ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
9 июля 2015, 14:05

Гвардия сержана Василий Винокуровка өйдөбүнньүк туруорулунна


Василий Петрович Винокуров билиҥҥи Томпо улууһун Ичигэс нэһилиэгэр 1919 сыллаахха төрөөбүтэ. Кириэс Халдьаайы 4 кылаастаах оскуолатын үөрэнэн бүтэрбитэ. Колхозка суотчутунан, биригэдьииринэн, ревизионнай комиссия чилиэнинэн үлэлээбитэ. Кини сэрии саҕаламмытыгар 1941 балаҕан ыйын 1 күнүгэр бэбиэскэ тутан «Ичигэс» холкуос алта туруу үлэһитин кытта армияҕа барбыта. Василий Петрович алта фронунан – Калининскай, Сталинградскай, Смоленскай, Брянскай, I Украинскай, Дальневосточнай фроннарынан фашистскай Германияны уонна милитаристскай Японияны утары сэриилэспитэ.

Бастакы кыргыһыыга кини биир дойдулааҕа Степан Бравин аттыгар сүүрэн иһэн сүүскэ түһэттэрэн өлбүтэ, Баһылай 9-с сууккатыгар төбөҕө бааһыран госпитальга киирбитэ.

Кини салгыы элбэх кыргыһыыларга кыттыбыта. Бердычев, Кременец, Львов куораттары, Ирша станцияны ылыыга ордук хаан тохтуулаах сэриилэһиилэри өйдөөн хаалбыта. Советскай кыраныысаны туораан Краков куораты босхолоспута, Висла, Одер өрүстэри туораабыта, Бреслау, Лебау, Берлин куораттары ылсыбыта. Арҕаа сэриини түмүктээн баран илин милитаристскай Японияны утары сэриигэ кыттыбыта.

Василий Петрович төрөөбүт Ичигэһигэр 1946 сыл тохсунньу 6 күнүгэр, бэйэтэ этэринэн, Ороһуоспа аһын баттаһа кэлбитэ. Кини сэриигэ сылдьан 1943 сыллаахха ахсынньыга дойдутуттан бастакы суругу ылбыта, үөрүүтүттэн үҥкүүлээбитэ. Ол эрээри сурукка аҕата уонна күтүөтэ өлбүттэрин дьоно биллэрбит этилэр. Кыайыы көтөллөөх кэлбит киһини икки хараҕынан көрбөт ийэтэ көрсүбүтэ.

Василий Петрович колхозка, совхозка үлэлээбитэ. Кэргэннэнэн икки оҕоломмутуттан билигин кыыһа баар. Сиэннэрдээх, хос сиэннэрдээх. Кини сэриигэ сылдьыбытын туһунан ахтыы кинигэтин таһааттарбыта. Буойун ахтыыта Илья Петров-Мастаах уола «Дьон-норуот туһугар» диэн кинигэтигэр киирбитэ.

«Албан аат» 3-с степенэ, Аҕа дойду сэриитин 1–кы степенэ орденнардаах, «Хорсунун иһин», Германияны уонна Японияны кыайыы иһин мэтээллэрдээх сэрии ветерана 1994 сыллаахха өлбүтэ. Киниэхэ анаан биир дойдулаахтара Ичигэскэ сэргэ туруорбуппут, бюһун оҥотторбуппут. Кэннэки олорбут Кириэс Халдьаайы сэлиэнньэтигэр олорбут уулуссатыгар кини аата иҥэриллибитэ.

photoByWidth&id=39383&width=1000

photoByWidth&id=39382&width=1000

Быйыл Улуу Кыайыы 70 сылыгар Василий Петровичка анаан өйдөбүнньүк туруорулунна. Былырыын «Алькор – 7» ХЭТ миэстэтин бэлэмнээн таас-кумах куппута, үрдүн цеменнээбитэ. Красноярскайга олорор Кириэс Халдьаайыттан төрүттээх скульптор Василий Сивцев Василий Петрович мөссүөнүн боруонсаттан кутан барельефтаах мемориальнай дуоска оҥорбута. Өйдөбүнньүк тулатын Нерюнгрига сакаастаан тимир күрүөлээтилэр. Бу тэрээһин улуустааҕы Кыайыы фондатыттан үбүлэннэ.

 

Автор түһэриитэ уонна кини архыыбыттан хаартыска. 

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 718 Источник: ЯСИА Автор: Евдокия Неустроева Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ