Чуолкайдаан эттэххэ, оҕолор сайыҥҥы сылаас кэмҥэ, үрэх үрдүгэр олус табыгастаах миэстэҕэ турар улахан уһаайбалаах, киэҥ дьиэлээх-уоттаах үтүө санаалаах ыалга ыалдьыттаан тыа сирин олоҕун-дьаһаҕын, үлэни-хамнаһы кытта билсэллэр, сөтүөлүүллэр-сынньаналлар, тыыннаах айылҕа ортотугар көччүйэллэр.
Кривошапкиннар саас ортолоох дьон. Эдуард Николаевич 53-һэ, кини уруккута «Өктөм» совхоз аатырбыт хортуоппуй үүннэрээччитэ, икки Үлэ Кыһыл Знамята уонна Албан Аат үһүс истиэпэнэ уордьаннар кавалердара Николай Григорьевич Кривошапкин төрөппүт уола, Өктөм төрүт олохтооҕо. Эдуард Николаевич агрономунан үлэлии сылдьыбыт, билигин газооператортыыр. Кэргэнэ Клавдия Петровна 51-рэ, төрдүнэн Кириэс Халдьаайы, идэтинэн иистэнньэҥ. Холбоспуттара отучча сыл буолбут, бэйэлэриттэн төрөөбүт икки кыыстаахтар. Улахан кыыстара Саяна Эдуардовна 25-һэ, ДьТХА-ны бүтэрбит инженер-механик. Күтүөттэрэ Дорофеев Геннадий Николаевич - Чурапчы, экономическай факультет төрдүс курсун студена. Кыра кыыстара Александра Эдуардовна эмиэ экономическайга үөрэнэр, быйыл иккис курсу туйгуннук бүтэрбит. 5 саастааҕар иитэ ылбыт уоллара - Савин Иван Семенович, төрдө эмиэ Кириэс Халдьаайы, быйыл 17-н туолбут. Намнааҕы Граф Биэрэгин колледжын иккис курсун бүтэрбит студент, тутуу үлэтигэр маастар идэтин ылыахтаах. Иккис уол - Керемясов Костя, тоҕус саастаах, сөбүлэстэҕинэ эмиэ иитиэх оҕо буолуохтаах.
Сүнньүнэн сайын аайы 4-5 оҕону ыалдьыттаталлар. Хас оҕо аайы сайын устата аһыыр аһын таһынан биэстии тыһыынча харчы төлүүллэр эбит. Эттэххэ дөбөҥүн иһин, олус сыралаах эппиэтинэстээх үлэ. Хас оҕо сайдыыта, өйүн-санаатын туруга, майгыта-сигилитэ араас-араас буоллаҕа. Үгүс кэтэбил-манабыл, өйдөтө сатаан кэпсэтии, тылы-өһү ылыннарыы – барыта төһөлөөх ньиэрбэни ыларын сэрэйиэххэ эрэ сөп. Ол да буоллар сайын устата оҕолор бэйэ-бэйэлэригэр сыстыһан этэҥҥэ сылдьан дьиэ кэргэн, кэлэктиип олоҕор үөрэнэн, түспэтийэн, улаатан бараллара иитээччилэргэ тугунан да кэмнэммэт үөрүүнү, бэйэ үлэтинэн дуоһуйууну-астыныыны аҕалар.
Иллэрээ сыл Кривошапкиннар дьиэ кэргэн уопуттара улууска бастыҥынан сыаналаммыта. Кинилэр билиҥҥи кыһалҕалаах кэмҥэ оҕону, ыччаты иитиигэ дойду, уопсастыба иннигэр киллэрэр сүҥкэннээхэй кылааттарын үрдүкү салалта үтүө холобур быһыытынан болҕомтоҕо ылан, сөптөөх сыанабылы оҥорон, атын улуустарга, нэһилиэктэргэ тарҕатар дьаһалы ылара олус тоҕоостоох.
Тумарча, суруйааччы
Комментарии
Авторизация на сайте через социальные сети