Бу сыһыы омос көрдөххө, олус улахана суох курдук. Ол эрээри, иһигэр хаамтахха, бэрт киэҥ-куоҥ.
Былыр былыргаттан дойдубут, алааспыт булдунан-алдынан, көтөрүнэн-сүүрэринэн биллэрэ, күөлугэр билиҥҥээҥҥэ диэри көмүс хатырыктаах бастыҥа үөскүүрэ, сайынын от дэлэйдик үүнэрэ, хас эмэ сүүһүнэн туонна оту биэрэр биир саамай оттонор ходуһалаах дойдубутунан Бойуолабыт буолар.
Бойуоланы олус таптаан, харыстаан, көрөн-истэн, аатын да улаханнык ааттаабакка Егоровтар, Петровтар, Слепцовтар аҕа уустара олохсуйан оччотооҕу кэм сиэринэн, оттоон-мастаан, сүөһү ииттэн сыһыыларын тула быр-бааччы олорбуттара.
Дьон-сэргэ эйэлээх олоҕун атыйахтаах уулуу аймаабыт 1941 сыл. Улуу сэрии ыар кэмэ тыҕаан кэлбитэ. Дьон ааттаахтара, кыаналлара, эдэрдэрэ бары уоттаах кыргыһыы туонатыгар ыҥырыллыбыттара. Бойуола алааһыттан эмиэ, хаарыан эдэр, олохторун саҥа олорон эрэр оҕолор сэриигэ аттаммыттара. Ол курдук, уодаһыннаах сэрии толоонуттан Бойуола сыһыыттан аттарынан баран дойдуларыгар эргиллэн кэлбэтэх буойун убайдарбыт:
- Егоров Егор Егорович – 1910 с.т. – 1942 с.өлбүт;
- Егоров Егор Никифорович – 1919 с.т.-1942 с.э.;
- Егоров Михаил Прокопьевич – 1900 с.т. -1943 с.ө;
- Егоров Прокопий Прокопьевич – 1919 с.т.-1943 с.ө.;
- Егоров Семен Петрович – 1920 с.т. – 1942 с.ө.;
- Петров Макар Семенович – 1922 с.т. – 1942 с.ө;
- Петров Николай Моисеевич – 1898 с.т. – 1943 с.ө.;
- Петров Прокопий Моисеевич – 1903 с.т. -1943 с.ө;
- Петров Хрисанф Прокопьевич 1918 с.т.-1945 с.ө.;
- Слепцов Василий Ефимович 1919 с.т.-1946 с.ө;
Сэрии алдьархайдаах кэмин аһаран, дойдуларыгар геройдуу эргиллибиттэрэ:
- Егоров Лаврентий Егорович
- Егоров Алексей Никифорович
- Егоров Герасим Прокопьевич
- Слепцов Николай Ефимович
Бу ынырыктаах сэриигэ биир алаастан 14 киһи кыттыбыта, үгүстэрэ сэрии толоонугар сырдык тыыннара быстыбыта.
Эдэр саастарын Улуу сэриигэ толук уурбут хаарыаннаах ыччаттарга анаан, Улуу Кыайыы 70 сылыгар сөп түбэһиннэрэн, бу дьыл балаҕан ыйын 20 күнүгэр Бойуола сыһыытын киирии аартыгар, дьон-сэргэ, кэнэҕэс ыччаттарга, көрө-истэ, билэ сылдьалларыгар анаан мрамортан оҥоһуллубут паматынньык, сахалыы сэргэлээх, тупсаҕай көрүҥнээх, үйэлээх бэлиэ туруутун аһыллыыта үөрүүлээх быһыыга-майгыга ааста.
Бу үөрүүлээх, долгутуулаах күн Егоровтар, Петровтар, Слепцовтар, Бурцевтар, Куличкиннар, Васильевтар, Назаровтар киэн аймахтар мустан, көрсөн ирэ-хоро кэпсэтэн, уруккуну ахтан санаан аастылар, инникини торумнаатылар.
Сэрииттэн эргиллэн кэлбит Егоров Герасим Прокопьевич төрөппүт кыыһа педагогическай үлэ ветерана Соловьева Ирина Герасимовна уонна Петровтар аймах сиэн уоллара коҥүл тустууга спорт маастара, Саха сирин үтүөлээх тренерэ, ыксаллаах быһыы-майгы улуустааҕы киинин салайааччыта Александр Куличкин пааматынньыгы үөрүүлээх быһыыга-майгыга аһар үрдүк чиэһи ыллылар.
Сэриигэ барбыт убайдарын, аҕаларын тустарынан ахтыылары физико-математическай наука доктора Слепцов Иван Ефимович уонна педагогическай үлэ ветерана Соловьева Ирина Герасимовна оҥордулар.
Бойуола сыһыыттан барбыт буойуттарга анаммыт пааматынньыгы олоххо киллэриигэ СК Строй дириэктэрэ, Бойуолалар сиэн уоллара Алексей Бурцев соҕуруу куоракка оҥотторон аҕалан дьоннорун, аймахтарын улахан махталын ылыан ылла.
Ол курдук, улахан иитэр үөрэтэр суолталаах, кэскиллээх, инники кэлэр көлүөнэҕэ үтүө холобур буолар дьыаланы оҥотторбуппутанан, бары мустубут аймахтар улаханнык астынан, үөрэн-көтөн, инникигэ элбэҕи балааннаан тарҕаспыппытыттан үөрүүбут муҥура суох улахан.
Комментарии
Авторизация на сайте через социальные сети