Бу күн Табаҕатааҕы 7 №-дээх кытаанах режимнээх хаайыыга сарсыарда эрэдэттэн атын холуонньалар хамаандалара хонбуойданан кэллилэр. Иккилии киһилээх алта хамаанда саахымакка, дуобакка уонна теннискэ күрэхтэстилэр. Кылаабынай судьуйа, Россия Накаастабылы толорор федеральнай сулууспатын Саха сиринээҕи управлениетын иитэр үлэҕэ отделениетын начальнига, ис сулууспа подполковнига Руслан Мырсанов маннык күрэхтэһии аан бастакытын ыытылларын бэлиэтээтэ. Кини уонна “сэттис” холуонньа начальнига, ис сулууспа полковнига Юрий Мирошников күрэхтэһиини эҕэрдэ тылынан аспыттарын, былаахтары үөһэ таһаарыы кэнниттэн, дьэ, саҕаланна.
Саахыматчыттар, дуобатчыттар холуонньа кулуубун инники өттүгэр кэккэлэһэ олордулар, оттон теннискэ күрэс былдьаһааччылар сценаҕа уонна фойеҕа кииристилэр. Судьуйанан “көҥүлтэн” саахымакка спорт маастарыгар кандидат, “Саахымат-дуобат киинин” инструктора Вячеслав Гаврильевы ыҥырбыттар. Күрэхтэһии ол-бу дьиэгэ суох, бэрт тэрээһиннээхтик, судурхайдык эбиэккэ диэри ыытыллан бүттэ.
Уопсай түмүккэ кыайыылааҕынан Дьокуускайдааҕы 1 №-дээх кытаанах режимнээх холуонньа хамаандата бастаата. Иккис миэстэҕэ хаһаайыттар, “сэттистэр”, тигистилэр. Онтон үһүскэ Мохсоҕоллоохтооҕу 6 №-дээх кытаанах режимнээх хаайыы хамаандата таҕыста. Кыайыылаахтарга грамота, мэтээл уонна сыаналаах бэлэхтэри туттардылар.
Бу күрэхтэһиигэ бириистэринэн Россия холуобунай-исполнительнай систиэмэтин попечителлэрин сэбиэтин Саха сиринээҕи салаата, Физкультура уонна спорт управлениета, мусульманнар духуобунай кииннэрэ уонна евангельскай христианнар көмөлөспүттэр. Күрэхтэһии сылын аайы ыытыллара сабаҕаланар.
Комментарии
Авторизация на сайте через социальные сети