Үс боксалаах, икки этээстээх саҥа таас баһаарынай депо оройуон дьаһалтата Саха Өрөспүүбүлүкэтээҕи судаарыстыбаннай баһаары утары охсуһар бюджетнай тэрилтэни кытта бииргэ үлэлэһэн туттарбыт.
Өлөөн олохтоохторун үөрүүлэрин үллэстэ Дьокуускай куораттан СӨ баһаары утары охсуһар сулууспатын начальнига Иннокентий Николаев, судаарыстыбаннай баһаарынай сулууспа отделын начальнига Анатолий Протопопов, СӨ нэһилиэнньэтин олоҕо бөҕө туруктаах буолуутун хааччыйар судаарыстыбаннай комитет эппиэттээх үлэһитэ Василий Трофимов анаан-минээн кэлбиттэр.
Саха Өрөспүүбүлүкэтин гимнин доҕуһуолунан киирэр ааҥҥа аалай лиэнтэни быһар быраап Саха Өрөспүүбүлүкэтин баһаары утары охсуһар сулууспатын начальнигар Иннокентий Николаевка, Өлөөн эбэҥки национальнай оройуонун дьаһалтатын баһылыгын бастакы солбуйааччы Спартак Илларионовка, Өлөөн национальнай нэһилиэгин дьаһалтатын баһылыгын солбуйааччы Саргылаана Алексееваҕа, баһаары утары охсуһар чаас начальнигар Прокопий Васильевка бэрилиннэ.
Бу бэлиэ күҥҥэ анаммыт үөрүүлээх мунньахха СӨ баһаары утары охсуһар судаарыстыбаннай сулууспатын начальнига Иннокентий Николаев оройуон баһаары утары охсуһар чааһын үлэһиттэрин саҥа баһаарынай чаас дьиэтэ үлэҕэ киирбитинэн итиитик-истиҥник эҕэрдэлээн туран, Өлөөннөөҕү баһаары утары охсуһар чаас бастыҥ үлэһиттэригэр биэдэмистибэ наҕараадаларын үөрүүлээх быһыыга-майгыга туттартаата.
Ол курдук өрөспүүбүлүкэтээҕи судаарыстыбаннай баһаарынай сулууспа Бочуотунай грамоталарынан Егор Николаев, Марианна Степанова, Гаврил Ушницкай уонна да атытар наҕараадаланнылар. Салгыы Иннокентий Николаевич Саха Өрөспүүбүлүкэтин баһаары утары охсуһар судаарыстыбаннай сулууспатын аатыттан баһаарынай депо үлэҕэ киирэрин хааччыйыыга бииргэ үлэлэспит оройуон уонна нэһилиэк дьаһалталарыгар, хаһаайыстыбаннай тэрилтэ салайааччыларыгар махталын биллэрдэ.
Үөрүүлээх тэрээһиҥҥэ оройуон дьаһалтатын баһылыгын бастакы солбуйааччы Спартак Илларионов, Өлөөн национальнай нэһилиэгин дьаһалтатын баһылыгын солбуйааччы Саргылаана Алексеева, Өлөөннөөҕү уот ситимин начальнига Андрей Жирков, ОДьКХ директора Николай Кириллин, оройуон Сэбиэтин «Суглан» депутата Алла Петрова, культура салаатын эппиэттээх үлэһитэ Васса Михайлова, үөрэҕирии салаатын бэрэстэбиитэлэ Валентина Ушманова, полиция отделын начальнига Л.Г. Саввинов, «Эннэкээн» уһуйаан сэбиэдиссэйэ Дария Боескорова уонна да атын оройуон тэрилтэлэрин бэрэстэбиитэллэрэ кыттыыны ыллылар.
Оҕо музыкальнай оскуолатын иитиллээччилэрэ уонна оройуон уус-уран самодеятельноһын айар бөлөхтөрүн бэрэстэбиитэллэрэ үөрүүлээх тэрээһини киэргэттилэр.
Түмүккэ оройуон баһаары утары охсуһар чааһын салайааччыта Прокопий Васильев кэлэктиибин аатыттан Саха Өрөспүүбүлүкэтин баһаары утары охсуһар судаарыстыбаннай сулууспатын салалтатыгар, Өлөөн оройуонун дьаһалтатыгар оройуоннааҕы баһаары утары охсуһар чаас дьиэтин тутан үлэҕэ киллэрбиттэрин иһин махталын биллэрдэ уонна сөптөөх үлэлиир усулуобуйа тэриллибитинэн баһаары утары охсуһар үлэни саҥа таһымҥа таһаарарга бигэ эрэллээҕин биллэрдэ.
Комментарии
Авторизация на сайте через социальные сети