ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
31 декабря 2015, 11:35

Саха Өрөспүүбүлүкэтин Ил Түмэнин бэрэссэдээтэлэ Александр Жирков Саҥа дьыллааҕы эҕэрдэтэ

Ытыктабыллаах Саха сирин олохтоохторо! Бу күннэргэ биһиги ааһан эрэр сыл түмүгүн таһаарабыт. Хас биирдии киһи олоҕор туох уларыйыы тахсыбытын, өйүгэр-санаатыгар ордук чаҕылхайдык хатаммыт түгэннэри саныыр. Быйылгы сылга биһиэхэ кэккэ ситиһиилэр да, кыаллыбатах да өрүттэр бааллар. Олохпут оҥоһуута оннук - барыта эриэ-дэхси буолбат. Киһи-аймах олорорун тухары кэрэҕэ тардыһар, үчүгэйи эрэнэ күүтэр, сырдык ыраланар. Дьон-сэргэ, дойду, судаарыстыба – барыта биир ситимнээх, тэҥ оҥкуллаах.

photoByWidth&id=53428&width=1000

Ааһан эрэр сыл Саха Өрөспүүбүлүкэтин парламеныгар күүрүүлээх, түбүктээх буолла. 2015 сылга өрөспүүбүлүкэ экономикатын, социальнай эйгэтин иннигэр турбут сыал-сорук туолла диэн бэлиэтээн этэр тоҕоостоох. Уһук Илин регионугар үгүс хайысхаҕа бастыҥ көрдөрүүлэри ситистибит. Парламент ааһан эрэр сыл бюджетын, судаарыстыбаннай бырагыраамалар туолууларын хонтуруоллаата. Өрөспүүбүлүкэ интэриэһин туһугар биһиги Саха Өрөспүүбүлүкэтин Ил Дарханын, Бырабыыталыстыбатын кытта таһаарыылаахтык хардарыта дьайсан үлэлээбиппит түмүгэр үтүө көрдөрүүлэри ситистибит. 

Ил Түмэн Федеральнай Мунньах таһымыгар үлэни күүһүрдэн, сенатордары, Судаарыстыбаннай Дума депутаттарын кытта сокуоннары көҕүлээһиҥҥэ бииргэ үлэлэһэр. Атын субъектары кытта Уһук Илин регионун уонна Арктика сирин-уотун сайдыытын стратегиятын чопчулаан, өрөспүүбүлүкэ интэриэһин туруулаһабыт. 

Парламеннар икки ардыларыгар сибээһи салгыы бөҕөргөтөбүт. Соторутааҕыта Нижнэй Новгород уонна Санкт-Петербург Сокуону оҥорор Мунньахтарын кытта бииргэ үлэлииргэ сөбүлэһии түһэристибит. «Россия Хотугулуу-Арҕааҥы парламеннарын ассоциацията» парламеннар икки ардыларынааҕы холбоһук уонна «Уһук Илин уонна Забайкалье» парламеннар ассоциацияларын мунньаҕа ыытыллыбыта. Манна барыта холбоон Россия 22 субъега – дойдубут бары регионнарын түөрт гыммыт биирэ кытынна. Икки ассоциация кыаҕын туһаныы сокуону оҥорууга уонна ситэриилээх былаас федеральнай уорганнарыгар биһиги интэриэстэрбитин туруулаһыыга көмөлөөх буолуо. 

Партнердуу субъектар үгүстэрэ биһиги Саха сирин 13 арктикатааҕы оройуонун Россия Федерациятын Арктикатааҕы сирин-уотун састаабыгар киллэрии, Хотугу муора суолун сайыннарыы, промышленнай тэрилтэлэргэ олохтоох кадрдары үлэлэтии, энергетикэҕэ уонна хоту дойдуга таһаҕаһы тиэйиигэ көрсөр ыарахаттары быһаарыы, уустук сырыылаах сиргэ медицинскэй көмөнү тэрийии боппуруостарын туруорсууга биһигини өйүүллэр. 

«Тыа хаһаайыстыбатын сайыннарыы туһунан» өрөспүүбүлүкэ сокуонун барыла бастакы ааҕыыга ылыллан, салгыы ситэрэн оҥоһуллар. «Уһук Илиҥҥи сир гектарын» туһунан федеральнай сокуон барылыгар күүскэ үлэлэһэбит. Өрөспүүбүлүкэ бу сокуон түһүмэҕинэн сыыйа киириитин туруорсар. Ол курдук, өрөспүүбүлүкэ олохтоохторо сир учаастагын бастакынан ылар бырааптаналларын, итиэннэ Россия Федерациятын Хотугу, Сибиир уонна Уһук Илин аҕыйах ахсааннаах төрүт омуктарын түөлбэлээн олор сирдэрин кыраныыссатыгар киирсэр сир бу сокуон барылыгар киллэрбэт, саҥа сокуон олоххо киириитигэр субъектарга тутаах боппуруостары быһаарар быраабы биэриини туруорсабыт. 

Күндү Саха сирин олохтоохторо! 

Саҥа дьылы хас биирдиибит сырдык санаалаах, инникигэ эрэллээх, үтүө ыралаах көрсөр. Баҕа санаабыт туолан, олохпут тубустун, Ийэ дойдубут бөҕөргөөтүн. 

Эһиэхэ Саҥа Дьылга барыгытыгар табыллыыны, үгүс ситиһиини уонна үтүө туругу баҕарабын! 

Саҥа 2016 сылынан уонна Ороһуоспанан! 

Александр Жирков,

Саха Өрөспүүбүлүкэтин Ил Түмэнин бэрэссэдээтэлэ.

 

 

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 648 Источник: Пресс-служба Ил Тумэна Автор: СИА Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ