Төрөппүттэр оҕолоро банкет күн саха таҥаһын кэтэн хаһааҥҥытааҕар да тупсубуттарын, сирэйдэригэр саха буолалларынан киэн туттуу баарын көрөн олус астыннылар. «Үксүгэр банкекка анаан атыыласпыт күндү былааччыйаны кэлин ханна да кэппэттэр, оннук хаалан хаалар. Оттон сахалыы таҥаһы хаһан баҕарар кэтиэххэ сөп буоллаҕа. Онон биһиги оҕолорбут киллэрбит саҥа сүүрээннэрин атын оскуолалар салгыахтарын баҕарабыт. Оҕолорбут түмсүүлээх, доҕордуу, бастыҥ үөрэхтээх буолбуттарыгар, бастатан туран, кылааспыт салайааччытыгар, СӨ үөрэҕириитин туйгунугар Александра Михайловна Мокрощуповаҕа уонна төрөппүт кэмитиэтигэр махтанабыт. Чуолаан, төрөппүттэр Вероника Петрова, Прасковья Козлова, Екатерина Михайловна – кылаас салайааччытын «уҥа илиилэрэ». Александра Михайловна төрөппүттэри кытары ыкса сибээстээхтик, өйдөһөн-өйөһөн үлэлээн кэллэ», – диэн кинилэр үөрэ-көтө кэпсииллэр.
Бу кылаас, кырдьыга да, дэгиттэр талааннаах, оскуола, нэһилиэк уопсастыбаннай олоҕор актыыбынайдык кыттар. 20 оҕо бүтэрбититтэн 2 оҕо «туйгун», 11 оҕо «үчүгэй» сыананан бүтэрдилэр.
Спорка ситиһиилэрэ да үгүөрү. 7 үөрэнээччи оҕо-ыччат спортивнай оскуолатын бүтэрдэ. Үксүлэрэ волейболунан дьарыктаналлар. Айаал Никифоров уонна Гриша Винокуров Россияҕа мас тардыһыытыгар иккис миэстэлээхтэр. Сережа Андреев уонна Ваня Слепцов иккис спортивнай разрядтаахтар. Кылаас оҕолоро бары үҥкүүлүүллэр, ыллыыллар. Ваня Осипов Москватааҕы судаарыстыбаннай университекка аудикка призер буолан, иккис турга кыттан кэлбит. Денис Петров - спорт маастарыгар кандидат. «Азия оҕолоро» оонньууларга теннискэ төрдүс миэстэ буолбут.
Александра Михайловна салайар кылааһа оскуоланы бүтэрэр сыла хас да үбүлүөйдээх сылга түбэспит. Бастатан туран, Хатас оскуолата тэриллибитэ -- быйыл 100 сыла, эмиэ быйыл Улуу Кыайыы 70 сылын бэлиэтээбит уонна бу кылаас Хатас оскуолатыгар 50-с выпуһунан буолла. Ол да иһин, сылы быһа нэһилиэктэригэр 50 үтүө дьыаланы оҥорбуттар. Нэһилиэк кырдьаҕастара, бэтэрээннэрэ бу кылаас үөрэнээччилэрин барыларын кэриэтэ билэллэр. Тоҕо диэтэххэ, кинилэргэ куруук көмөлөһөллөр, үөрэ-көтө кэлэллэр. Куорат дьаһалтатын дьиэтигэр бүтүн кылааһынан киирэн мэр Айсен Николаевтан Махтал сурук ылбыттарынан киэн тутталлар.
Оттон кылаас салайааччыта Александра Мокрощупова, төһө да оҕолорун олох суолугар атаартаатар, билигин саамай долгутуулаах кэмэ. Кини үөрэнээччилэрэ биир кэлим экзаменнарын 100 бырыһыан туттарбыттарын курдук, үөрэххэ 100 бырыһыан киирэллэригэр баҕа санаалаах.
Комментарии
Авторизация на сайте через социальные сети