Бу акция ис хоһооно – хас биирдии киһи «Бичик» маҕаһыыннарыттан сертификат атыылаһан ылан, үөрэммит оскуолатыгар, улуус, нэһилиэк библиотекатыгар, тулаайах оҕолор дьиэлэригэр о.д.а. бэлэхтиэн сөп. Бу үтүө саҕалааһыны Ил Дархан Егор Борисов бастакынан өйөөбүтэ. Боростуой дьон эмиэ ити үтүө тэрээһиҥҥэ кыттыһан, оннооҕор пенсиялаах дьон Мэҥэ-Хаҥаластан Аркадий Захаров 15000 солк. суумалаах сертификаты тыа сирин библиотекатын фондата хаҥыырын туһугар биэрбитэ. Е.Т. Васильева, В.И. Петрова 3000 солк. сертификаты Бүтэйдээх «Чэчир» оҕо уһуйааныгар уонна Хорообут орто оскуолатыгар бэлэх ууннулар. Чурапчыттан Ньургун Попов Чыаппара библиотекатыгар 10 000 солк. сертификаты биэрэн, соһуччу үөрдүбүтэ. Ньурба 1 №-дээх оскуолата 10 000 солк. сертификаты туйгуннук үөрэммит, кыһыл көмүс мэтээлинэн бүтэрбит оҕолоругар биэрбитэ ыччаты ааҕыыга уһуйарга, ийэ тылга тапталы иҥэрэргэ утумнаах, кыһамньылаах үлэлэрин кэрэһилиир.
Мантан да атын дьон бу акцияҕа кыттыһан бэйэлэрин төрөөбүт оскуолаларын, нэһилиэктэрин библиотекаларыгар, дьонноругар-сэргэлэригэр үйэлээх бэлэҕи оҥордулар.
«Бичик» бары маҕаһыыннарыгар 3000 солк. үөһэ суумалаах сертификаттар атыыланаллар. Сертификат атыыласпыт, бэлэх оҥорбут үтүө санаалаах дьоҥҥо суруйааччылар уонна культура, үөрэх министиэристибэлэрин ааттарыттан Махтал сурук туттарыллар.
Бука бары бу акцияҕа көхтөөхтүк кыттыһан, кэрэни кэпсиир, үтүөнү үксэтэр саха сайдам кинигэтэ хас биирдии нэһилиэк аайы тарҕанарын, илииттэн илиигэ бэриллэрин ситиһиэҕиҥ!
Ааҕар киһи - билиилээх, билиилээх киһи - сайдыылаах, сайдыылаах киһи - ситиһиилээх! Кинигэ баар – барҕа баай, кинигэ – үйэлээх бэлэх!
Комментарии
Авторизация на сайте через социальные сети