ наада диэн түмүккэ кэлэбит. Уоннааҕыта үлэһиттэн бэйэтиттэн тутулуктаах буоллаҕа, киниэхэ олороругар-үлэлииригэр сөптөөх усулуобуйа тэрилиннэҕинэ, кини онно эппиэттиир гына үлэтин- хамнаһын тупсардаҕына, хаһаайыстыба туруктаах буоларыгар эрэл баар.
Хаартыскаҕа: Булуҥ бастыҥ балыксыта Эдуард Семенов балык тутааччы Руслан Лукинныын.
Комментарии
Авторизация на сайте через социальные сети