Гаврил Мохначевскай, «ЭПЛ Даймонд» хампаанньа ювелир-модельера:
- Үс сыллааҕыта Москваҕа сыах аһыллыбытыгар саха уолаттарын үлэҕэ ыҥырбыттара. Оҥорон таһаарыы улаатан, бриллиант олордооччулар, алмааһы кырыылааччылар, ювелирдар сыыйа-баайа элбээбиппит.
Манна дьиэ куортамнаан олоробун. Хамнас үчүгэй. Кыра эрдэхпиттэн уһанабын. Нэһилиэгим маастардарыгар уһуллубутум. Оскуолаҕа уруһуйга Анна Мандарова үөрэппитэ. 1993 сыллаахха Былатыан Ойуунускай 100 сыллаах үбүлүөйүгэр кэлбит дойду президенэ Борис Ельциҥҥэ бэлэхтээбит үрүҥ көмүс курдарын оҥорбут норуот маастара Федор Чээрин эмиэ мин учууталым. Бастаан саха быһаҕын оҥорорум. Билигин киэргэл моһуонун, быһыытын-таһаатын кумааҕыга түһэрэбин, компьютерга киллэрэбин. Мин моделбынан маастардар ытарҕа, биһилэх, бөҕөх о.д.а. оҥороллор. Хомойуох иһин, хампаанньабыт оҥоһуктарын патеннаабат – кытайдар харгыһа суох «уораллар». Баайаҕаҕа ыһыахха тиийэ сылдьан, чуо мин моделбынан оҥоһуллубут кытай ытарҕатын кэтэ сылдьар кыыһы көрбүтүм.
Билигин үлэ баһаам. Тэрилтэбит Европа ырыынагар тахсаары киэргэл эгэлгэтин оҥорторор. Дьиэбин ахтабын, тыаҕа талаһарым күнтэн күн күүһүрэр. Сыахпыт кэлэктиибэ сахалыы эйгэлээх. Баайаҕаттан иккиэбит, онон үчүгэй. Саха оҥоһугун хампаанньатыгар сахалар үлэлиэхтээхтэр дии саныыбын. Оччоҕуна эрэ, биһиги табаарбыт бренд быһыытынан сыаналаныа.
Манна даҕатан эттэххэ
Быйылгыттан хампаанньа Казахстан, Германия, Хорватия уонна Англия ырыынагар таҕыста. Атыы-эргиэн, оҥорон таһаарыы, алмааһы кырыылааһын, алмааһы хостооһун эйгэтигэр үлэлиэн баҕалаах дьону үлэҕэ ыҥырар. Резюмены chusovskayaov@epldiamond.com аадырыска хомуйаллар. Талааннаах, баҕалаах, кыахтаах ыччаты күүтэллэр.
Комментарии
Авторизация на сайте через социальные сети