Сангаар араас омук мустан олорор бөһүөлэгэ, онон олохтоохторго, оҕолорго өйдөнөр буоллун диэн судургу ис хоһоонноон, нууччалыы саҥардан таһаардылар. Туруорууга оскуола учууталлара, үөрэнээччилэрэ, төрөппүттэрэ – барыта 70-ча киһи омугуттан тутулуга суох кытынна. Дириэктэр А.Е. Уваровская бэйэтинэн кыттан дьонун көҕүлээтэ. Сценарий тылын-өһүн чочуйууга нуучча тылын учуутала С.Е. Сметанина, режиссуратыгар алын кылаас учуутала А.П. Каратаева, атрибуттары, көстүүмнэри, киэргэтиини бэлэмнээһиҥҥэ технология учууталлара И.Н. Милюхин уонна Н.И. Жиркова үлэлээбиттэр. Дьоҥҥо үчүгэйдик иһилиннин диэн аныгы тыас-уус технологиятын бэркэ туһаммыттар. Биллэн турар, маны ким да кинилэргэ бэлэмнээн биэрбэтэҕэ, музыкатыгар тиийэ барытын бэйэлэрэ көрдөөн, булан-талан наардаабыттар. Бастаан биир ый устата салааларынан тус-туспа бэлэмнээбиттэрэ, бүтэһик нэдиэлэҕэ эрэ күргүөм репетиция ыытыллыбыт. Барыта таҥыллан-туруоруллан, көрөөччү иннигэр тахсар күүтүүлээх күннэрэ үүммүт...
Олоҥхоһут оллоонноон олорон этэн-тыынан саҕалыырын кытта, остуоруйа олоҕо саҕаламмытынан барда. Орто дойду дьоно уу нуурал олохторун аллараттан абааһы уола Аҥар харах Арсаала (Рындя Женя) тахсан айгыратар, Аргый Тойон (Л.Д.Марков) уонна Аргыйа Хотун (Н.К.Иванова) кэрэ кыыстарын Арылы Куону (Лиля Левина, 9 кыл.) былдьаан-талаан илдьэ барар. Орто дойду дьонун көмүскэлигэр Үрүмэччи маҥан аттаах Эрэт Бэргэн бухатыыр (Толя Сивцев, 11 кыл.) турунар. Бухатыыры үөһэ дойду айыы намыһын удаҕаттара, сэттэ кыталык кыргыттара алҕаан арчылаан ыыталлар, оттон тимир уустара сэбин-сэбиргэлин бэлэмнээн биэрэллэр. Бухатыыр Аҥар харах Арсааланы, Арбай Куочайы (А.Ю.Грицай), абааһы аймаҕын барытын өлөрөн-өһөрөн кыыһы аҕалан дьонугар туттарар, кэргэн биэрэллэригэр көрдөһөр.
Саха олоҥхото “орто дойду дьоно” диэн бэрт дириҥ ис хоһоонноох этэн кэбиһиилээх. Ол хайа да омук олоҥхону атыҥыраабакка ылынарыгар улахан төрүөт буолар эбит. Көрөөччүлэр да, кыттааччылар да бары астыммыттара, сэргээбиттэрэ сирэйдэригэр-харахтарыгар көстөр.
Бухатыыр уол Толя Сивцев өрүкүйбүтэ ааһа илик: “Буолаҕын диэн быһа-бааччы этэн кэбиспиттэрэ. Бастаан куттаммытым, онтон интэриэһиргээн бардым. Өссө да олоҥхоҕо оонньуом этэ”.
Сангаар олохтоохторо олоҥхону аан бастаан көрбүттэрин, наһаа интэриэһиргээбиттэрин кэпсииллэр. Чахчы да, артыыстар буолбакка, бэйэлэрин оҕолоро, билэр дьонноро, учууталлара оонньоон, бу ханна эрэ ыраах баар эпос чугаһыы, аттыларыгар баар буола түстэҕэ.
Дириэктэр Айталина Егоровна бу Литература сылын, Олоҥхо уон сылын түмүктүүр бэлиэ тэрээһиммит буолар, диэтэ. Оттон кэлэктиип аны саас Мастаахха ыытыллар өрөспүүбүлүкэтээҕи күрэскэ бу олоҥхонон кыттар, кэлин табылыннаҕына английскай да тылынан туруорар былааннаахтарын иһитиннэрдилэр.
Комментарии
Авторизация на сайте через социальные сети