Барыта 3 камааһынан, 9 күн айаннаан этэҥҥэ сүөһү төрдө буолар сирдэрин буллулар. Эппиэтинэстээх улэни Хайахсыт нэһилиэгиттэн тыа хаһаайыстыбатын специалиһа В. Борисов, улуустааҕы ветеринарнай управленияттан Д. Кириллин толордулар. Бу үөрүүлээх тэрээһиҥҥэ сахалыы сиэри-туому эбэн, нэһилиэк кырдьаҕас олохтооҕо Н.Г. Михайлов алгыс тылынан алҕаан, аал уот иччитин алаадьылаах саламаатынан айах тутта. Кэлбит ыалдьыттар да, специалистар да саҥа сүөһүлэр туруктара үчугэйин бэлиэтээтилэр. Аны саас муус устар ыйга эбии 100 ыанньык сүөһү кэлэрэ былааннанар. Онтон бу кэлбит сүөһүлэр саҥа аныгылыы бырайыагынан тутуллубут хотоҥҥо биир бастакынан киириэхтэрэ.
Биһиги улууспутугар 30-ча сыл устата маннык үрдүк үүтү биэрэр ынах сүөһүнү тас сиртэн атыылаһыы оҥоһулла илик. Маныаха, бу үтүө хамсааһын үгүс көрдөрүүнү биэрэн, үлэҕэ-хамнаска туһалаах дьайыыны таһаарыа диэн эрэниэҕи баҕарыллар.
Бу үөрүүлээх тэрээһин кэнниттэн улуус баһылыга А.Т. Ноговицын салгыы Мындаҕаайы нэһилиэгэр сүүрүк сылгыларынан дьарыктанар Д. Осиповка сырытта. Санатан этэр буоллахха, улууспут сүүрүк аттара урукку өртүгэр Дьокуускай куоракка кыстаан, көрүллэн-истиллэн турбут буоллахтарына, быйылгыттан бэйэбитигэр кыстыыллара былааннанна. Дьонно сэргэҕэ киэҥ аатынан биллэр Тускул, Санта, Байтал, Гармоника курдук аттарбыт этэҥҥэ кыстыгы туораан, аны сайын сылгыһыт, Социалистическай Үлэ Геройа Р. И. Константинов үбүлүөйдээх ыһыаҕар сыыдамнык сүүрэн, инники күөҥҥэ тахсыахтара диэн эрэлбит улахан.
Комментарии
Авторизация на сайте через социальные сети