«Мегафонтан» тутулуктаах
Yota Россия мобильнай ырыынагын биир саамай эдэр операторынан буолар. 2007 сыллаахха саҥа тэриллэн, бастаан утаа, Москва, Санкт-Петербург уонна Уфа эрэ олохтоохторун сибээһинэн хааччыйара. Сыыйа ыыра кэҥээн, саҥа технологиялары олоххо киллэрэн, бүгүҥҥү туругунан 4G ситими Россия 39 регионугар үлэлэтэр. Уопсайа 1,2 мөлүйүөн кэриҥэ абоненнаах.
Саҥа сүһүөҕэр туран эрэр хампаанньаны хас да сыллааҕыта «Мегафон» ПАУо атыылаһан, Yota биир улахан федеральнай оператор «оҕотунан» буолбута. Билигин сүрүн акционерын оборудованиеларын, станцияларын хото туһанан, Россия үгүс куораттарыгар бэрт судургутук кимэн киирэн иһэр. Ол эрээри хампаанньа үлэтэ, сибээһин хаачыстыбата «Мегафонтан» быһаччы тутулуктаах.
Бу күһүҥҥүттэн Yota абоненнарынан Амурскай уобалас, Еврейскай автономнай уобалас, Бурятия, Забайкальскай кыраай уонна биһиги өрөспүүбүлүкэбит олохтоохторо буоллулар. 4G ситиминэн үлэлиир буолан, киһи эрэ барыта бу хампаанньа килийиэнинэн буолар кыаҕа суох. Тоҕо диэтэргин 4G сибээс суотабай төлөпүөн бары көрүҥэр үлэлээбэт. Онон төлөпүөн мааркатын уларыттарар, эбэтэр Yota 4G LTE модемы атыылаһан туһаныахха сөп.
Интернет төлөбүрэ 150 солкуобай
Yota сим-карталара Дьокуускай куорат «Туймаада» атыы-эргиэн киинин таһынан, «Связной», «Евросеть» маҕаһыыннарга атыыга таҕыстылар. Сыаналарын үөрэтэн көрдөххө, «Мегафон», «МТС», «Билайн» тарыыптарыттан улахан уратыта суохтар. Ол эрээри, ити мин көрүүбэр. Холобур, модем нөҥүө хааччахтааһына суох интернетинэн (4G) биир ыйы быһа туһанар буоллахпына, төлөбүрэ 2000 солк. быһыллыбыт. Оттон «Мегафон» Интернет XL диэн тарыыбыгар ыйы быһа хааччаҕа суох интернетинэн туһаныы төлөбүрэ 1999 солк. тэҥнэһэр.
«Смартфон» тарыыпка холбонон, интернетин туһаныы төлөбүрэ 150 солк., СМС – 50 солк., 100 мүнүүтэ кэпсэтии 150 солк., 300 мүнүүтэ – 320 солк., 600 мүнүүтэ – 560 солк., 900 мүнүүтэ – 770 солк., 1200 мүнүүтэ – 950 солк. Оттон планшет сим-картатын тарыыба смарфоннааҕар араастаһар. 1 мүнүүтэ кэпсэтии 3,9 солк. Интернетин төлөбүрэ 430 – 900 солк. Тарыыптары барыларын сыымайдаан үөрэтэн көрөн баран, арыый да табыгастааҕы, барыстааҕы тобулуохха сөп. Холобур, «Смартфон» тарыып холбонон, аҥардас интернетинэн эрэ туһаныахха сөп. Ыйдааҕы төлөбүрэ баара-суоҕа 150 солк. эрэ. Ол эрээри мэтээл икки өрүттээх буоларыныы, аны кэпсэтии төлөбүрэ арыый да сыаналаах.
«Тигээйилэр», «сымыыттар» уйаларыгар уу киирдэ дуо?
Саҥа федеральнай мобильнай оператор Саха сиригэр үлэтин саҕалыаҕыттан, өр сыллар усталарыгар олохтоох ырыынагы баһылаан-көһүлээн олорбут «кырдьаҕастар», ол иһигэр «тигээйилэр», «сымыыттар» уйаларыгар уу киирбит буолуохтаах. Килийиэннэр нөҥүө кытылга туораабаттарын туһугар, баҕар, сыаналарын намтаталлара дуу диэн эрэх-турах санаа баар. Дьиҥэр, ырыынак суураллыбат сокуонунан күрэстэһии баар буоллаҕына, утарылаһааччылар өҥө хаачыстыбатын тупсарыы, биитэр сыаналарын намтатыы мучумааныгар түһүөхтээхтэр. Холобур, суотабай сибээс стационарнай төлөпүөнү ырыынактан үтүрүйүөҕүттэн, «Ростелеком» сыанатын түһэрэн барбыта. Ол да үрдүнэн абоненын ахсаана лаппа аҕыйаабыта.
Эксперт санаата
«Мегафон» инфраструктуратын туһанар
Дмитрий Кошевой, «МегаФон» ПАУо Уһук Илиҥҥитээҕи филиалын пресс-сэкиритээрэ:
– Yota хампаанньа акциятын 100%-нын «МегаФон» бас билэр. Yota сибээс виртуальнай оператора буоларынан, MVNO (mobile virtual network operator) схеманан үлэлиир. Судургутук эттэххэ, атын оператордар инфраструктураларын (тирэх станцияларын, оборудованиеларын) туһанан сибээһинэн хааччыйар. Ол эрээри бэйэтин мааркатынан өҥөтүн атыылыыр. Билигин хампаанньа 2G/3G/4G ситимнэринэн, смартофонунан туһанааччыларга хааччахтааһына суох интернетинэн, Yota ситимигэр, итиэннэ +799... федеральнай нүөмэрдэргэ босхо кэпсэтиини хааччыйар. Абонентскай төлөбүр интернет түргэниттэн тутулуктаах.
Комментарии
Авторизация на сайте через социальные сети