- Бүлүү улууһугар архыып 1930 сыллаахха бастаан райисполком докумуоннарыттан саҕалаан тэриллибитэ. 1937 сыллаахха райисполком председателэ И.Е.Винокуров бирикээһинэн архыып анал үлэһитинэн Т.С.Бадаева анаммыта.
- Билигин муниципальнай архыып икки үлэһиттээх. Былырыыҥҥыттан саҥа дьиэҕэ көһөн үлэлии олоробут. Дьон сылдьарыгар үчүгэй буоллун диэн бэнидиэльниккэ, оптуорунньукка Каландарашвили 25 нүөмэрдээх дьиэтигэр дьону көрсөбүт, эрдэттэн оҥоһуллубут ыспыраапкалары биэрэбит. Онтон атын күҥҥэ архивохранилищеҕа үлэлиибит, ыспыраапкалары оҥоробут.
- Үксүн пенсияҕа тахсааччылар хамнастарын ыспыраапкатын көрдөөн, үлэ киниискэтэ сыыһа толоруллубут биитэр бэчээтэ суох буоллаҕына архыып көмөтүгэр наадыйаллар. Эбэтэр урукку уһаайбаларын, дьиэлэрин, бииргэ төрөөбүттэрин туһунан ыспыраапканы, онтон да араас докумуоны көрдөөн кэлэллэр. Ону таһынан улуус историятын чинчийээччилэр кэлэн үлэлииллэр. Биһиэхэ 77 фондаҕа 18468 дьыала хараллан сытар. Сэрии иннинээҕи дьыалалар, урукку партийнай архыып докумуоннара бары национальнай архыыпка бааллар. Архыып докумуоннара билигин электроннай базаҕа көһөрүллэн республика электроннай фондатыгар киллэриллэллэр.
- Былырыыҥҥа диэри уурар сирбит суох диэн саҥа докумуоннары туппат этибит. Билигин олохтоох дьаһалталар, тэрилтэлэр, сүрүн үлэлэрин докумуоннарын, архыыптарын туттарыахтарын наада. Хас биирдии тэрилтэттэн номенклатура, экспертнэй хамыыһыйа, делопроизводство инструкцията ирдэнэр, бу докумуоннар бары республикатааҕы экспертнэй хамыыһыйа сөбүлэнин ылбыт буолуохтаахтар уонна тэрилтэҕэ докумуоннар ол бэрээдэгинэн хараллыахтаахтар. Докумуоннары мээнэ быраҕыы, суох оҥоруу көҥүллэммэт.
- Архыыппытыгар докумуоннары сэргэ хаартыскалар ылыллаллар. Биһиэхэ хаартыскалар анал сейфэҕэ хоруопкаларга угуллаллар, онон уһуннук хараллыахтарын сөп. Быйыл фондабыт 13 хаартысканан эбилиннэ.
- Маны сэргэ улуус сайдыытыгар улахан суолталаах дьон докумуоннара хараллаллар. Холобура, Бүлүүгэ сыылкаҕа олорбут, үлэлээбит Польша социалистическай партиятын чилиэнэ С.И. Свидерскэй, 1930-с сыллааҕы хомсомуол, сэбиэскэй, партийнай үлэһит, кыраайы үөрэтээччи, Е.М. Никифоров, Исландскай шпаты арыйсыбыт А.Т. Андреев, Саха Республикатын үтүөлээх учуутала, сэрии бэтэрээнэ, кыраайы үөрэтээччи, Баппаҕаайы историятын суруйан хаалларбыт Е.С. Алексеев, онтон да атын биллиилээх дьон докумуоннара, үлэлэрэ биһиги архыыппытыгар бааллар. Өссө архыыпка историческай кинигэлэри таһынан Бүлүү дьоно суруйан таһааттарбыт кинигэлэрин мунньабыт. Суруйааччылар бэйэлэрэ аҕалан, үүнэр көлүөнэҕэ наада буолуо диэн туттараллар. Холобур, Федот Ксенофонтов уон кинигэтэ, Николай Бандеров аҕыс кинигэтэ бааллар. Онон интэриэһинэй хаартыскалары, кинигэлэри, уһулуччулаах дьон туһунан докумуоннары архыыпка туттараргытын уонна архыыпка туттарар тэрилтэлэр докумуоҥҥутун кэтэһэбит.
- Түгэнинэн туһанан Архыып аан дойдутааҕы күнүнэн урут үлэлээбит коллегаларбытын, тэрилтэ делопроизводителлэрин, архивистарын эҕэрдэлиибит, үлэҕитигэр үрдүк ситиһиилэри баҕарабыт!
- Муниципальнай архыып үлэһиттэрэ
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети