Ааспыт «Бытантай ааҕыыларыгар» 70-ча үөрэнээччи кыттыыны ылбыт эбит буоллаҕына, быйыл 170 оҕо кыттыыны ылбыта биһигини олус үөртэ. Манна Оҕо киинин үлэһиттэрэ, редакция айар коллектива, учууталлар, төрөппүттэр бары бииргэ түмсэн, үлэ бөҕөтүн ыытан, оҕолору кытта дьарыктаналларын ааһан, таҥас-сап тигэн, быыстапкаҕа кыттан, бириис туруоран хайдах эрэ бары биир сыалга-сорукка түмүллэн бу умнуллубат поэзия, айар, чинчийэр үлэ алгыстаах түһүлгэтин ыыттыбыт.
Бу тэрээһин сүрүн сыалынан оҕо айар, суруйар, ааҕар, толкуйдуур, чинчийэр дьоҕурун сайыннарыы буолар. Бу биир күннээх конкурсу ыытыы диэн буолбатах, суруйааччылар айымньыларын ааҕан, ырытан, хоһооннорун үөрэтэн хотугу норуоттар сиэрдэрин-туомнарын, айылҕаҕа, олоххо сиэрдээх сыһыаннарын, билиилэрин өйдөрүгэр-санааларыгар иҥэринэн оҕолор, ыччаттар дириҥ билиилээх, дойдуларын таптыыр, сиэри-туому тутуһар үтүө дьон буола улааттыннар диэн маннык күрэһи көҕүлүүбүт. Ааҕар, суруйар, айар оҕо үтүөҕэ-кэрэҕэ тардыһар, дууһата ыраас, санаата сырдык буолар.
Ол курдук, ааспыт нэдиэлэҕэ А.В.Кривошапкин аатынан редакция «Айар дьиэтигэр» оҕо-аймах, учууталлар, төрөппүттэр «лыык» курдук мустаннар айар түһүлгэбит ыҥырыа уйатын тоҕо тарпыт курдук өрө оргуйан олордо.
Бастаан айар-чинчийэр үлэлэри истии буолла. Оҕолор «Сир иччитэ» (Платон Ламутскай), «Кочевье длиною в жизнь»(Андрей Кривошапкин) курдук олус уустук эпическай романнары ырытан дакылаат аахтылар. Маны таһынан Үөһээ-Бытантай эдэркээн учууталлара Светлана Скрябина, Сардаана Слепцова А.В.Кривошапкин айымньыларынан, кини олоҕор аналлаах сүрдээх интэриэһинэй видеослайд, альбомнары оҥорбуттарын көрдөрдүлэр. Эдэр учууталлар айар үлэлэрин саҥалыы тыыннаан, билиҥҥи технологиялары туттан оҥорбуттара сүрдээх сонун буолан мустубут дьон, оҕолор болҕомтолорун тарта.
Айар күрэспит иккис түһүмэҕинэн эбээн суруйааччыларын айымньыларынан хоһоону дорҕоонноохтук ааҕыы буолла. Манна кыра кылаас оҕолоруттан саҕалаан улахаттарга тиийэ 100-кэ оҕо эбээннии, сахалыы, нууччалыы хоһооннору ааҕан добдугураттылар. Оҕолор бары кэриэтэ таҥас-сап тиктэн, олус уустук айымньылары үөрэтэн, харахтарын уота умайан, сирэйдиин-харахтыын сырдаан, туттардыын-хаптардыын тупсан, иэйэн-куойан туран хоһоон аахпыттара барыбытын долгутта. Кинилэр иннилэригэр норуот суруйааччыта А.В. Кривошапкин, кэргэнэ, педагогическай наука кандидата, хас да пособие автора Р.С. Никитиналыын бэйэлэринэн кэлэн олороллоро санааларын көтөхпүтэ, эппиэтинэһи сүктэрбитэ саарбаҕа суох.
Биһигини ордук орой мэниктэринэн аатырар оторой-моторой уолаттар 6-7-лии буолан тахсан суруйааччылар уустук айымньыларын биир тыынынан этэн-тыынан добдугураппыттара олус үөртэ. Нэһилиэктэртэн кэлбит оҕолор төһө да суол-иис уустугуттан сылайдаллар күрэс бары түһүмэхтэригэр киирсэннэр ситиһии кынаттаах төнүннүлэр. Оттон Саккырыыр орто оскуолатыттан оҕолор кылааһынан кэлэн кыттыбыттара бу күрэһи олус киэргэттэ.
Күрэс үһүс түһүмэҕэр эбээн суруйааччыларын айымньыларынан испэктээк туруордулар. Манна оҕолор аны артыыс быһыытынан талааннарын арыйдылар. Бу түһүмэххэ оҕолор куукулаларынан Платон Ламутскай уонна Андрей Кривошапкин айымньыларынан олус үчүгэй испэктээктэри көрдөрдүлэр, эбээннии тылынан сценкалары туруордулар. Манна куукула театрын оҕолоро (Т.И.Чичигинарова, Н.П.Степанова) ордук табыллан мустубут дьон сэҥээриитин ыллылар.
Маны таһынан оҕолор суруйааччылар айымньыларынан уруһуй уонна прикладной оҥоһуктар быыстапкаларын көрөөччүлэр уонна жюри дьүүллэригэр туруордулар. Манна оҕолор "Ааныкчаан отоно" айымньынан сувенирдары, түүнэн олус кэрэ оҥоһуктары, кырсаны, тугуту субу туран кэлиэх курдук тыыннаан оҥорбуттар. Андрей Кривошапкин айымньыларынан таба уобараһын арыйбыттар, тааһынан сувенирдары, араас паннолары, бэл туустаах тиэстэнэн табаны чочуйан таһаарбыттара биһирэттэ.
Настя Корнилова, Настя Сотрудникова "Хара тыа хаһаайына" кинигэни олус интэриэһинэйдик, саҥалыы дизайннаан оҥорбуттара Андрей Васильевиһы уонна Роза Серафимовнаны сөхтөрдө. Кинилэр эмиэ анал бириистэрин бэйэлэрэ көрөн олорон бу оҕолорго туттардылар. Маны таһынан Платон Степанов-Ламутскай уола А.П.Степанов бу эйгэҕэ ордук чугас киһи буоларынан жюри састаабыгар киирэн, ырытыһыыга кыттан Степановтар ааттарыттан анал бирииһи КОО үөрэнээччитэ Вася Поповка туттарда. "Бытантай уоттара" хаһыат сүрүн бириистэрин ыраахтан айаннаан кэлэн баран сүрдээх үрдүк таһымнаахтык кыттыбыт Дьарҕаалаах уонна Кустуур орто оскуолатын үөрэнээччилэригэр Лара Ивановаҕа, Алиа Гороховаҕа, Ангелина Макароваҕа, Уйгулаана Колесоваҕа туттардыбыт.
Олус элбэх үөрэнээччи кыттан уонна оҕолор үксүлэрэ хоһоон ааҕар таһымнара биллэрдик улаатан быйыл кыайыылаахтары быһаарарга олус уустук буолла. Ол гынан баран, бу айар күрэс түһүлгэтигэр кыттыбыт оҕолор, мин санаабар, бары кыайыылаах буоллулар. Тоҕо диэтэргит кинилэр хоһоон хомоҕой тылын, айымньы алгыстаах алыбын куттарыгар-сүрдэригэр иҥэринэн тутум үрдээн, ис туруктара күүһүрэн, айар, кэрэни кэрэхсиир, өбүгэлэрин сиэрин-туомун тутуһар сырдык дьон буола улаатыахтара диэн бигэ эрэллээхпин.
Комментарии
Авторизация на сайте через социальные сети