«Ньургуһун» уолаттара - «Дьулуур», «Кэнчээри» оҕолоро - «Кэнчээрилэр», «Тускул» - «Тыа уолаттара», «Төлкө» кыттааччылара «Байанайдаах булчуттар», «Кэскил» оҕо саадын иитиллээччилэрэ «Сонордьут уолаттара» ааттананнар биэс түһүмэххэ илин-кэлин түһүстүлэр.
Бастакы түһүмэххэ бэйэни билиһиннэрдилэр, манна кыттааччы тута-хапта сылдьыыта, саҥата-иҥэтэ, бэйэтин хайдах билиһиннэрэрэ барыта сыаналанна. Иккис түһүмэх – «Балыктааһын». Маһынан оҥоһуллубут тэҥ кээмэйдээх соболору быалаах күрүчүөгүнэн хаптардылар. Бу түһүмэххэ «кэнчээрилэр» саамай балыксыт уолаттардаах хамаанданан ааттаннылар. Үһүс түһүмэх - «Сыал ытыыта». Манна «дьулуурдар» уонна «кэскиллэр» иккилии очукуону ыланнар, бэргэн ытааччыларынан буолан үөрдүлэр. Төрдүс түһүмэх – «Илим сүөрүүтэ». Хамаандалар илими түргэнник сүөрүүгэ куоталастылар. Бары да түргэн-тарҕан туттуулаах балыксыт бэртэрэ буолан биэрдилэр. Бэһис түһүмэх уон тээбиринтэн ханнык мал булчукка сыһыаннааҕын таайыыга ананна. Бу да түһүмэххэ кырачааннар бултуу барарга бэлэмнээхтэрин көрдөрдүлэр.
Сүүрүүлээх-көтүүлээх күрэс түмүгүнэн үһүс миэстэҕэ Хоротооҕу «Кэскил» оҕо саадын «Сонордьут уолаттара» тигистилэр. Иккиһи 1 №-дээх «Ньургуһун» оҕо саадын «Дьулуур» хамаандата ылла. Оттон кыайыылааҕынан 5 №-дээх «Кэнчээри» оҕо саадын «Кэнчээри» уоланнара ааттананнар, кыайыы үрдүк үөрүүтүн биллилэр. Кыайыылаахтар махтал суругунан, түөскэ кэтэр мэтээлинэн, кубогынан наҕараадаланнылар.
«Эһиилги «Байанай» күрэскэ өссө элбэх оҕону хабан кытыннарыахпыт, уол аймах сылын аайы долгуйа күүтэр куонкурустарынан буолуоҕа», - диэн улуустааҕы үөрэх управлениетын оскуола иннинээҕи үөрэхтээһин салаатын сэбиэдиссэйэ Любовь Тумусова санаатын үллэстэр.
Комментарии
Авторизация на сайте через социальные сети