РФ Силиэстийэлиир кэмитиэтин Саха сиринээҕи управлениетын (РФ СК ССУ) пресс-сулууспата иһитиннэрбитинэн, Алданнааҕы отделга РФ Холуобунай кодексатын 109-с ыст. 1 чааһынан көрүллэр буруй бэлиэтэ баарынан, холуобунай дьыала тэриллэн, силиэстийэлэнэ сылдьар. Ол эбэтэр, сэрэҕэ суохтан киһини өлөрүү диэн. Дьыала бултуур үүтээн таһыттан түөскэ ытыллыбыт 54 саастаах киһи өлүгэ көстүбүт чахчытынан тэриллибит.
Барыллаан быһаарыынан, бу дьыл алтынньы ыйын ортотугар Алдан икки олохтооҕо Улахан күөлгэ кустуу сылдьыбыт. Биирдэрэ, 63 саастааҕа, арай түүн уһуктан иһиттэҕинэ, үүтээн таһыгар туох эрэ тыаһыыр эбит. Онуоха тыатааҕы сылдьар дии санаан, «ТОЗ-34Р» саатын ылан, тыас кэлэр сирин диэки туһаайан ыппыт. Онтон таһырдьа тахсан көрбүтэ – үүтээн аанын таһыгар түөһүгэр таптарбыт доҕоро номнуо тыына быстан сытаахтыыр эбит. Алдьархайга түбэспит булчут туох буолбутун билэр киһитигэр кэпсээбит, ону ол киһи уорганнарга биллэрбит.
Маннык хомолтолоох, тустаахтарга олус ыарахан түбэлтэлэр, үөһэ этэн аһарбытым курдук, хам-түм тахсаллар. Ол туһунан суруйан турардаахпын. Ити быһылаантан сэдиптээн, өссө икки дьыаланы санаан кэллим.
Ол курдук, хас да сыллааҕыта Бүлүүлүүр суолга, кыһыҥҥы аам-даам тымныыга бултуу сылдьан, Дьокуускай куорат Гордуматын депупата ФСБ-га үлэлиир доҕорун алҕас ытан өлөрбүтэ. Холуобунай дьыала онно эмиэ 109-с ыст. 1 чааһынан тэриллибитэ. Силиэстийэ быһаарбытынан, депутат мастар быыстарынан туох эрэ элэҥниирин көрөн, туртас дии санаан ыппыт этэ. Сыыспат буоллахпына, ол дьыала суукка тиийбэтэҕэ, өрүттэр өйдөһөннөр, буруйдаах киһи эмсэҕэлээбит дьиэ кэргэнигэр хоромньу төлөөбүтэ.
Оттон 2014 сыл сэтинньи 5 күнүгэр Хаҥалас улууһун Улахан-Аан сэлиэнньэтиттэн 30 км ыраах сытар Харыйалаах Үрэх диэн сиргэ Москва куораттан уоппускатыгар сынньана кэлбит Россия Миграционнай сулууспатын Москва куораттааҕы управлениетын начальнигын солбуйааччы, ис сулууспа полковнига Николай Азаров суорума суолламмыта. Бу чахчынан эмиэ РФ Холуобунай кодексатын 109-с ыст. 1 чааһынан холуобунай дьыала тэриллибитэ. Суут быһаарбытынан, өлүөхсүт доҕоро, бөдөҥ тутуу фирматын салайааччыта, 41 саастаах Армен Закарян УАЗ массыына иһигэр олорон, иитиилээх карабин элбэрээгин алҕас таарыйан, аһаҕас аан таһыгар турбут Азаровы түөскэ ыппыт. Закарян доҕоругар тута маҥнайгы көмөнү оҥоро сатаабыт да, анараата сырдык тыына миэстэтигэр быстыбыт. Суут кинини ити ыстатыйанан буруйдааҕынан билинэн, 1 сыл 1 ыйга көҥүлүн хаарчахтыырга (көҥүлү быһыы буолбатах – В.М.) уурбута.
Киһини күҥҥэ түөрт уон моһол күүтэр диэн этэллэрэ өбүгэлэрбит. Оттон саанан-саадаҕынан сэбилэммит эр дьоҥҥо ити сэрэтии хас эмит төгүл күүһүрэр. Айылҕаҕа сылдьан, бэйэ-бэйэҕэ болҕомтолоох, сэрэхтээх буолар эбээһинэстээҕин булчут, балыксыт дьон бэйэтэ да бэркэ билэр буоллаҕа. Ол эрэн, итинник алдьархай син биир тахса турар.
РФ Холуобунай кодексатын 109-с ыст. 1 чааһа:
- Сэрэҕэ суохтан киһини өлүүгэ тиэрдии орто буруйга киирсэр. Накаастабыл миэрэтэ -- икки сылга диэри болдьоххо көннөрүнэр үлэҕэ ууруу, биитэр икки сылга диэри болдьоххо көҥүлү хаарчахтааһын, биитэр ити болдьоххо көҥүлү быһыы.
Суут накаастабыл миэрэни аныырыгар, сууттанааччы буруйу бастакытын оҥорбутун, кини киһи быһыытынан хайдаҕын итиэннэ сымнатар да, ыаратар да өрүттэри учуоттуур. РФ ХК 73-с ыстатыйатын туттан, усулуобунай миэрэ да аныан сөп. Ол эрэн, тургутар болдьох 6 ыйтан кыра буолуо суохтаах.
Комментарии
Авторизация на сайте через социальные сети