Ыһыах бырааһынньыгынан оройуон баһылыга Георгий Герасимов, муниципальнай тэриллиилэр баһылыктара эҕэрдэлээтилэр. Георгий Евгеньевич оройуон дьаһалтатын грамоталарын историческай наука кандидата, Томпо оройуонун бочуоттаах олохтооҕо Николай Николаевка, скульптор Василий Сивцевка, Россия уонна Саха сирин Суруйааччыларын сойууһун чилиэнэ, «Чолбон» сурунаал редактора Николай Винокуров-Урсуҥҥа туттарда. СР Ил Түмэнин тыа хаһаайыстыбатыгар уонна аграрнай политикаҕа сис комитетын старшай референэ Александр Неустроев ыһыаҕынан эҕэрдэлээтэ уонна суруйааччы Анастасия Сыромятникова аатын үйэтитиигэ киллэрбит кылаатын иһин Арыы Толоон сүрүн оскуолатын директора Владимир Тимофеевка комитет чороон бэлэхтээх грамотатын туттарда. СР үлэҕэ уонна тыа хаһаайыстыбатын бэтэрээнэ Иван Колесовка, өрөспүүбүлүкэ уонна оройуон норуотун хаһаайыстыбата сайдыытыгар кылаатын иһин комитет кыһыл көмүс чаһыны уонна грамотаны туттарда. Сэрии оҕолоругар мэтээллэри туттардылар, Аҕа дойду Улуу сэриитин кыттыылаахтарын огдооболоругар уонна тыыл бэтэрээннэригэр «Арыы Толоон» диэн кинигэни бэлэхтээтилэр.
Улуу Кыайыы 70 сылыгар, аатырбыт снайпер Ф.М. Охлопков Герой аатын ылбыта 50 сылыгар анаан театрализованнай көстүүнү туруордулар. Манна бөһүөлэк олохтоох артыыстара, Кириэс Халдьаайы музыкальнай оскуолатын үөрэнээччилэрэ кыттыыны ыллылар. Кымыһы иһии сиэрэ-туома буолла, оһуохай дьиэрэйдэ.
Суруйааччы Анастасия Сыромятникова бюһун аһыы буолла. Бюст автора Россия Худуоһунньуктарын сойууһун чилиэнэ, скульптор Василий Сивцев. Анастасия Саввична кыыһа, СР культуратын үтүөлээх үлэһитэ Надежда Дмитриева уонна аймаҕа, «Якутия» авиакомпания пресс-секретара Светлана Сивцева, сэрии бэтэрээнэ Афанасий Мякюрдянов уо.д.а. тыл эттилэр.
Кыраайы үөрэтэр музейга «Арыы Толоон» саҥа кинигэ сүрэхтэниитэ ыытылынна. Автордар – историческай наука кандидата Николай Николаев, Николай Ефимов, Екатерина Тимофеева. 500 экземплярдаах кинигэ нэһилиэнньэ хомуйбут үбүн суотугар таһаарылынна.
Ыһыах үөрүүтэ-көтүүтэ салҕанан барда. Оһуохайы таһаарыыга Алевтина Николаева (Арыы Толоон), тойуксуттарга – Туйаара Луковцева бастаатылар. Байыаннай темаҕа хоһоон ааҕыытыгар куонкурус буолла. Маҥнайгы миэстэни самодеятельнай мелодист Будимир Ефимов, иккиһи – Милодора Андросова (иккиэн кириэс-халдьаайылар), үсүһү – Эрхан Атаков (Арыы Толоон) ыллылар.
«Былыргы саха таҥаһа» куонкуруска маҥнайгы миэстэни Елена Луковцева (Кириэс Халдьаайы) ылла. Кини дьиэ кэргэн ансаамбылын тикпит: дьахтар, эр киһи уонна икки оҕо таҥаһын. Халадаай ырбаахыны тигиигэ Альбина Баланова үлэтэ бастаата. Иккис миэстэни үлэ бэтэрээнэ Анастасия Лугинова, үсүһү - Анна Сыромятникова (бары кириэс-халдьаайылар) ыллылар. Оҕо таҥаһыгар аҕас-балыс Кынтояровалар бастаатылар. Оҕуруонан тиһиигэ Евдокия Неустроева (Хаандыга)кыайда. Бары кыайыылаахтарга грамоталар уонна сыаналаах бириистэр туттарылыннылар.
Сүүрүүгэ, хапсаҕайга, мас тардыһыытыгар уонна сахалыы многоборьеҕа күрэхтэһиилэр ыытыннылар. Хапсаҕайга муҥутуур кыайыылааҕы быһаарар күрэхтэһиигэ Юрий Сыромятников, многоборьеҕа – Алексей Протодьяконов кыайыылааҕынан таҕыстылар.
Ыһыахха биир дойдулаахпыт, көҥүл тустууга аан дойду икки төгүллээх, Россия биэс төгүллээх чемпиона Виктор Лебедев кэлэ сырытта.
Комментарии
Авторизация на сайте через социальные сети