Сиинэҕэ «Эрэл» Культура-спорт киинэ олохтоохторго аанын тэлэччи аста

Сиинэҕэ аныгылыы матырыйаалынан тутуллубут Культура-спорт киинин аһыллыытыгар үгүс үрдүк сололоох ыалдьыт, элбэх киһи муһунна. Күндү ыалдьыттарынан Ил Түмэн бэрэссэдээтэлин 1-кы солбуйааччы А.А.Добрянцев, спорт миниистирэ М.Д.Гуляев, миниистири солбуйааччы РФ спордун үтүөлээх маастара, Олимпийскай оонньуулар боруонса призердара Г.Р.Балакшин, Хаҥалас улууһун баһылыга Г.Ю.Алексеев, улуус Мунньаҕын бэрэссэдээтэлэ Б.П.Протодьяконов уо.д.а буоллулар.

Нуучча фольклорун ырыата-тойуга, сахалыы айхаллаах алгыс мааныта толорулунна. Түөрт сылы быһа тутуллубут кииҥҥэ кырата суох өйөбүлү оҥорбут киһинэн Ил Түмэн дьокутаата, Сиинэ орто оскуолатын 1975 сыллаахха үөрэнэн бүтэрбит ытыктабыллаах киһибит Анатолий Добрянцев буолар.
- Хаҥалас улууһун баһылыгынан үлэлии сылдьан бу Сиинэ орто оскуолатын туттарбытым. Оттон дьокутаат быһыытынан бу Киин үлэҕэ киириитигэр көмөлөспүтүм. Онон, выпускник быһыытынан иитиллибит-үөрэммит иэспин төлөөтүм дии саныыбын. Сиинэттэн кэлиҥҥи сылларга күүстээх спортсменнар үүнэн таҕыстылар. Культура өттүн эттэххэ, «Реченька» норуот кэлэктиибэ кэлэр сылга тэриллибитэ 40 сылын туолар. Бу комплекс үлэҕэ киириитэ сэлиэнньэ олоҕор улахан туһалаах эрэ буолуоҕа, - диэтэ Анатолий Анатольевич.

Аалай кыһыл лиэнтэ быһылынна, символическэй күлүүс «Эрэл» КСК дириэктэригэр Егор Бараховка үөрүүлээх быһыыга-майгыга туттарылынна.
Эдэр дириэктэр үөрүүтүн маннык үллэһиннэ:
- «Эрэл» киин дьэ аһыллан, үөрүүбүт муҥура суох. Былааммыт улахан. Манна араас куруһуоктар үлэлиэхтэрэ. Хаҥаластааҕы оҕо спортивнай оскуолата үс тренер штатын көрбүтэ, спорт национальнай көрүҥнэригэр, чэпчэки атлетикаҕа уонна волейболга секциялар аһыллыахтара. Үөрэнээччилэри сэргэ ыччаттар, нэһилиэнньэ саастаах өттө физкультуранан, спордунан дьарыктаныахтара.

Киэҥ уораҕай аһыллыытын алгыһын кэнниттэн, Сиинэ олохтоохторо, оҕотуттан саастаах дьоҥҥо тиийэ, эрчимнээх үҥкүүнү толорон түмсүүлээхтэрин, тэрээһиннээх нэһилиэк буолалларын көрдөрдүлэр. Маны тэрийсээччилэртэн биирдэстэринэн олохтоох дьаһалта ыччат бэлиитикэтигэр исписсэлииһэ Николай Турахов буолар.
- Бастатан туран, элбэхтик сүүрэн-көтөн, кэпсэтэн туттарбыт киһибитигэр баһылыкпытыгар С.Ю.Логиновка уонна тутааччыларга махтанабыт. Бу Киин аһыллыыта чуолаан эдэр ыччакка олус үөрүүлээх. Урукку кэмнэргэ эдэр ыччат мустар сирэ, кулууп да спортивнай саала да суоҕа, онон билигин ыччат спорка да, култуураҕа да өссө көхтөөх буолуо дии саныыбын. Сиинэ урут-уруккуттан спортивнай нэһилиэк, - диэн санаатын үллэһиннэ Николай.
Дьон-сэргэ үөрүүтүн норуот ырыа-үҥкүү ансаамбыллара киэргэттилэр. Кэлбит ыалдьыттар бэлэх-туһах эгэлгэтин туттардылар, үлэлииргэ-хамныырга бары кыах барыта туһаайылынна.
Бүгүн «Эрэл» КСК үлэҕэ киирэн, ырыа култууратын, үгэстэрин, абыычайдарын илдьэ сылдьааччы “Реченька” кэлэктиип өссө тэтимирэн туран үлэлиэҕэ. Россияҕа, өрөспүүбүлүкэҕэ, кыраныысса таһыгар араас таһымнаах куонкурустар, фестиваллар кыайыылаахтара, лауреаттара «Сиинэ кустуга» оҕо талба үҥкүү ансаамбыла салгыы Сиинэлэрин аатырдарга үлэлиэҕэ. Сиинэттэн,өрөспүүбүлүкэбит спорт национальнай көрүҥнэригэр абсолютнай лидерэ, Россия таһымнаах күрэхтэһиилэр кыайыылаахтара Егор Филиппов куорсун анньынан кыырайа көппүтэ. Инникитин да кыахтаах оҕолор өссө үүнэн тахсыахтара!