Түһүлгэ түмсүүлээҕин сөхтүбүт
Раиса Маркова, Сунтаар Ыһыаҕар «Дорҕоонноох тойуксут» аатын ылбыт Таатта улууһуттан сылдьар ыалдьыт:
– Биһиги Тааттаттан олоҥхоһут Алексей Николаевтыын туруулаһан туран, 2 күннээх-түүн айаннаан кэллибит. Ыһыах түһүлгэтин олус сөхтүбүт. Сунтаар дьонун кута-сүрэ чарааһа киһини умсугутар, дьикти айылҕата абылыыр. Тойуксуттарыттан, кылыгырыы оонньуур кылыһахтарыттан, киһи быһыытынан элэккэйдэриттэн астынныбыт.
Алексейым олоҥхоҕо 35-50 саастаахтар бөлөхтөрүгэр бастакы миэстэни ылан үөрэн-көтөн, долгуйан олоробут. Ону сэргэ тойукка уонна олоҥхоҕо биирдиилээн уонна бөлөҕүнэн күрэскэ кытынныбыт.
Бары бириистээх миэстэҕэ тигистибит
Геннадий Харлампьев, Сунтаар ыһыаҕар «Байбарылаах хотуттар, таайыылаах хоһууттар» куонкурус кыайыылааҕа (Бүлүү, Лөкөчөөн):
– Уйгу-быйаҥ Ыһыахха, улуу Зверевкэ анаан-минээн сүгүрүйэр санаалаах Бүлүү делегациятыгар киирсэн кэллим. Аан дойдуга оһуохайынан сураҕырар Сунтаар Ыһыаҕар сылдьан олус астынным. Иккис күн ардах түһэн мэһэйдээтэ эрээри, аныгылыы тутуулаах «Олоҥхо» дьиэтигэр күрэстэһэ сылдьабыт. Фольклор фестивалыгар, дэгэрэҥ ырыа күрэһэр, олоҥхоҕо кытынныбыт. Биһигини кытары оҕолор ансаамбыллара баар. Бары кэриэтэ бириистээх миэстэлэргэ тигистибит. Сергей Зверевкэ уһуйуллубут СӨ култууратын үтүөлээх үлэһитэ, уһун сылларга Чочу народнай театрыгар үлэлээбит Семен Иванов тойукка сүрүн бирииһи ылла. Каролина Харлампьева тойукка лауреат буолла, Светлана Харлампьева дэгэрэҥ ырыаҕа иккис миэстэлэннэ. Мин хомуска кыттан III cтепеннээх лауреат буоллум. Оҕолорбут эмиэ миэстэлэстилэр. Онон дойдубутугар илии тутуурдаах, өттүк харалаах төннөн эрэбит.
Улахан бириис ордуҕурҕаһыыны үөскэтэр
Каролина Харлампьева, Сунтаар ыһыаҕар тойук күрэһэр бастакы миэстэлээх тойуксут:
– Мин бэйэм Үгүлээт нэһилиэгэр төрөөбүтүм, билигин Бүлүү куоракка олоробун.
Сунтаар ыһыаҕа былыр-былыргыттан тэрээһиннээхтик ыытылларын билэбин. Ол тэтимнэрин ыһыктыбакка сылдьаллар эбит. Биһиги фольклор фестивалыгар III cтепеннээх лауреат буоллубут.
Бэйэм бүччүм санааларбын этэр буоллахха, атын ыһыахтарга Дархан этээччи аатын ылбыт оһуохайдьыттары куонкуруска кытыннарыа суохха баар этэ. Эдэрдэргэ, саҥа этээччилэргэ суолу аһыахха наада. Улуустартан кэлбит дьон бэйэлэрин көрдөрүөхтэрин, киэҥ түһүлгэҕэ оһуохайдыахтарын, миэстэлэһиэхтэрин баҕараллар. Аны туран оһуохай бирииһигэр массыынаны туруоралларын сөбүлээбэтим. Спорт оонньуутугар туруоруохха сөп этэ. Тоҕо диэтэххэ, улахан бириистэр хаһан баҕарар ордуҕурҕаһыыны, бэрт былдьаһыыны үөскэтэллэр. Быйылгы Сунтаар ыһыаҕар кыттааччылар, күрэстэһээччилэр ортолоругар ыччат элбээбитин сэргии көрдүм. Ону ыһыах биир уратытын курдук ылынным.
Төрөөбүт дойду ахтылҕана
Изабелла уонна Владимир Абрамовтар, Чурапчы улууһуттан кэлбит ыалдьыттар:
– Тоҕус томтордоох Чурапчыбытыгар Олоҥхо ыһыаҕар сылдьан, күүс-уох эбинэн баран, Сунтаарга кэлбиппит. Мин Чурапчы ыһыаҕар 999 киһилээх хорга ыллаабытым. Сунтаардааҕы аймахтарбыт, 77 саастаах Андриан Егоровтаах үөрэ-көтө көрүстүлэр.
Ыһыах аһыллыытын сөҕө-махтайа көрдүбүт. Оҕолор таҥастара-саптара үчүгэйэ киһи хараҕын саататар. Ыһыах буолар сиригэр хатыҥ, харыйа мас тэҥинэн үүнэрин сэргии көрдүбүт.
Ыһыах кэмигэр киһи ситэн көрбөт элбэх оонньуу, кэнсиэр, көр-нар ыытылынна. Сергей Зверев аатынан Үҥкүү театра «Кулан кугас аттаах Куллустай Бэргэн» олоҥхо сүрэхтэниитин тыыммакка да олорон көрдүбүт. Артыыс Дмитрий Артемьев – кэргэним үөрэппит оҕото.
Ыһыах сарсыныгар Элгээйи аатырбыт-сураҕырбыт музейын тахсан көрдүбүт. Терентий диэн ааттаах экскурсовод наһаа үчүгэйдик кэпсээтэ. Сарсыныгар Тойбохой музейыгар, Ботаническай саадка сырыттыбыт. Кэргэним оҕо сылдьан оонньообут арыы тыатыгар дьаарбайдыбыт.
Онон, Сунтаар сириттэн дуоһуйа сынньанан, үөрэн-көтөн айаннаан эрэбит. Кэлэрбитигэр самолетунан кэлбит буоллахпытына, төннөрбүтүгэр сири-дойдуну көрөөрү таксинан айаннаабыппытыттан кэмсиммэтибит. Бу диэки суоллара үчүгэйэ, оҥоһуулааҕа атыттарга холобур буолуон сөп эбит. Ыалдьытымсах Сунтаар дойдутугар барҕа махталбытын этэбит.
Надежда ЕГОРОВА
Комментарии
Авторизация на сайте через социальные сети