ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
23 июля 2015, 12:24

Бүлүүгэ «Оонньооботох оҕо саас» саҥа кинигэни билиһиннэрии буолла


От ыйын 22 күнүгэр Бүлүү куоратын Олоҥхо дьиэтигэр Улуу Кыайыы 70 сылыгар аналлаах тэрээһиннэр чэрчилэринэн «Оонньооботох оҕо саас» кинигэ бастакы чааһын сүрэхтэниитэ буолла.
photoByWidth&id=40328&width=1000
Аҕа дойдуну көмүскүүр Улуу сэрии сыллара хаһан да умнуллубаттар. Уоттаах сэрии төһө киһи олоҕун быспытын, төһө оҕону тулаайах хаалларбытын киһи ситэн аахпат.  
«Оонньооботох оҕо саас» диэн кинигэҕэ Бүлүү улууһун нэһилиэктэрин сэрии кэминээҕи уонна кэннинээҕи олох аһыытын-ньулуунун амсайбыт дьонун ахтыылара, сэрии сылын оҕолорун кэпсээннэрэ киирдилэр. Бу кинигэ сэрии саҕанааҕы ыарахан олоххо олорон ааспыт дьон дьылҕаларын сырдатар, үйэтитэр аналлаах.  
Олоххо саҥа үктэнэн иһэр сэттэлээх, аҕыстаах оҕолор оҕо саастара оҕус муннун анныгар, бугул төрдүгэр, бурдук бааһынатыгар харах уутун эҥээрдэһэн ааспыта. Сорох киэһэ үлэлээн күн киириитэ хам аччык, сылбархай ууну иһэн баран утуйан хаалаллара.  
Ол да буоллар, кыайыы иһин, “Бары күүһү барытын - фроҥҥа” диэн лозунунан салайтаран, ханнык да үлэттэн чаҕыйбакка, ким туох кыахтааҕынан, тугу сатыырынан бары үлэлииллэрэ.
Тэрээһиҥҥэ оройуон баһылыгын бастакы солбуйаччы Василий Лукин, тыыл уонна үлэ бэтэрээннэрэ, сэрии сылларын оҕолоро, библиотека үлэһиттэрэ уонна куорат олохтоохторо кыттыыны ыллылар .
Презентация кыттылаахтара бу кинигэ инникитин сыаналаах матырыйал буоларын тоһоҕолоон бэлиэтээтилэр.
Кинигэни хомуйан бэчээккэ бэлэмнээбит Бүлүү куорат сэрии сылларын оҕолорун түмсүүтүн салайааччы Диана Томская кинигэ тахсыытыгар көмөлөспүттэргэ, ахтыыларын туттарбыт дьоҥҥо, үбүнэн көмөнү оҥорбут оройуон баһылыгар Сергей Винокуровка, оройуон дьаһалтатын дьыалаларын салайааччытыгар Клара Гаврильеваҕа барҕа махталын тириэртэ. 
photoByWidth&id=40329&width=1000
При частичном или полном использовании материалов гиперссылка на сайт ysia.ru обязательна.
Категория: Культура Просмотров: 907 Источник: ЯСИА Автор: СИА Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ