Урукку сылларга «Эн миигин умнумаар, Сэргэлээх», «Сэргэлээҕим уопсайа», «Сэргэлээх киэһэлэрэ» ырыалар хас биирдии устудьуон уоһуттан түспэккэ ылланар эбит буоллаҕына, билигин Вася айбыт «Эппиэккин күүтэбин» ырыата билиҥҥи Сэргэлээх гимнэ диэтэхпинэ, сыыспатым буолуо.
- Ырыа эйгэтигэр соһуччу киирбитим. Устудьуоннуохпар диэри гитараҕа сатаан оонньообот да, ыллаабат да этим. Уопсайбар уоллуун-кыыстыын бары гитараҕа оонньуур этилэр. Ону көрөн сөҕө уонна ымсыыра санаабытым. Санаабын доҕотторбор эппиппэр, аҕыйах аккорду көрдөрөн биэрбиттэрэ. Онтон салгыы талкыйан бэйэм оонньуурга үөрэммитим. Иккис кууруска үөрэнэ киирэн баран, аҕам гитаратыгар оонньуу олорон өйбөр ырыа матыыба киирэн хаалбыта. «Ырыа тахсыах курдук буолла ээ» диэммин хоһоон суруйа, тыллары тала сатаабытым да, кыаллыбатаҕа. Оннук ол матыыбы өйбөр хатаан кэбиспитим. Айар дьоҥҥо иэйии киирэр дииллэр дии, испэр сэмээр ону күүтэрим. Мин санаабар, иэйии диэн таптал, истиҥ сыһыан, долгуйуу буолар. Бастаан олоххо буолбут таптал остуоруйаларын санааммын, ол туһунан ырыа айарга санаммытым. Син балайда кэм ааспытын кэннэ чуумпуга соҕотох олорон эрэ сүүрбэччэ мүнүүтэнэн хоһооммун суруйан бүтэрэн кэбистим. Дьэ, уонна матыыппар уган биэртим. Бастаан утаа кимиэхэ да иһитиннэрбэккэ бэйэм ыллыырым. Онтон алҕаска доҕотторум истэннэр соһуйбуттара. Хас да сыл оннук мээнэ ыллыы сылдьыбытым, онтон устуудьуйаҕа уһултаран интернеккэ укпутум. Сорох дьон бу ырыаҕа бэйэбин буллум диэччилэр. Хас биирдии устудьуоннаабыт эдэр киһи таптал иэйиитин билэр, романтика салгыныгар уйдарар. Онон ханнык баҕар киһи бу ырыаны иһиттэҕинэ устудьуоннаабыт кэрэ сылларын саныыра буолуо.
- Василий, ким эппиэтин күүтэҕиний?
- Хомойуох иһин, ырыабын кимиэхэ да анаабатаҕым, дьиҥэ, ким да эппиэтин күүппэтэҕим... Мин устудьуоннаабыт сылларым умнуллубаттык аастылар. Сэргэлээххэ атаарар хас биирдии күммүттэн дуоһуйабын, астынабын. Үөрэнэрбиттэн буоллун, доҕотторбун-атастарбын көрсөрбүттэн, баҕар соҕотох уопсайбар гитаралыы олорорбуттан, Сэргэлээх устун хаамарбыттан наһаа дьоллонобун. Бэйэм биир сиргэ олорорбун сөбүлээбэппин, төһө кыалларынан тэрээһиннэргэ кытта, сүүрэ-көтө сылдьарбын ордоробун. Ырыабын маннык истиэхтэрэ, сэҥээриэхтэрэ дии санаабатаҕым. Эдэр айар куттаах киһи буоларым быһыытынан бу ситиһиим миигин кынаттыыр. Инники олохпор былаан бөҕөлөөхпүн. Талбыт идэбинэн учууталлыахпын баҕарабын.
Гитара – ыччат арахсыбат аргыһа. Биир бэйэм «Эппиэккин күүтэбин» ырыаны истиэхпиттэн, кырдьык да Сэргэлээххэ атаарар аҕыйах хаалбыт кэммин умнуллубаттык атаарарга дьулуспутум. Вася айбыт ырыата билиҥҥи эрэ көлүөнэ устудьуоннарга буолбакка, сыл аайы оҕолору Сэргэлээххэ ыҥыра, угуйа турарыгар баҕарабын.
Комментарии
Авторизация на сайте через социальные сети