Дьокуускайтан Өксөкүлээх Өлөксөй аатынан Норуот айымньытын кииниттэн Любовь Шишигина, Олоҥхо институтуттан Варвара Обоюкова, оройуон салалтатын аатыттан Андрей Находкин, улуус культураҕа уонна духуобунай сайдыыга управлениетын начальнигын солбуйааччы Надежда Максимова, үөрэх управлениетын начальнигын солбуйааччы Вера Тимофеева эҕэрдэлээтилэр. «Олоҥхо дьиэтин» коллектива республикаҕа биир бастыҥ үлэлээх-хамнастаах буоларын, фольклору, олоҥхону-тойугу тарҕатыыга көҕүлүүр тэрээһиннэри тиһигин быспакка былааннаахтык ыытарын бэлиэтээтилэр. Олоҥхо уон сылын салгыы тэрээһиннээхтик, өрө көтөҕүллүүлээхтик, норуот тылынан уус-уран чыпчаалын үйэтитиигэ, сайыннарыыга өссө тэптэн үлэлэһэргэ ыҥырдылар.
Дьокуускайтан Олоҥхо театрын артыыһа Валентин Исаков, улууспутуттан Аркадий Захаров, Иван Григорьев, Аксинья Степанова, Айталина Моякунова, үөрэнээччилэртэн Төхтүртэн Муся Аммосова, Төхтүрдээҕи «Мичил» оҕо саадын иитиллээччитэ Сандаара Тарабукина (салайааччы Айталина Верховцева) итиэннэ Аллараа Бэстээхтээҕи «Сказка» оҕо саадын иитиллээччилэрэ (салайааччы Мария Герасимова) дьоҥҥо-сэргэҕэ биһирэммит олоҥхолортон быһа тардыылары бэрт сэргэхтик толортоотулар.
Аркадий Захаров: «Республикаҕа ыытыллыбыт Олоҥхо ыһыахтарыгар барытыгар сылдьан көрдүм-иһиттим, кытынным. Улуус-улуус аайы тэрээһинэ, дьон-сэргэ туттан-хаптан сылдьыыта, дьиэни-уоту туттуу, түһүлгэни тэринии уратытык көстөр. Сылтан сыл тупсан, ырааһыран иһэбит. Майаҕа эмиэ улахан хамсааһын таҕыста, Ураһалаахха бөдөҥ комплекс баар буолуута ‒ киэн туттуубут. Кэлэр да кэмнэргэ олоҥхоҕо ананар тэрээһиннэргэ барытыгар көхтөөхтүк кыттарга, эдэр олоҥхоһуттар үүнэн тахсан иһэллэригэр баҕарабын», ‒ диэтэ.
«Олоҥхо дьиэтэ» киин директора Евдокия Иванова олоҥхону үйэтитиигэ, тарҕатыыга көхтөөхтүк үлэлэһэр дьоҥҥо Махтал суруктары үөрүүлээх быһыыга-майгыга туттартаата.
Олоҥхо ассоциациятын чилиэннэрэ хоһоон аахтылар. Аллараа Бэстээхтээҕи «Айыллыы» фольклор бөлөҕө (салайааччы Аксиния Степанова) ырыаларынан-тойуктарынан, Төхтүртэн оҕо музыкальнай оскуолатын үөрэнээччилэрэ (салайааччы Анна Максимова) уонна Томтордооҕу сынньалаҥ киинин директора Игорь Игнатьев хомуска матыыптары толорон тэрээһини киэргэттилэр.
Комментарии
Авторизация на сайте через социальные сети