Аһыма сэлиэнньэтин аттыгар «Сахатранснефтегаз» ААУо хас даҕаны вахтовой дьиэни туруоран, бүтүн учаастак үөскээбит. Манна 18 исписэлиис үрдүттэн олорон магистральнай гаас ситимин тардыыга үлэлиир
«Сахатранснефтегаз» ААУо тутар-таҥар управлениетын начаалынньыга Михаил Кириллин үлэ-хамнас туһунан бу курдук кэпсээтэ:
– Күөрэлээхтэн Аһымаҕа диэри тардыллар магистральнай гаас ситимин уһуна 26,5 км, турба кэтитэ 219 мм. Билигинсолооһун устун таспыт 10, 11 миэтэрэ уһуннаах турбаларбытын бэйэ-бэйэлэригэр холботолоон сыбаарбакалыыллар. Былаан быһыытынан алтынньыга диэри 13 км уһуннаах магистральнай ситими тардан, улахан тымныылар түһэ иликтэринэ сиргэ көмүөхтээхпит.
Итини тэҥэ, Аһыма аттыгар оператордар дьиэлэрин уонна гааһы тарҕатар станцияны тутуохпут. Бу күннэргэ учаастактарын оҥорууну саҕалыахпыт.
26,5 км уһуннаах магистральнай ситими тутуу үбэ көрүллэн, ити өттүгэр кыһалҕа суох. “Өрөспүүбүлүкэтээҕи инвестиционнай хампаанньа» ААУо үбүлээһининэн судаарыстыбаннай сакаасчытынан СӨ Промышленноска министиэристибэтэ, сакаасчыт-тутааччынан - “Стройсельгазивикация” дирекция буолаллар. Бырайыак уопсай суумата 310 мөл. солк.
Ситими тутууга төһө кыалларынан Аһыма уонна Күөрэлээх нэһилиэктэрин олохтоохторун үлэлэтэ сатыыбыт. Ол курдук, солооһуҥҥа олохтоохтор сылдьыбыттара. Түргэнник, хаачыстыбалаахтык үлэлээбиттэрэ. Итини таһынан Аһымаҕа оператордар олоруохтаах дьиэлэрин олохтоох биригээдэ тутаары сылдьар.
Сирэ сымнаҕас буолан, 20-30 тонналаах улахан тиэхиньикэлэр үлэлииллэригэр ыарахаттары үөскэттэ. Ол эрээри, быстах-быстах кумах сирдэрдээх эбит. Ону чинчийэн баран¸үктэллээх учаастактарга үлэни ыыта сылдьабыт Сир тоҥорун кэтэстэхпитинэ, былааны толорор уустук буолуон сөп. Халлаан ардаабакка туран биэрэн абыраата.
Тайҕа ортотугар гаас ситимин тардыы олус уустук. Аһыматтан Күөрэлээх диэки барыыга уонна магистральнай ситим барар туһаайыытынан тарыҥнаах сир баар, онтон өссө үрэх саҕаланар. Бу сир кыһын бүтүннүү мууһунан бүрүллэр эбит. Кыһын, муус килэйэ сытарыгар, гаас ситимин тардар хайдах да кыаллыбатын билэн, сайын оҥорорго күһэллибиттэр. Тарыҥ икки биэрэгин бульдозерынан астаран, сырыынньа гына тэҥнии сылдьаллар. Тарыҥҥа кумаҕынан тэллэх курдук оҥорон, гаас турбатын 1 м дириҥнээх сиринэн ыытарга былааннаабыттар. Эттэххэ дөбөҥ, оҥоруох диэтэххэ уустук. Ол гынан баран, «Сахатранснефтегаз» ААУо уопуттаах үлэһиттэрэ толлон турар санаалара суох, балаҕан ыйын саҥатыгар гаас ситимин тарыҥ уҥуор туоратыахпыт дииллэр.
Комментарии
Авторизация на сайте через социальные сети