Саха омуга Айыыга тиксэр, сиэри-туому тутуһан ыраастанар, саҥа сылы көрсөр национальнай бырааһынньыгар түптэ сыта салгыҥҥа тарҕанна, торҕо буруо ыраахха диэри тыргылынна. Ыһыаҕы тыыл бэтэрээннэрин колонната аста. Параады нэһилиэктэр делегациялара, куорат тэрилтэлэрин кэлэктииптэрэ ситэрэн биэрдилэр. Бу кэннэ алгысчыт сэттэ кыталык кыыһы, тоҕус туруйа уолу түһүлгэҕэ батыһыннаран киирэн уот оттон, Үрдүк Айыыларга сүгүрүйэн алгыс сиэрин-туомун толордо. Салгыытүһүлгэдьонунуохтаахкымыһынан, сахалыыалаадьынанайахтуттулар.
Үбүлүөйдээх ыһыахха нэһилиэктэр куонкурустарабуолла. Ол түмүгүнэн Налимскай бөһүөлэгэ бастыҥ нэһилиэгинэн ааттанна уонна 30 000 солкуобайынан наҕараадаланна.
Ыһыах бырагырааматыгар киирбит бары өттүнэн эргиччи талааннаах, чөл олоҕу тутуһар кыыс оҕо кылааннааҕын талар куонкурус үрдүк таһымҥа ыытылынна. Манна Хатыҥнаах бөһүөлэгиттэн кэлбит Сайа Бандерова „Халыма Куо“ үрдүк аатын ылан, аалай кыһыл лиэнтэни кэттэ, үрүҥ көмүс саха бастыҥатынан наҕараадаланна.
Мас тардыһыы итиэннэ хапсаҕай күрэстэрэ көрөөччүлэри түмэ тарта. Сыаналаах бириис иһин сытыы хапсыһыыларбуолуохтара эрдэттэн сэрэйиллэрэ.Мас тардыһыытыгар Лидия Третьякова (Налимскай), эр дьоҥҥо Илья Слепцов (Сылгы Ыытар) кыайыылааҕынан тахсан ЖК телевизорынан наҕараадаланнылар. 1998-2000 сс. төрүөх уолаттарга Максим Мышакин (Орто Халыма куорат), 2001с. үөһэ төрүөхтэргэ Вова Анисимов (Орто Халыма куорат) бастакы миэстэҕэ тахсаннар, планшет бирииһинэн биһирэннилэр.
Хапсаҕайга эр дьоҥҥо Егор Горохов (Орто Халыма куорат), 1998-2000 сс. төрүөхтэргэ Максим Мышакин (Орто Халыма куорат), 2001 с. үөһэ төрүөхтэргэ Миша Винокуров (Орто Халыма куорат) абсолютнай чемпион аатын сүктүлэр, планшетынан наҕараадаланнылар.
Дьахталлар многоборьеларыгар 8 кэрэ аҥар ыстаныыга, сүүрүүгэ, тааһы көтөҕүүгэ илин-кэлин түһүстүлэр. Күрэстэһии 3 эрэ көрүҥҥэыытыллан түргэнник түмүктэннэ, кыайыылаах тутатына быһаарылынна. Баҕар, көрүҥ ахсаана элбэҕэ эбитэ буоллар, күрэхтэһии түмүгэ атын буолуо эбитэ дуу диэн саныырбытыгар эрэ тиийэбит. Рада Татаринова (Сыбаатай) сүүрүүгэ мөлтөөн хаалан, үһүс миэстэҕэ тигистэ, иккис миэстэни Сайа Бандероваҕа (Хатыҥнаах) туран биэрдэ. Оттон бастакы миэстэни туох да мөккүөрэ суох Лена Берёзкина (Сылгы Ыытар) ылла уонна таҥас сууйар автомат массыына хаһаайкатынан буолла.
Ханнык баҕарар ыһыах күүтүүлээх күрэһинэн эр бэртэрэ „Дыгын оонньуулара“ буолар. Бу да сырыыга 6 көрүҥҥэ 13 уолан дьон күүстэринэн холостулар, көрөөччүлэргэ умнуллубат хапсыһыылары бэлэхтээтилэр.
Ол курдук „Балаҕан нөҥүө таас быраҕыыга“ Илья Слепцову (Сылгы Ыытар) баһыйар көстүбэтэ. „Бэрэмэдэйдээх сүүрүүгэ“ Сергей Оконешниковка (Налимскай) ким да тиийбэтэ. Түргэн ньыманан наартаны ойууга Родион Третьяков (Эбээх) тэҥнээҕин булбата. 124 киилэ ыйааһыннаах таас көтөҕүүтүгэр Андрей Сорокин (Дьокуускай) саамай күүстээҕинэн билинилиннэ. Кини көрдөрүүтэ - 21 м 90 см. „Халбас харата“ күрэх түһүмэҕэр Андрей Бережнов (Налимскай) иннин кимиэхэ да биэрбэтэ. Сүүрүүгэ Борис Татариновы (Сыбаатай) ким да сиппэтэ, биэтэккэ бастакынан кэллэ.
Онон түмүккэ түһүмэхтэр аайы эриэ-дэхси көрдөрүүлэммит Геннадий Максимов (Сыбаатай) бастакы миэстэҕэ таҕыста, ЖК телевизор хаһаайынынан буолла. Иккис миэстэҕэ Андрей Бережнов (Налимскай) таҕыста. Киниэхэ 10 000 солкуобай харчынан бириис туттарылынна. Оттон үһүс миэстэ буолары ситиспит Андрей Соколов 100 лиитэрэ бензининэн бириэмийэлэннэ.
Салгыы „Төрөөбүт Халымам барахсан“улуустааҕы ырыа куонкуруһа тэрилиннэ. Уопсайа 8 кыттааччы Кыайыы 70 сылыгар анаммыт уонна Халыма мелодистарын авторскай ырыаларын бэлэхтээн, көрөөччүлэри сэргэхситтилэр. Куонкурус устата көрөөччүлэр ытыстарын тыаһа уҕараабата, оттон итинтэн күүс ылан, ырыаһыттар санаалара өссө көтөҕүллэн, куоластара эбии аһыллан ылбаҕай ырыалар ылланан истилэр.
Кыттыбыт дьон бары кэриэтэ улууска биллибит талааннаах ырыаһыттар, ырыа эйгэтин толору баһылаабыт дьон. Сыанаҕа тутта-хапта сылдьаллара, көрөөччүлэри ырыа ис хоһоонун туругар киллэрэн куттарын туталлара, кинилэрдиин биир ситими олохтууллара туспа искусство. Онон үгүһү этэ барбакка, миэстэҕэ тиксибит, кыайыы өрөгөйүн билбит толорооччулары ааттыыр буоллахха, үһүс миэстэни Алексей Оконешников, иккиһи Павел, Дмитрий, Николай Винокуровтар триолара ыллылар. Кинилэргэ харчынан бириэмийэ туттарылынна. Оттон Станислав Бандеров туох да мөккүөрэ суох бастыҥ толорооччу аатын ылан, микрофон статуэтканы кытары 10 000 солкуобайынан наҕараадаланна.
Комментарии
Авторизация на сайте через социальные сети