Карамзиннар икки сыллааҕыта республикаҕа тыа хаһаайыстыбатын сайыннарыыга туһуламмыт дьиэ кэргэн гранын куонкуруһугар кыттан 3,5 мөлүйүөн суумалаах харчыны ылан, улууска аан бастаан каркаһа суох диэн аныгылыы ньыманан хотон тутуутун саҕалаабыттара. «Россельхозбаантан» 5 мөлүйүөн үбү иэс ылан эбии туһаммыттар. Нэһилиэк дьаһалтатын өйөбүлүнэн сайылыкка электро-уот линията тардыллыбыт, саҥа подстанция туруоруллубут. Онон электро-уот сайылыктарга тыын боппуруос буоларынан, сайынын атын да хаһаайыстыбалар сүөһү мэччийэригэр үчүгэй сыһыылардаах-хонууларга сиргэ кэлэн олороллоругар бары усулуобуйа олохтоммут.
Эдэр ыал үөрүүтүн үллэстэ оройуон баһылыгын бастакы солбуйааччы Павел Сазонов кэлэн күүс-көмө буолбут үлэһиттэргэ оройуон баһылыгын махтал суруктары, оттон нэһилиэк баһылыга Иван Новгородов 76 тыһыынчалаах сертификаты анаата, улуустааҕы тыа хаһаайыстыбатын управлениетыттан дьиэ миэбэлин ыларга туоһу сурук туттарылынна. Тутууну Александр Семенов салайааччылаах биригээдэ ыытан кылгас кэм иһигэр ситиһиилээхтик түмүктээтэ итиэннэ саҥа тутуу символическай күлүүһүн Карамзиннарга үөрүүлээх быһыыга-майгыга туттарда. Догдоҥо нэһилиэгин бочуоттаах гражданина Спартак Титов аал уоту айах тутта.
Тыа хаһаайыстыбатыгар управлениетын начальнига Иван Аргунов: «Карамзиннар саҕалааһыннарын улууска атын бааһынай хаһаайыстыбалар батыһыахтарын наада дии саныыбын. «Чэлгиэрийэ» хаһаайыстыба бөһүөлэк тас өртүгэр кыстыгы туттубутунан уратылаах. Бэйэлэрэ олорор дьиэлэрин ититэр ситимнээх гына тутуннулар. Эбии электр-уот тардыллан оҥорон таһаарыы сайдарыгар бары кыахтар үөскээтилэр».
«Биһиги 2009 с. бааһынай хаһаайыстыба тэриммиппит. Бэйэбит үс уол оҕолоохпут. 2012 с. грант куонкуруһугар кыттыбыппыт. Саҥа хотомммутугар 50 ынах сүөһүнү кыстатан туруорабыт. 21 ыанар ынахтаахпыт. Номнуо сорох ынахтарбыт синньээн эрэллэр. Аны сайын, этэҥҥэ буоллаҕына, отучча ыанар ынахтаныахпыт. Хаһаайыстыбабытын иккиэн көрөбүт. Хотоммут сылаас бөҕө. Сайылыгы сөргүтэргэ нэһилиэк салалтата, аҕам саастаах дьоммут сүбэ-ама буоллулар. Бастаан сайынын эрэ тахсан сүөһүнү-аһы туруорар санаалаах этибит, онтон толкуйданан баран төттөрү-таары көһөргө ыарахаттардаах эбит диэн, кыстыгы эмиэ үрдүттэн тэринэргэ быһаарыммыппыт. Хаһаайыстыбаны тэринии, хотону туттуу ылбычча кыаллыбат суол эбит. Онон эдэр дьоҥҥо туруоруммут соругу тиһэҕэр тиэрдэргэ дьулуурдаах буолары сүбэлиибит», – диэн Елизавета уонна Айаал Карамзиннар санааларын үллэстэллэр.
Комментарии
Авторизация на сайте через социальные сети