Форум кэмигэр уопсайа 4,7 триллион солк. суумалаах 200-тэн тахса инвестбырайыак көрүллүөҕэ. Манна Россия уонна 24 тас дойду 400-тэн тахса хампаанньата – барыта 4 тыһ. тахса киһи кыттыыны ылаллар. Элбэх делегациялар Кытайтан, Японияттан, Кореяттан, Сингапуртан, Малазияттан кэлбиттэр. Тэрээһини 660 араас омук суруналыыһа сырдатар.
Форум сүрүн соруга – тас дойдуттан омук инвестордарын бэйэ араас хайысхалаах бырайыактарын интэриэһиргэтэн тардыы. Суолталаах тэрээһиҥҥэ промышленность, нефть, газ, тутуу, инновация, маһы таҥастааһын, туризм уо. д. а. социальнай-экономическай сайдыыга туһуламмыт бырайыактары дьүүллэһиэхтэрэ. Саха сирэ бу форумҥа тыа хаһаайыстыбатын, туризм, инновация уонна биологическай ресурсалары сайыннарар хайысхалаах 20 бырайыагы бэлэмнээн, инвестордары тардыыга үлэлэһэр. Бу бырайыактар уопсай суумалара быһа холоон 150 млрд солк. тэҥнэһэр. Ордук улахан болҕомто үс сүрүн бырайыакка ууруллар: Өлүөнэ өрүһү туоруур муоста тутуута, “Кангаласс” индустриальнай пааркатын сайдыыта, Аллараа Бэстээххэ сибиинньэ комплексын тутуу.
Өрөспүүбүлүкэ делегациятын Ил Дархан Егор Борисов салайар. Аҕа баһылык Россия балыктааһыҥҥа хаһаайыстыбатын салайааччыта Илья Шестаковтуун, туризм федеральнай агентствотын салайааччыта Олег Сафоновтыын Саха сирэ уонна федеральнай биэдэмистибэлэр бииргэ үлэлээһиннэрин туһунан докумуонарга илии баттаста.
“Форум бастакы күнүн сөбүлэһиилэри түһэрсииттэн саҕалаатыбыт. Ол курдук, Россия балыктааһыҥҥа хаһаайыстыбатын салайааччытын кытта Лаптевтар муораларыгар уонна Илин Сибиир муоратыгар баар биологическай ресурсалары (балыгын, үүнээйитин) үөрэтэн баран, кэнэҕэскитин манна балык бултааһынынан дьарыктаныа этибит диэн былаанныыбыт. Итиэннэ Эдьигээн улууһугар балыгы үөскэтэр собуоту тутарга кэпсэтиини ыытабыт. Онон кэскиллээх үлэни ыытар былааннаахпыт. Туризм федеральнай агентствотын кытта былааннаммыт үлэлэрдээхпит, олору чопчуластыбыт”, -- диэн Ил Дархан Егор Борисов бэлиэтээтэ.
Маны таһынан Ил Дархан Саха сирэ, Уһук Илин уонна Байкал регионун фондатын сайдыытын бииргэ үлээһиннэригэр туһуламмыт суолталаах докумуоҥҥа илии баттаата. Бу боппуруоска Ил Дархан Егор Борисов маннык быһаарыыны биэрдэ: “Үп-харчы боппуруоһугар хас да өрүттээх дуогабардары түһэрсии бииргэ үлэлээһиҥҥэ улахан көмөлөөх буолуоҕа. Биһиги атын субъектартан уратыбыт итиннэ сытар. Уокурук уобаластара уонна кыраайдара илиҥҥитэ итинник сөбүлэсиһиини түһэрсэр кыахтара суох. Биһиги бэлэм буолан, бу боппуруоска инники хардыы оҥорон, үбү тардар олугу уурдубут.
Форум чэрчитинэн дьыалабай боппуруостары быһаарыыга актыыбынайдык кыттан эрэбит. Мантан салгыыбу тэтиммитин ыһыктыахпыт суоҕа. Саха сиригэр инвестордар интэриэстэрэ олус улахан. Онон бырабытылыстыба делегацията инвестордары тардыыга күүскэ үлэлэһиэҕэ”.
Өлүөнэ өрүһү туоруур муоста тутуутун бырайыагын дьүүллэһии балаҕан ыйын 4 күнүгэр ыытылларын өрөспүүбүлүкэ олохтоохторо бары да олус эрэнэ кэтэһэбит. Бу боппуруос Илиҥҥи экономическай форум анал сессиятыгар бөдөҥ бырайыак быһыытынан туспа көрүллэр. Бырайыагы ордук Кытай Өрөспүүбүлүкэтин инвестордара интэриэһиргииллэр.
Өрөспүүбүлүкэ экономикаҕа миниистирэ Валерий Максимов:“Саха сирэ инвестордары тардыыга бэлэмнээн аҕалбыт бырайыактарыттан биир сүрүнэ -- Өлүөнэ өрүскэ муоста тутуута. Бу бырайыакка туспа сессия ыытыллыаҕа. Манна спикеринэн “Дороги России” хампаанньа генеральнай дириэктэрэ Иван Григорович үлэлиэҕэ”, -- диэн бэлиэтээтэ.
Форум ыытыллар былааһаккатынан тоҕо чуолаан Владивосток куорат талылынна? Уһук Илиҥҥи уокурук салайааччыта Юрий Трутнев бэлиэтээбитинэн, Владивосток куорат регион атын куораттарыттан ураты сайдыылаах өрүтэ – Уһук Илиҥҥи федеральнай университет. “Бу региоҥҥа маннык туспа куораттыы сайдыылаах бөдөҥ база ханна да суох. Ол эбэтэр тыһыынчанан киһини биирдэ түһэрэр, араас үлэни ыытар тэрилтэлэрдээх, сынньатар былаһааккалардаах университет турар сирэ-уота маннык улахан тэрээһиннэри ыытарга олус табыгастаах. Онон инвестордары кытта үлэлэһэр сир уларыйыа суоҕа, бастайааннай буолуоҕа. Мантан инньэ Илиҥҥи экономическай форум бу куоракка ыытыллара үгэскэ кубулуйуоҕа”, -- диэн суруналыыстарга ыыппыт пресс-конферециятыгар Юрий Трутнев тоһоҕолоон эттэ.
Комментарии
Авторизация на сайте через социальные сети