«Ыал эбэлэрэ, ийэлэрэ Болугурга баран Амма эбэ кытылыгар балаакканан сытан хонон-өрөөн кэллибит. Күөх сирэм минньигэс дьэдьэниттэн үргээтибит, эбэ кылыгырас ыраас уутугар сөтүөлээтибит, сибиэһэй салгынынан тыынныбыт, айылҕа кэрэтин көрдүбүт-иһиттибит, таас хайатыгар сырыттыбыт. Сынньана кэлбит дьоҥҥо Амма барахсан сирэ-уота туох баар кэрэтин төһө кыалларынан көрдөрдө диэн үөрэбит, астынабыт. Ол курдук, эҥинэ бэйэлээх кыраһыабай сибэккилэри хаартыскаларга түһэрдибит, сардааналаах кырдалга күөлэһийдибит, тыытыллыбат кэрэ айылҕаҕа моҕотой сүүрэкэлиирэ, мэкчиргэ соһуйбуттуу көрө-истэ олороро, туртас барахсан чэпчэки-чэпчэкитик ыстаҥалаан тиийэн кэлбитэ барыта ураты кэрэ. Аны киэһэ аайы суоппарбыт Борис Петров биһигини, саастаах дьону, сип-сибиэһэй минньигэс бэйэлээх балыгынан күндүлээтэ. Онон “күбэйдэр” билигин сайыммыт барахсаҥҥа, ама, астына күөлэһийбэтэхпит диир үһүбүөт дэһэбит. Бу курдук, киһи баҕардаҕына бэйэ төрөөбүт сиригэр-уотугар, дойдутугар сынньалаҥы хайдах баҕарар көмөлөөн тэрийэр кыахтаах», -- диэтэ чахчы да үөрбүт быһыынан.
Түмсүү кыттылаахтара Амма айылҕатыгар түспүт хаартыскаларын наардыыллар. Кинилэр тугу да сыыска-буорга түһэрбэккэ, маны барытын түмэн биир дойдулаахтарыгар кэпсииллэр, үлэлэрин-хамнастарын көрдөрөллөр. Кэнчээри ыччакка төрөөбүт айылҕабыт кэрэтин, туһатын сэһэргииллэр, харыстабыллаах сыһыаҥҥа такайаллар.
Комментарии
Авторизация на сайте через социальные сети