„Амтан“ ырыынак аанын аалай лиэнтэтин улуус баһылыгын социальнай боппуруостарга солбуйааччы Светлана Третьякова, куорат дьаһалтатын баһылыга Варвара Оконешникова, тыа хаһаайыстыбатын управлениетын кылаабынай специалиһа Мария Шарина уонна улуус депутаттарын сэбиэтин АПК-ҕа хамыыһыйа бэрэссэдээтэлэ Дмитрий Винокуров быстылар.
Үөрүүлээх күн ырыынак арылларын өр сылларга турууласпыт, сүүрбүт-көппүт уонна ситиспит салайааччыга Михаил Явловскайга истиҥ эҕэрдэлэрин улуус уонна куорат салалталара тиэртилэр. Ол курдук, улуус дьаһалтатын уонна депутаттарын ааттарыттан баһылыгы социальнай боппуруостарга солбуйааччы Светлана Алексеевна сахалыы сиэринэн мас чороону туттарда.
Салгыы тылы куорат дьаһалтатын баһылыга Варвара Николаевна ылла. Улуус киинигэр бу курдук туһалаах уонна инники кэскиллээх ырыынак арыллыбытынан эҕэрдэлээн туран Михаил Ивановичка 100 тыһ. суумалаах сертификат туттарда, ону кытта кэлэр сылтан куорат бюджетыгар сыллата АПК-ны сайыннарыыга үп көрүөхпүт, бииргэ үлэлэһиэхпит диэн эттэ. Маны мустубут дьон дохсун ытыс тыаһынан уруйдаатылар-айхаллаатылар.
Тыа хаһаайыстыбатын управлениетын аатыттан Мария Александровна эҕэрдэлээтэ уонна „Компик“ маҕаһыынтан 5 тыһ. суумалаах сертификаты туттарда.
Оттон бу нэдиэлэттэн саҕалаан улуус бары нэһилиэктэриттэн тыа сирин аһын-үөлүн атыылыы дэлэгээссийэлэр кэлиэхтэрэ. Түмүгэр куорат олохтоохторо бэйэ бородууксуйатынан саҥа дьыллааҕы остуолларын киэргэтиэхтэрэ, оттон тыа сирин олохтооҕо аһын-үөлүн атыылаан эбии дохуот киллэриниэҕэ.
Комментарии
Авторизация на сайте через социальные сети