Вова кыра эрдэҕиттэн дуобатынан үлүһүйэр. Дуобат хаамыыларын эбэтэ Фатина Андреева үөрэппитэ. Уол эһэтэ Ворошил Андреев I разрядтаах дуобатчыт этэ. Онон уолга дуобакка оонньооһун удьуорунан бэриллибит дьарык диэххэ эмиэ сөп.
Вова 1-кы кылаастан ыла кииҥҥэ кэлэн, дуобат куруһуогар дьарыктанар. Тренерэ – Валерий Сидоров. Уол талааннаах тренерин үөрэтиитинэн-такайыытынан элбэх ситиһиилэннэ. Ол курдук нэһилиэккэ, улууска буолар көрэхтэһиилэргэ мэлдьи чемпионнуур. Өрөспүүбүлүкэҕэ тиийэ баран көрэхтэһэр. 2013 сыллаахха призердаабыта. Оттон быйыл сайын Сочи куоракка үөрэнээччилэр ортолоругар дуобакка Россия чемпионатыгар ситиһиилээхтик кыттан кэлбитэ. Бу чемпионакка Вова 5 боруонса мэтээл хаһаайына буолбута.
Уол дуобатынан эрэ буолбакка, спорт атын көрүҥнэринэн эмиэ дьарыктанар. Тустууга, сүүрүүгэ бириистээх миэстэлэргэ сылдьар. Иллэҥ кэмигэр футболлуурун сөбүлүүр.
Вова спорка ситиһиилэрин дьонун кытта бэлиэтиир үөрүүлээх тэрээһинигэр элбэх киһи ыалдьыттаата. Ол курдук, улуус дьаһалтатыттан ФКУ начальнига, улуустааҕы дуобат федерациятын бэрэссэдээтэлэ Евгений Егоров, Сунтаардааҕы оҕо спортивнай оскуолатын директора Александр Михайлов, кылааһын салайааччыта Наталия Васильева уо.д.а. уолга спорка ситиһиилэринэн эҕэрдэлээн туран, инникитин да элбэҕи эрэнэллэрин эттилэр. Бу күн уол спорка ситиһиилэрин кэпсиир быыстапка тэрилиннэ.
Комментарии
Авторизация на сайте через социальные сети