ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
24 июня 2015, 16:35

Доруобуйатыгар хааччахтаах киһи «Кыымтан» саҕыллан бэйэтигэр туох эрэ туһалааҕы буларын, уопсастыба үлэтигэр тус кылаатын киллэрэрин туһугар


Сунтаар Элгээйититтэн силис тардыылаах Анна Лукинична Барашкова Горнай улууһун Бэрдьигэстээҕэр олорбута сүүрбэттэн тахса сыл буолла. Кини ыарыыга ылларан, эмчиттэр көмөлөрүнэн күүскэ эмтэнэн, доруобуйатын чөлүгэр түһэрбитэ. Кырачаан киһиэхэ күн сирин көрдөрөн баран, үлэлиир кыахтааҕыттан эрдийэн үлэлии тахсарга санаммыта.

Олоҕу-дьаһаҕы хааччыйар кэмбинээккэ үлэлии сырыттаҕына, 1990-с сыллар тиийэн кэлбиттэрэ. Ыһыллыы-тоҕуллуу ухханыгар оҕустаран, тэрилтэлэр сабыллан, үгүс киһи үлэтэ суох хаалбыта. Баҕарбатар да, үлэтэ суохтар ахсааннарыгар киирбитэ.

Ол сылдьан улуус киинигэр Ульяна Романова салайааччылаах инбэлииттэри үлэнэн хааччыйар «Кыым» диэн тэрилтэ баарын, онно үлэтэ суох дьон атах таҥаһын тигэллэрин истибитэ. Уруккуттан иистэнэр идэлээх Аннаны дьүөгэтэ ол саҥа тэрилтэҕэ баран үлэлээн көрөргө сүбэлээбитэ. Атахтарын нэһиилэ соһон хаамар киһи үлэлиир баҕаттан атахтарын аа-дьуо эрчийэн, бөһүөлэккэ бэйэтэ сылдьар буолбута. Анна Барашкова инбэлииттэр уопсастыбаларын бэрэссэдээтэлэ Ульяна Романовалыын биир сүбэнэн үлэлээбиттэрэ.

Сотору кэминэн Ульяна Романова ыарахантан толлон турбат, дьону-сэргэни кытары биир тылы түргэнник булар иистэнньэҥи бэйэтин оннугар инбэлииттэр уопсастыбаларын салайарга эппитэ.

Онон Анна Барашкова улуус мунньаҕын быһаарыытынан «Кыым» хааччахтаммыт эппиэтинэстээх тэрилтэни салайар буолбута. Предпринимательство чэрчитинэн үлэлиир буолан, саҥа фонда тэриллибитэ, онон субсидия ылар кыахтаммыттара.

Хаһан да кумааҕыны ырыыппалаабатах киһи доруобуйаларыгар хааччахтаах дьон уопсастыбаларын салайар буолан хаалбытым, биллэн турар, миэхэ олус соһуччу этэ. Салайааччынан анаммыт киһи, тугу үлэлиэхтээхпин да билбэт этим. Арай бииргэ үлэлиэхтээх, сүбэ-ама ылыахтаах дьонум, тэрилтэлэрим испииһэктэрин туттаран кэбиспиттэрэ. Өрөспүүбүлүкэттэн үбүлэнэр тэрилтэ салайааччыта улууспар хас инбэлиит, ыарыһах оҕо баарын, кинилэр тугунан дьарыктаналларын биэс тарбаҕым курдук билиэхтээҕим.

«Кыымҥа» сүбэбитин холбоон былааннаахтык үлэлиибит. Ким туох дьоҕурдааҕынан көрөн, улууска да, өрөспүүбүлүкэҕэ да араас дьаһалларга кыттабыт. 2012 с. муниципальнай управлениены кытары үлэлэһэн, «Доступная среда» бырагыраамаҕа киирбиппит. Онон сөптөөх өйөбүллээхпит.

Доруобуйаларыгар хааччахтаах дьоҥҥо ыытыллар спортивнай уонна культурнай фестивальга сыл аайы кыттабыт. Улуустар икки ардыларынааҕы 11-с фестиваль былырыын Бэрдьигэстээххэ буолбута. Манна киин уонна илин эҥэр улуустартан 400-чэ киһи кэлбитэ. Кыттааччылар спорт 8 көрүҥэр күрэхтэспиттэрэ. Үгэскэ кубулуйбут маннык фестиваль доруобуйаларынан хааччахтаах дьон биир саамай күүтүүлээх чаҕылхай бырааһынньыктарынан буолар. Кыттааччылар Горнай улууһа хаһан да, ханна да ыытыллыбатах үчүгэй тэрээһиннээх фестивалы ыыппытыгар ис сүрэхтэриттэн махтаммыттара, билиҥҥэ диэри өйдүү-саныы сылдьаллар.

Биһиги улууспут хамаандата 2012 с. ыытыллыбыт спартакиадаҕа – бастакы, 2014 с. төрдүс миэстэни ылбыта. Улууспут дьаһалтата, социальнай управление биһигини сөптөөхтүк өйүүр. Бу аҕыйах хонуктааҕыта Дьокуускайтан инбэлииттэр спортарын ассоциацията, «Харысхал» аһымал фонда кэлэн бардылар. Кинилэри кытары бииргэ үлэлииргэ дуогабар түһэристибит. «Харысхал» салайааччыта Вера Душкевич икки күннээх семинары ыытан, күүс-көмө буолан барда, – диэн Анна Барашкова кэпсиир.

Итинник семинардартан, үөрэхтэртэн доруобуйаларыгар хааччахтаах дьон туһаттан атыны ылбаттар. Атын улуустар үөрүйэхтэрин үллэстэллэр, дьиэҕэ олорор киһи кыратык да дьарыктаах буоларыгар наадалаах үүтү-хайаҕаһы көрдүүллэр. Ол курдук, горнайдар атах таҥаһын сыаҕын сэргэ парикмахерскай арыйан үлэлэтэллэр. Уопсастыба чилиэнэ Юрий Александров дьону уонна тэрилтэлэргэ сылдьан, хаартыскаҕа түһэрэн абыраабытын туһунан нэһилиэнньэ кэпсэтэрин истэн аһарбытым оруннаах буолла. Юрий Александров хаартыскаҕа түһэриинэн дьарыктанан, уопсастыба үлэтигэр быһаччы кыттар, уопсастыба хааһынатыгар кыра да буоллар, дохуот киллэрэ турар.

Оттон салайааччы Анна Барашкова доруобуйатыгар хааччахтаах хас биирдии киһи «Кыымтан» саҕыллан, бэйэтигэр туох эрэ туһалааҕы буларын, уопсастыба үлэтигэр тус кылаатын киллэрэрин туһугар бэһис сылын туруулаһан үлэлиир.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 938 Источник: Газета "Саха Сирэ" Автор: Надежда Егорова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ