Декада чэрчитинэн аҕам саастаахтарга аналлаах акциялар уонна дьаһаллар ыытылла тураллар. Суһал көмөҕө наадыйааччыларга аадырыстаммыт көмө оҥоһуллар. Ону сэргэ араас кэнсиэртэр, «Орто дойду» өрөспүүбүлүкэтээҕи пааркаҕа экскурсиялар, Нуучча театрыгар испэктээкилгэ сылдьыылар тэриллэллэр.
«Эрчимтэн» эрчимнэ ыл
Аҕам саастаах дьон декада устата «Эрчим» социальнай реабилитация отделениетыгар араас тиэмэлээх истиҥ-иһирэх биэчэрдэргэ, музыкальнай-литературнай композицияларга кыттан, сүргэлэрэ көтөҕүллүө.
Социальнай хааччыйыы киинэ куорат уонна куорат таһынааҕы нэһилиэктэр олохтоохторугар анаан балаҕан ыйын 30 күнүгэр аһаҕас аан күннэрин ыытыаҕа. Бу күн социальнай тэрилтэлэр аҕам саастаах дьоҥҥо оҥорор медицинскэй, юридическай уонна психологическай өҥөлөрүн туһунан элбэҕи билиэхтэрэ. Чуолаан, маннык өҥөлөр оҥоһуллуохтара:
- Аҕам саастаах дьону социальнай өттүнэн хааччыйыыга сүбэлэр;
– Терапевт, эндокринолог быраастар, юрист, психолог сүбэлэрэ;
– Сенсорнай хоско психологическай релаксация сеанстара;
– Эмтиир физкультураҕа уонна доруобуйаны чэбдигирдиигэ маастар-кылаастар;
– Үһүс саас оскуолатын айар студияларын маастар-кылаастара;
– Бу оскуола дьарыктарыгар суруйтарыы;
– Баттах кырыйааччылар уонна иистэнньэҥнэр чэпчэтиилээх өҥөлөрө;
– Ыарыыны эрдэттэн сэрэтэр өрөспүүбүлүкэтээҕи киин эмчиттэрин биир кэлим чинчийиилэрэ;
– «Күһүн бэлэхтэрэ-2015» быыстапка-дьаарбаҥка.
Үһүс саас оскуолата ыҥырар
Үһүс саас оскуолата алтынньы 1 күнүгэр «Сүрэхпитинэн эдэрбит» бырааһынньыктааҕы кэнсиэркэ ыҥырар. Номнуо иккис сылын ыытыллар кэнсиэркэ бу оскуолаҕа дьарыктанааччылар бастыҥ музыкальнай композицияларын, үҥкүү нүөмэрдэрин уонна талааннаах илиилэринэн айан таһаарбыт үлэлэрин быыстапка-дьаарбаҥкаҕа билиһиннэриэхтэрэ. «Сүрэхпитинэн эдэрбит» кэнсиэр олус чаҕылхай уонна кырдьаҕас көлүөнэҕэ умнуллубат бэлэҕинэн буолуоҕа. Кэнсиэр Оҕо айар дыбарыаһыгар 17.00 чаастан ыытыллар.
Комментарии
Авторизация на сайте через социальные сети