Редакция айар коллектива мэлдьи олох оргуйар үөһүгэр сылдьан, этэргэ дылы, буруолуу сылдьар сонуннары хаһыакка таһаарарга дьулуһар, тутаах боппуруостары туруоран, ырытан дьоҥҥо-сэргэҕэ тириэрдэр. Хаһыаты сэргэ редакция типографиятыгар интэриэһинэй, улуус сайдыытыгар суолталаах кинигэлэр бэчээттэнэн тахсаллар. Ол курдук, быйыл 7 кинигэ күн сирин көрдө.
Хаһыат күнүн көрсө Ирина Петровна Фёдорова (Винокурова) „Аҕабыт алааһа — Саҥалаах“ диэн төрөппүттэрин, дьонун-сэргэтин, аймахтарын туһунан кэпсиир кинигэтэ 50 экземплярынан хат бэчээттэнэн таҕыста. Ирина Петровна кинигэтин иһин махтанан туран, редакция коллективын бэлиэ түгэнинэн эҕэрдэлээтэ, айымньылаах, таһаарыылаах үлэни баҕарда.
Хаһыат күнүн бэлиэтиир дьоро күн редакция коллектива сахалыы сиэри-туому тутуһан, кымыһынан, алаадьынан айах тутан ыалдьыттарын үөрэ-көтө көрүстэ. Бастакы ыалдьыт, куорат олохтооҕо Дария Константиновна Соломахо редакция иһинэн оҥоһуллар төлөбүрдээх өҥөнү биирдэ босхо туһанарыгар сертификат тутан үөрдэ. Итини сэргэ ыалдьыттар хаһыакка суруттардылар, Халыма кэрэ айылҕатын күөнүгэр хаартыскаҕа түһэн, миэстэтигэр бэчээттэтэн үөрүүлэрэ үксээтэ.
Биир сонун күрэһинэн хаһыакка анаммыт хомоҕой тыллаах хоһоонньуттар куонкурустара буолла. Кинилэр редакция айар үлэтигэр анаабыт хоһооннорун долгуйа иһиттибит, алгыс тылларын иҥэринэн күүс-уох ыллыбыт. Дьүүллүүр сүбэ быһаарыытынан хоһоон күрэһэр РФ, РС Суруналыыстарын сойууһун чилиэнэ, улуустааҕы киин балыыһа терапевт бырааһа Варвара Алексеевна Третьякова бастакы миэстэни ылан үөрдэ-көттө, редакция бэлэҕин тутта. Оттон бу күрэскэ кыттыбыт биһиги эрэллээх уопсастыбаннай корреспонденнарбыт Лена Шадрина уонна Мария Винокурова – Мичийэ биһирэбил бириистэринэн бэлиэтэннилэр.
Хоһоон күрэһин сэргэ саха норуота сөбүлээн оонньуур оонньуутугар: хабылыкка, хаамыскаҕа күрэхтэһиилэр ыытылыннылар. Манна улахан дьон уонна оҕолор кытыннылар, сатабылларын, маастарыстыбаларын көрдөрдүлэр. Түмүккэ үһүс миэстэҕэ — Владимир Гаврильевич Слепцов, иккискэ — Любовь Васильевна Егорова таҕыстылар. Оттон кыайыылааҕынан Мария Дмитриевна Некрасова буолла Оҕолорго Дарина Колесова — иккис, Эрик Выстров бастакы миэстэ буоллулар. Кыайыылаахтар уонна миэстэлэспит күндү ыалдьыттарбыт сахалыы оҥоһуктары бэлэх туттулар.
Бу курдук күннээҕи түбүктэн аралдьыйан, хаһыат төрүттэммит күнүн редакция коллективын кытары бииргэ бэлиэтээбит ыалдьыттарбытыгар махталбытын тиэрдэбит, айар үлэҕитин ыһыктыбакка, куруук биһигинниин буоларгытыгар баҕарабыт, тэрилтэ аана эһиэхэ мэлдьи аһаҕаһын, күүтүүлээх ыалдьыт буоларгытын этэбит.
Комментарии
Авторизация на сайте через социальные сети