- Көрсүһүүгэ улуус баһылыга Николай Старостин, улуус баһылыгын бастакы солбуйаччы Павел Сазонов, нэһилиэктэр баһылыктара, управление салайааччылара, тыа хаһаайыстыбатынан дьарыктанар предпринимателлэр кытыннылар.
- Нэньцзян тыа хаһаайыстыбатынан дьаныардаахтык дьарыктанар куораттар ахсааннарыгар киирсэр эбит. Уезд иһигэр хортуоппуй олордор, хайа промышленноһын, тутуу матырыйаалын оҥорор, үүтү, сахары оҥорон таһаарар о.д.а. компаниялар, 20-тэн тахса промышленнай тэрилтэлэр күргүөмнээхтик үлэлииллэр. Куорат салалтата айылҕа биэрэр баайын аныгы технологияны туһанан туһаҕа таһаарар, элбэх инвестордары, предпринимателлэри үлэлэтэр. Икки сыл иһигэр бурдук хомуура балтараа мөлүйүөн тоннаҕа тэҥнэспит. Ити бүтүн Кытай үрдүнэн бастыҥ көрдөрүү.
- Улуус баһылыга Николай Старостин Нэньцзян сирэ-уота биһиги улууспут сирин-уотун кытары майгыннаһарын, онон тыа хаһаайыстыбатын сайыннарарга кинилэртэн баай уопут ыларга үлэлиэхпит-хамсыахпыт диэн эттэ.
- Нэньцзян куорат мэра Ван Хэйдун Саха сирин, биһиги улууспут туһунан элбэҕи аахпытын, билбитин, республикаҕа биир инники күөҥҥэ сылдьар сайдыылаах оройуон буоларбытын бэлиэтээтэ. Куорат промышленноска управлениетын начальнига Син Гуанмин, сир баайыгар государственнай управление салайааччыта Чжан Пенфей Нэньцзян олоҕун, үлэтин-хамнаһын кытта билиһиннэрдилэр.
- Ыалдьыттарбыт улуус дьаһалтата ыалдьыттата ыҥырбытын иһин махталларын биллэрдилэр уонна сэмэй бэлэхтэрин туттардылар.
- Өскөтүн үөрэх, культура, спорт, доруобуйа харыстабылын эйгэтигэр биһиги улууспут Кытай Муданьцзян куораты кытта бииргэ үлэлэһэр буоллаҕына, бу сырыыга тыа хаһаайыстыбатын салаатыгар Нэньцзян куораты кытта бииргэ үлэлэһэргэ сөбүлэһии түһэристэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети